2 Samueli 8:6 - Amazwi Yakwe Leza 2013

⁶ Lyene Davidi akuula insakwe zya nkondo mu Damasiko nu kulasika asilika akwikala mwenemo nu kumuteekela impanga ilya iya Asilya. Aina Asilya iyatandika ukuteekwa na Davidi nga iyalipa ni misonko kunoli. Yawe alenga kuti Davidi acimvye konsi konsi.

2 Samueli 8:6 ပူးပေါင်းရင်းမြစ်များ

2 Samueli 10:19

Lino yamwene yonsi atontelanga Hadadezeli yiluka ukuti yatiyacimviwa ku ina lzlaeli, iyalaya ukuti yatalatala yalwe nupya na ina Izlaeli nga iyatandika ukuteekwa na alio. Alino aina Asilya lyene iyuvwa intete cakuti yatazumile nupya ukwazwilizya aina Amoni.

2 Samueli 23:14

Pa nsita ilya Davidi wali mu musumba wi linga, nga na kamba ka ina Filisti kali ku Betelemu.

2 Samueli 3:18

Lyene fwandi citini vivyo kwene. Iusyini ukuti Yawe wavwanga wati, ‘Ndaomvya umuomvi wane Davidi kuti atuule antu yane aina Izlaeli ku ina Filisti nu ku anisi yao yauze yonsi.’”

2 Samueli 5:10

Amaka yakwe Davidi yavulilangako sile, pamulandu wakuti Yawe Leza Wamaka yonsi wali nawe.

2 Samueli 7:9

Nayanga nawe konsi sile kuno wapitanga. Nacimvyanga na anisi yako yonsi. Ndakucindamika ukulingana na antu acindamisye apano nsi.

2 Samueli 8:14

Wene akuula insakwe zya nkondo umu mpanga yonsi ya Edomu nu kulasika asilika akwikala mwenemo kuti yamuteekela impanga iyo. Nga atandika ukuteeka antu ya kweneko. Yawe alenga kuti Davidi acimvye konsi konsi.

2 Samueli 8:2

Lyene acimvya na ina Moabu. Anena anyepwe kuti yalambalale pansi nga akoma yaili muli cila umba lya asilika yatatu. Acino aina Moabu iyateekwa na aliwe nga iyamupeela ni misonko.

2 Samueli 8:7

Davidi apokolola ni visyangu vyakwe zaabu vino aomvi yakwe Hadadezeli yasendanga nga avitwala ku Yelusalemu.

1 Yamwene 4:21

Uwene wakwe Solomoni watandikile ku Luzi lwa Yufulate mpaka nu ku mpanga ya ina Filisti, ukufika nu ku mupaka wa Eguputo. Antu amu mpanga zii yasonkanga imisonko kuli Solomoni nu kumutumikila amanda yonsi ya umi wakwe.

2 Yamwene 1:1

Pacisila ca mfwa ya mwene Aabu, aina Moabu yasangukila aina Izlaeli.

2 Yamwene 14:28

Ivintu vyuze vyonsi vino Yeloboamu wacisile, ni milimo yakwe yonsi, na vino watukwite ivya vita, ukwika penepo na vino wapokolwile nu kuwezezya aina Izlaeli umusumba wa Damasiko nu wa Hamati, iyali iyakwe Yaudi, vyalembwa mu lupapulo lwa Milandu yakwe Yamwene aku Izlaeli.

2 Yamwene 18:7

Fwandi Yawe nawe ali pakuya nawe. Nu kusyuka ali cino wasyukanga muli vyonsi vino wacitanga. Wasusile wasangukila umwene waku Asilya, wata nu kumucindika.

2 Yamwene 3:4

Lyene Mesya, umwene waku Moabu, wateesile imfwele, nga cila mwaka wapelanga umwene waku Izlaeli ana ya mfwele 100,000 nga na mavumbu ukufuma kuli yasuuku 100,000.

1 Milandu 18:13

Alino Davidi aika impuka zya asilika umu mpanga ya Edomu, nga aina Edomu yonsi yatandika ukutumikila Davidi. Yawe aleka kuti Davidi acimvye konsi kuno wapitanga.

2 Milandu 17:2

Wafyantike ivita vyakwe monsi kwene umu misumba ino Asa wasile wapokolola umu mpanga yakwe Efulemu.

Masamu 140:7

We Yawe Simwandalali, umukuluzi wane uwamaka, awewe ukancingilila umu wanda wa ulwi.

Masamu 60:10

Uzye kwene umolimo Leza watututazyela? Uzye kwene usikwiza uye naswe ni vita vitu?

Mapinda 21:31

Umuntu angateyanya mfwalasi yakuya lwisizyako inkondo, lelo Yawe wenga mpo aliwe akapeela ucimvyo.

1 Samueli 13:3

Yonatani wacimvizye inkambi ya ina Filisti ku Geba, nga na ina Filisti iyuvwa pali cii. Lyene Saulo pali pakulizya intandala umu mpanga ilya yonsi avwanga ati, “Lekini Ayebulai yonsi yuvwe!”

1 Samueli 14:1

Uwanda umwi Yonatani umwana wakwe Saulo anena umulumendo umusenda mpamba wakwe ati, “Twende tuye ku ina Filisti kuku ku lusansa luze.” Lelo Yonatani atanenyile isi,

1 Samueli 14:15

Fwandi lyene intete izilema ivita vyonsi ivya ina Filisti ivyali mu nkambi kumwi na vivyo ivyali mu mpanga, na yayo alwisyanga. Umusili nao iwatenta. Cali icakoofya icakuzunguka ukufuma kuli Leza.

1 Samueli 14:6

Yonatani anena umusenda mpamba wakwe ati, “Iza, tulambuke tuye ku nkambi iya viyantu vivi vino vitasilamulwa. Limwi Yawe angatwazwa. Pano kwene kutaya nanti cimwi icingalesya Yawe ukutupeela amaka ya kucimvya, ciye tuvule nanti tucepe.”