Danieli 9:27 - Amazwi Yakwe Leza 2013

²⁷ Kateeka wilya alacita cipangano ningo na antu avule pa myaka cinimbali, nga lino citika wa nsita ii wapita, wene alaleta impela ku kupeela kwa mpolelwa na mawila. Caononyi Cawinyi cene cilimikwa pa kansonsi ka Ng'anda ikulu yakwe Leza nga cilasyala papa kwene ukufika lino impela ino Leza wamuteyanyizizya ilafika.”

Danieli 9:27 ပူးပေါင်းရင်းမြစ်များ

Ezaya 28:15

Mwemo mukuyuvwa ukuti mukauvwana ni mfwa, mukuti mwapangana ni mpanga ya afwe. Mwemo mwasininkizya ukuti lino icinkunka ciliza, mwemo citalamukuma foo. Pano mwikalilila sile ufi nu ucenjenzi apakuti ali vino vyamupokololako.

Ezaya 28:22

Ali cino fwandi mwemo mutaseka kwati ivintu vimwi ivyamyawe, vino nemo nkumunena! Ndi cakuti mumacita vivyo, awe cumi cilamucuzya ukulola umwakupusukila. Nemo ne Ezaya natinjuvwila kuno umusambazi Umwene Wamaka yonsi akupanga ukonona insi yonsi.

Ezaya 42:6

“Ne Yawe awewe wemuno naama apakuti ulole ukuti vyaololoke vyacitwa pano nsi. Ndakulemelela apikasa nu ku kusunga, kuti uye icipangano ku antu, kuti uye luswepo lwakuyengesela Akulukuwa.

Ezaya 53:11

Apacisila ca macuzi yakwe, nupya angaca alole ukusansamuka, nu kusininkizya ukuti fwandi ataicuzizye sile foo, apakucula. Umucumi umuomvi wane umusuma nu kucula fwandi waculila aingi apakuyasenula asuma.

Ezaya 55:3

Teini amatwi mwize kunondi, munguvwe pakuti imyenzo inu isyukile uumi. Namapangana namwe upangano wa pee, uwaluse uno nalavile Davidi.

Yelemiya 7:30

“Antu yakwe Yuda yatiyacita iviipe pa manso yane. Ivyalanda ne Yawe. Yene yatiyika ivyauwelewele vyao, ivya muselu mu Ng'anda yane ikulu nu kuikowezya.

Danieli 11:31

Asilika yakwe yamwi yalakowezya Ng'anda ikulu yakwe Leza. Yalaleka antu yate kupeela impolelwa zya cila wanda nga yimike ni Cawinyi ca Ononyi.

Danieli 11:36

“Umwene waku Silya alacita ndi vino akasi. Wene alaitakizya ukuti umukulu kuluta Leza ali wensi, nupya alusile Leza Wapapelapela. Wene alacita cico ukufika lino Leza alamuvunuka. Leza alacita ndi mumu kwene muno wetetwile ukucita.

Danieli 12:11

“Ukutandikila sile lino ukupeela kwa mpolelwa zya cila wanda kulasila, kuli kuti, ukutandikila sile apa nsita ya cintu caononyi cakoofya, amanda 1,290 yalapita.

Danieli 7:25

Wene alavwanga amazwi yamiponto kuli Leza Wapapelapela nu kuzunya aswepe yakwe. Wene alezya kusenula insita na masunde ya upefi, nga antu yakwe Leza yalaya mu makasa yakwe apa myaka itatu na citika.

Danieli 8:13

Lyene nuvwile umungeli wenga akuuzya umuze ati, “Uzye ivintu vii ivyalolike mu cilolwa vimatwalilila ukufika lilaci? Uzye ukufika lilaci lino uyi wakofya ulatwalilila umu cifulo ca kupeela impolelwa zya cila wanda? Uzye amu mayulu kumwi ni Ng'anda ikulu yakwe Leza yalalyatolwa ukufika lilaci?”

Oseya 3:4

Kuli kuti aina Izlaeli yalikala amanda avule ukwaula kukwata umwene nanti intunguluzi, ukwaula kupeela impolelwa nanti kukwata incende zyakupepelamo, ukwaula utuluwi nanti amaunkolanya akuomvya umu kusapola.

Mpendwa 7:62

Alino ni mbale yonga yakwe zaabu ino tungati yanyomile kota wenga wakwe kilogalamu, umwali ubani.

Mateo 24:15

“Mulalola ‘Ca winyi ca ononyi’ cino kasema Danieli wavwanzile, cimilila mu Ng'anda ikulu yakwe Leza.” (Kawelenga ailuke vino ci cikusenula.)

Mateo 26:28

Uu uwazi wane, uno Leza watama insimbi pa upangano, uno wapongololwa pamulandu wa antu aingi, kuti maifyo yao yelelwe.

Mateo 27:51

Lilyo kwene cisalu camu Ng'anda ikulu yakwe Leza cilepuka pakasi kufuma papela kufika na pansi. Insi nayo isunkana kuya cilundumusi, nga nu lwala nalo lulepoka.

Mako 13:14

“Lelo lino mulalola ‘Ca winyi ca ononyi’ cimilila pa cifulo cino citalinzile kuyapo.” (Kawelenga ailuke vino ci cikusenula!) Lyene yonsi ali mu Yudeya yakuutukile ku myamba.

Luka 21:20

“Lino mulalola musumba wa Yelusalemu waliziwa ni vita, lyene mukamanye vino uli pipi nu kononwa.

Luka 21:24

Yamwi yalakomwa ku mpaanga nu kusendwa mu uzya ku nko zyonsi, nga na Yelusalemu alalyatolwa na antu atataila Leza kufika lino kasita kao kalasila.

Loma 11:26

Vii, ali vino aina Izlaeli yalatuulwa. Ndi vino calembwa mu malembelo cati, “Katuula alafuma mu Zioni nu kusisya ukakasi onsi kufuma pa vizikulula vyakwe Yakobo.

Loma 5:15

Lelo ya yaili yasi ali yamwi, pano uwila wakwe Leza utangakolana ni iifyo lyakwe Adamu. Iifyo lya muntu wenga ilyaleta imfwa pa antu aingi. Lelo cikuku nu wila wakwe Leza ivikulu cuze, pano vyaleta upolelelo ku antu aingi. Nu wila uno Leza wapela, umuntu wenga sile Yesu Klistu.

Loma 5:19

Ndi vino antu aingi yaya akaifya pamulandu wa kuntayela Leza kwa muntu wenga, mu musango uli onga kwene antu aingi yalacitwa kuya aololoke pa manso yakwe Leza pamulandu wa kuyela kwa muntu wenga.

Ayebulai 9:28

Mu musango uli onga Klistu wapilwe kuya impolelwa yakufumya maifyo ya antu aingi. Wene alaloleka iila lyakwe ciili, asi ku kufumya maifyo, lelo ukwiza tuula yao akumulolela.