Ezaya 5:2 - Amazwi Yakwe Leza 2013

² Watipozile umusili, afumya mwenemo amawe nga alemamo na matingi asuma wakwe cimwi. Alino akuulilila ni cimpinda, nga alino afukula nu mwakufenelamo amatingi. Alino atandika nu kulolela apakuti iviseekwa vikace. Lelo iviseekwa navyo viza vyaya sile ivikantuke.

Ezaya 5:2 ပူးပေါင်းရင်းမြစ်များ

2 Samueli 7:10

Ndalondela antu yane icifulo cisuma. Ndayalasika cakuti nayo ali muno yalasyalilila umu cifulo kwene cico. Kusi umuntu aalayafumya mwenemo. Aipe nayo yatalatwalilila uku yacuzya wakwe vino yacitanga mpiti,

Neemiya 13:15

Pa nsita kwene ilya nga ndola antu mu mpanga yakwe Yuda yakuponda nu kufena amatingi pa Sabata. Nga na yamwi ala yakukolonganika nu kutulika ingano mu mitumba ala yakuomvya yapunda. Yamwi nayo ala yakusenda waini, matingi, misamvu, alino ni viya vya misango misango, ala yakuleta ku Yelusalemu pa wanda wi Sabata kwene. Alino njakalipila kuti yataezya kukazya vyakulya pa Sabata.

Masamu 80:8

Awewe walemwile umutingi umu Eguputo wiza wazinga imitundu umu mpanga yao, amuno wiza waulema.

Masamu 80:9

Umauselelela umu mbali apakuti wakula ningo. Imisisi yakweo yasuka yaya pansi ningo sana. Nao ali pakuvunda, walimba impanga yonsi.

Kufuma 33:16

Ndi cakuti wewe wapita naswe, ali wensi amamanya ukuti ukazangila mu antu yako pamwi nani. Cii cilalanga ukuti twaiyela ku antu amu nsi, ndi wewe wapita naswe.”

Ezaya 1:8

Umusumba wa Yelusalemu ali uno usile sile onga. Lelo nao uli wa kang'anda kakwe malonda kano kaya sile konga umu calo ca matingi. Nanti wa cisao cino caya umu calo ca viimbi.

Ezaya 5:7

Aina Izlaeli ali calo ca matingi cakwe Yawe Wamaka yonsi, nga Ayuda nayo ali matingi kwene yano wene walima. Wene walolelanga kuti alole ndi cakuti yamacita ivilungame. Lelo yene yatandika ukukomola antu! Walolelanga kuti alole kuno yamacita ivilungame. Lelo wene uvwanga sile impoma zya antu yauze yano yafyengelekezyanga!

Yelemiya 11:17

“Anene kwene ne Yawe Wamaka yonsi nalemile Ayuda na ina Izlaeli wa mutingi. Apilelo pene namayazanza. Aeneco kwene yamailetetela pamulandu nu uyi wao, pano alio kwene yalenzile kuti insoke pamulandu wakutuula Baali impolelwa.”

Yelemiya 2:21

Nemo walanga nakulema wa muti wa matingi uwa mbezu, ulondoloke. Lyene tala lola vino watuya! Uli wa muti wa matingi uole, uwa ciwelewele sile.

Oseya 10:1

Aina Izlaeli yakoline wa mutingi utambilile uno ukaseeka iviseekwa ivivule. Lino cuma cao casanduluka, nayo yakuula utuvuwa natuze. Lino impanga yao yaya nu longo, nayo yalundulula ukuyemvya vipilala vyao vya kupepelapo.

Mika 4:8

Lyene nawe we Yelusalemu, we lupungu lwakuwakilapo imfwele zyane, umwamba wa antu yane, utesi wako uwampiti ulya ulaweziwa kunuli. Uwene uwa uliza ku antu aku Yelusalemu.

Mpendwa 23:9

Kwene nga nafindamila mu lwema ulutali nkuyalola. Nkuyalola ukufuma pa myamba papela. Yene uluko luno lwikala longa ntalwentalwe. Yene yamanyile vino yapolelelwa ukuluta inko zyuze izyasyala.

Mateo 21:19

Lyene lino walola musamvu uwali umu mbali ya museo, ayako, lelo atazanyileko vizao, suka sile mafwa. Alino aunena ati, “Kufuma ndakai utakaseeke vizao nupya.” Lilyo kwene musamvu uma.

Mateo 21:33

Yesu ayanena ati, “Uvwini mulumbe nauze. Kwali umuntu umwi uwa kweti impanga, muno walimile calo ca matingi apindila ni cimpinda. Lyene aimbamo ni ciwina ca kufenelamo matingi, nga akuula nu lupungu. Alino apanzisya icalo cakwe ku alimi, nga apita ku mpanga ya kutali.

Mateo 21:34

Lino nsita yakuzombola yafisile, atuma aomvi yakwe ku alimi kuti yakatole mulingo wakwe uwa vizao vya matingi.

Mako 11:13

Lyene lino walola musamvu ulembe katalamukila, nga ayako kuti akalole ndi angazanako masamvu. Lelo lino wafikapo, atazanyileko vizao suka sile amafwa yatupu, pano itali nsita ya kuseeka kwa masamvu.

Mako 12:1

Lyene Yesu avwanga kunoyali mu milumbe ati, “Kwali umuntu uwalimile icalo ca matingi apindila ni cimpinda. Lyene aimbamo ni ciwina cakufenelamo matingi, nga akuula nu lupungu. Alino apanzisya icalo cakwe ku alimi nga apita ku mpanga ya kutali.

Mako 12:2

Lino nsita yakuzombola yafisile, atuma muomvi wakwe ku apanzi kuti akatole mulingo wakwe uwa vizao vya matingi.

Loma 9:4

Yene antu yakwe Leza yano wasolola kuti yaye ana yakwe, nga nu kusokolola lulumbi lwakwe kunoyali. Leza wacisile cipangano nao nu kuyapela Masunde. Wayasambilizye vino yangamupepa mucumi. Wafikilizye malayo yakwe kunoyali.

1 Kolinto 9:7

Uzye musilika cii wino akaizanila umwisikulu vilondwa vyakwe? Uzye mulimi cii wino asyalya vilyo kufuma mu calo cakwe? Uzye mucemi cii asyaomvya iziya kufuma ku viteekwa vyakwe?

Malango 32:6

Uzye icumi ali vino mungacita kuli Yawe, mwe viwelewele vya antu, mwe mbutuma mwe? Ala wene ali so, uwa muumvile, uwamucisile ukuya uluko.

Yakapingula 16:4

Lino papita insita, Samusoni yiiza yatemwana nu mwanaci wino yatemile izina yati a Delila, wino wikalanga mu Cifoloma ca Soleki.