Ezaya 51:3 - Amazwi Yakwe Leza 2013

³ “Icumi cumi nemo nkatezela umusumba wa Zioni. Indatezela nu muntu ali wensi wino wikala umu vitalang'anda vya uko. Nanti angala impanga yao yononeka, nemo ndaisangula wa mpanga ino nacisile umu Edeni. Mulaya sile ukuzanga wakwe cimwi nga nu kwimba inyimbo zya kundumbanya nu kuntaizya.

Ezaya 51:3 ပူးပေါင်းရင်းမြစ်များ

Utandiko 13:10

Caleka Loti acelecensya monsi azana ukuti cifoloma consi ca Luzi lwa Yodani, na konsi ukufuma ku Zoali kwali amanzi aingi wamu calo ca Edeni cino Yawe wapanzile, nanti wamu mpanga ya Eguputo (cii cali lino Yawe atali aonone imisumba ya Sodoma na Gomola).

Masamu 85:8

Nemo nkukutika kuno Yawe akuvwanga, apamulandu wakutuletela ulongo swe antu yakwe, lelo cikulu sile tutaciwelela ku vya uwelewele.

Ezaya 12:1

Mu wanda ulya antu yalimbila ulwimbo luu, yati, “Nakutaizya we Yawe! Wansokile, lelo icipyu cako caticisila. Watumyalalika umwenzo wane.

Ezaya 25:9

Mu wanda ulya yene yalavwanga yati, “Cumi kwene wi ali Leza witu. Twataile ukuti aliwe alatukulula! Wene ali Yawe nupya tukataila munoli. Si lekini tuzange nu kusansamuka pano watatupususya.”

Ezaya 35:6

Ivilema vimatolokanga wa nswela. Indimi zyakwe yaciulu zimapundanga nu luzango. Amanzi yamakonkolokanga umu lwanga ni nguzi zilapita umu mpanga ilangoke.

Ezaya 41:16

Mulaavwintila imyamba umupela nu muza nao ulaisenda. Icipunga naco cilaisalanganya. Lelo mwemo mulaasansamuka pano nene indi Leza winu. Mulandumbanya ne Leza Wamuzilo wakwe Izlaeli.

Ezaya 43:19

Mwike sile amano pa vintu ivipya vino namacita, nu kutandika vyativitandika ukucitika. Uzye mwemo musyakuvilola? Nemo namapanza umuseo mu lwanga, nga namamupeela inguzi mu mpanga iyumalale.

Ezaya 44:26

Lelo umuomvi wane wenga ndi wasowela cimwi, lino natuma inkombe yonga uku kukosola vino nateyanya, awe cumi ala lyene vino nateyanya vilacitika. Nene nkalanda vya musumba wa Yelusalemu kuti antu yataca yize yikalemo nupya. Inkavwanga nu kuti imisumba ya mpanga ya Yuda ilatutululwa cipya cipya. Icacumi, imisumba iyo anene ndaikuululula muno yononeka.

Ezaya 49:13

Imbilini mwazanga, mwe viumbwa vyamu mayulu! Pongomoka nu luzango nawe we nsi. Mwe myamba saulini inyimbo, pano Yawe watamyalalika antu yakwe, nu kutezela alanda akwakwe.

Ezaya 49:19

“Nanti angala wizile uya wa citalang'anda, wemuno yakutazyezile umwaulamo akantu, ndakai umacepesya cakuti utangasunga aikazi yako. Na yayo akononyile yalayapusizya ukutali nawe.

Ezaya 49:8

Yawe wavwanga wati, “Akasita ka kumupususya ndi kafika, nemo ndamulola luse luse nu kwasuka impooma zinu, ndi mwalila iyoyomba. Nemo ndamulinda nu kumucingilila. Mulaleka nu kuti ince ncite upangano, apakasi kao nani. Ndaleka kuti muce mwikale nupya mu mpanga yaupyanyi ino yasyala ntangali ntangali.

Ezaya 51:12

Yawe nupya wavwanga wati, “Kapela wa maka kuno muli anene. Nga fwandi nupya ungaoopa uli umuntu umwina kufwa, wino waviilwe uku muntu? Wiyo alafoota sile nu kuuma wi sote?

Ezaya 52:9

Pundini capamwi ni nsansa, mwe vitalang'anda vyamu Yelusalemu, pano lyene Yawe watamyalalika antu yakwe yano yakukuulula Yelusalemu.

Ezaya 61:10

Iye mwe, Yelusalemu wane! Siangala nalukuzangila muli Yawe nu luzango. Umwenzo wane kawalu kuzangila muli Leza. Pano nemo watanzwika icakuzwala cakulanga ukuti nimpusuka. Watanzwika ilaya lyakulanga ukuti natincimvya. Eya, lyene nemo ndi wakwe nawinga wino azwite candaluwa!

Ezaya 65:18

Mwemo lyonsi mwasansamuka nu kuzanga apa vintu vino nemo namacita. Pano Yelusalemu mupya wino nemo namacita, mulaya sile insansa zituputupu, na antu kwene alaya mwenemo yalaya ansansa zituputupu.

Yelemiya 31:25

Pano ndimula umwenzo utovoke, ndikusya nu mwenzo onsi uno ukucula.

Ezekelo 28:13

Wikalanga mu Edeni, mu calo cakwe Leza, wazwalanga tumawe tukankala twa misango yonsi. Utuli wakwe lubi, topazi, emalodi, belulo, onikisi, yaspele, safilo, na daimondi. Tuto tonsi awewe twapangilwe uwanda uno waumvilwe.

Ezekelo 36:11

Nemo ndavuzya antu, ndavuzya ni viteekwa kwene. Mulavulilako ukuluta vino mwali mpiti, nupya mulakwata na ana avule. Ndaleka muce mwaikala ndi vino mwikalanga mpiti, nupya ndaleka mukaye ni cituku vino citatazile ciye kuno muli apa mpiti. Lyene ali lino mulamanya ukuti nene indi Yawe.

Ezekelo 36:35

Nga alino yonsi yalavwanga yati, Silolini ivyalo ivyali mpiti ulwanga, lolini lyene vino vili wa calo ca Edeni. Nga ni misumba iyaongolwike mpiti nu kuisampa nu kusyala vitalang'anda, lolini lyene vino yati yaikuula cipya cipya, nu kupindilizyako amalinga, nga na vino lyene antu yakwikala mwenemo.

Yowelo 2:3

Ku nkolelo nako kuli umoto ukaonona, kunsizi nako kuli amakala ya moto akoca ivintu. Lino yene yatacili yafike, impanga yali wa muyanda wa Edeni. Lelo lino yafumilemo, yasangwike iya wa lwanga, umutasile akantu nanti kamwi.

1 Petulo 1:8

Mwamutemwa nanti angala mutamulola, nupya ndakai musyamulola lelo mwamutaila. Lyene mukazanga, nga kusi mazwi angalondolola luzango lwinu lwa kutuulwa,