Ezaya 2:8 - Amazwi Yakwe Leza 2013

⁸ Utuluwi mu mpanga yao twatituvulisya, lyene yakufukamila imilimo yao, aino yakupepa, yakufukamila ni vintu vino yaipangila ku minwe yao.

Ezaya 2:8 ပူးပေါင်းရင်းမြစ်များ

1 Yamwene 16:7

Ukulunda pali vivyo, Yawe anena kasema Yeu umwana umonsi wakwe Hanani kuti akanenole Baasya pamwi na amu ng'anda yakwe ukuti, pamulandu wa viipe vyonsi vino wene wacita pa manso yakwe Yawe. Wene walenzile Yawe ukusoka pakucita vivyo, ndi vino ang'anda yakwe Yeloboamu yacisile, na pamulandu wakuti wene ononyile ang'anda yakwe Yeloboamu yonsi.

2 Yamwene 17:10

Apapela ya milundu yonsi nu mwisika lya vimiti ivikulu ivya matesi, monsi iyakuula utuvuwa twa mawe nu unkolanya wakwe kaleza kanaci ka Asyela.

2 Yamwene 17:16

Yonona amasunde yakwe Yawe Leza wao yonsi, yapanga ivimumbwa vya ng'ombe, yacipambasi yaili avyela, avino yamafukamila nu kupeela ntaizyo kuno vili. Yapanga nu unkolanya wakwe kaleza kanaci ka Asyela, nu kupepa intanda nu kuombela Baali.

2 Milandu 27:2

Wene wacitanga ivintu ivisuma pa manso yakwe Yawe, ndi vino isi Uziya wacitanga.

Ezaya 17:8

Yatalatala yaswilizye ukutaila mu tuvuwa, nanti ukusakamala amaunkolanya yakwe Asyela nga nu tuvuwa twakocelapo ubani, tuno yaikuulila aeneco na makasa yao.

Ezaya 26:13

We Yawe Leza witu, nanti angala twatazile tumateekwa na yamwene yauze, lelo awewe wenga mpo tukacindika izina lyako.

Ezaya 37:19

Twalola na vino yakaoca utuluwi tuleza twao, icakuti mucumi asi tuleza foo. Ivinkolanya vino aeneco yaipangila uku vimuti nu ku mawe, uku minwe yao.

Ezaya 40:19

Leza wene ataya wa kaluwi kano kangapangwa na yafundi nanti kasula wa vyela wakuti aengululeko zaabu alino nu kumuteeka pa cikalilo cakwe siluva?

Ezaya 41:29

Endi, tuleza tuluwi tonsi utuwelewele. Twene tutangetucitepo icintu nanti cimwi. Ivinkolanya vyonsi vii, ivikacita antu ivya uwelewele. Vyene ivinyukuntike, na maka yakucita cimwi, yavilye.

Ezaya 57:5

Amwemwe kwene mwemuno mukucita ivya uwelewele umu miti, imitelebinte nu mu miti yonsi ivumbilikizye. Mwemuno mukaoca ana inu impolelwa umu mikonko nu mu mipokapoka ya mawe.

Yelemiya 1:16

Ndakalipila antu yane nu kuyapingwila uyi uyi apa kwifya kwao. Yene yatiyansangukila, yakocela tuleza tuze ubani nu kupepa ivicitwa vya minwe yao.

Yelemiya 11:13

Utuluwi kwene tuno antu amu Yuda yakwata twalingana ni misumba ino yakwata, nga aikazi amu Yelusalemu nayo yakuula utuvuwa utwakutuulila Baali impolelwa, kaleza kapupane, nato twalingana sile ni miseo yamu musumba kwene uu.

Yelemiya 2:28

Tuleza tuno wapanzile we mweneco tuli kwi? Leka tukatuke, tulole ndi cakuti tungakutuula umu nsita ya ntazi zyako, pano kwene tuleza twako, we Yuda, awe cumi twavulisya. Caya sile icili conga ni misumba yako pamwi nu tuvuwa twakwe Baali. Kwati sile imiseo yamu Yelusalemu.

Oseya 12:11

“Lelo antu yakupepa utuluwi ku Gileadi. Yayo akapepa utuluwi tuto yalafwa. Yene yakapela impolelwa uku Giligali, lelo utuvuwa twao kuku tulaongololwa tuye wa mutumba wa mawe umu musonso.

Oseya 13:2

Na ndakai kwene yacili yakutwalilila ukwifya. Yakaipangila utuluwi twakwe siluva, amaunkolanya ya vyela yano yapangwa ningo, yano antu yetetwile nu kupanga na makasa yao. Lyene yavwanga yati, “Pelini impolelwa kunoyali, tonsolini utuluwi tuu utwaya mu musango wakwe yacipambasi.”

Oseya 14:3

Aina Asilya yatangatutuula, ni mfwalasi zya nkondo zitangatucingilila. Vino twapanga uku makasa itu tutalatala twame tuti, ‘Leza witu,’ pano wewe waya na mizu ku ana asyale.”

Oseya 8:6

Kawaza uwamu Izlaeli aliwe uwapanzile unkolanya uo, asi Leza awe. Unkolanya waku Samaliya ulaputolwa mu tupimfya.

Mika 5:12

Ndonona amalele inu yonsi, nga pakasi kinu patalaya yakasapoola.

Milimo 17:16

Paulo walolelanga Sailasi na Timoti mu Atena, cimucuzya mu mwenzo pa kulola vino umusumba wazilemo tuluwi.

Malango 4:28

Kuku kwene akuno mulatumikila tuleza utwapangwa na antu, tuleza utwapangwa ku miti na mawe, tuno tutangalola nanti ukuvwa, tuno tutangalya nanti ukununsya.

Umbwilo 9:20

Antu yonsi asyala yano atakomilwe ku vilumbelo vii, yatazenzwike ku milimo ya makasa yao. Yene yatatile kupepa mipasi yankota, nanti tuluwi twakwe zaabu, siluva, nanti mukuwa, nanti twa mawe, nanti twa vimuti tuno tutange tulole nanti kuvwa nanti kupita.