2 Milandu 7:1 - Amazwi Yakwe Leza 2013

¹ Walanga sile umwene Solomoni wamala ukupepa, umoto ufuma nu kwi yulu, oca ivyamawila vino yalanga yatiyapeela nga lyene nu ucindami wakwe Yawe uyengese wiza ulimba Ng'anda ikulu yakwe Leza yonsi.

2 Milandu 7:1 ပူးပေါင်းရင်းမြစ်များ

Utandiko 15:17

Lino ilanzi lyawa na kakuku katola, mu kupumikizya kuloleka icinga icikusuka umoto ni cisonsololwa cikwaka, vii vyoili ala vili pakasi ka vimpilinsya vya nyama zizi.

1 Yamwene 18:24

Alino muleke yakasema yaa yakwe Baali yapepe kuli kaleza kao. Nani namapepa kuli Leza wane, nga Leza wino amaasuka nu kutuma umoto, ale aliwe ali Leza wacumi.” Antu nayo pakwasuka iyapundila ca pamwi yati, “Endi, wavwanga ningo!”

1 Yamwene 18:38

Lyene Yawe Leza ali pakulenga kuti umoto upone pa kavuwa, iwoca impolelwa, inkwi, amawe nu musili, nga iumika na manzi yaya ali mu kamufolo.

1 Yamwene 9:1

Lino Solomoni wamala ku kuula Ng'anda ikulu yakwe Yawe nga ni sano, nga na vyonsi vino wakasi ku kuula,

1 Milandu 21:26

Davidi akuulila Yawe kavuwa kuku kwene nga aocelapo amawila yakoca na autandano. Apepa kuli Yawe, nga Yawe nawe amwaasuka apakutuma umoto ukufuma mwiyulu, nga uponela pa kavuwa ka mawila yakoca.

Masamu 26:8

We Yawe, nemo natemwa ukwikala umu ng'anda yako, umu cifulo cako umwazula ucindami wako.

Kufuma 19:18

Mwamba wa Sinai onsi ala watiuvimbwa ni cunsi pamulandu wakuti Yawe ala wataika pansi mu moto pa mwamba papela. Icunsi ciya umwiyulu wa cunsi cino cikafuma mwi lungu, nu mwamba onsi iutenta na maka.

Kufuma 29:43

Kuku kwene akuno ndakomenkana na ina Izlaeli, nupya incende kwene iyo ilaya iziliziwe nu ucindami wane.

Ezaya 65:24

Ndayaasuka lino yatacili yangame, ndayuvwa na lino yatacili yamale ukuvwanga.

Ezekelo 43:5

Umupasi wakwe Leza pali pakunkatusya nu kuntwala mu musolo wa mukasi, nga nu ucindami wakwe Yawe iuzula mu Ng'anda ikulu yakwe Leza.

Ezekelo 44:4

Alino umuntu wilya ampisya umu mpongolo yaku katutu andeta ku nkolelo ya Ng'anda ikulu yakwe Leza. Nalolekesya nazana nu kuti ucindami wakwe Yawe wati uzula Ng'anda ikulu yakwe Leza, alino impona pansi mfupime.

Danieli 9:20

Lyene ntwalilila kulanda nu kupepa, ala nkuilongwela amaifyo yane na maifyo ya antu yane aina Izlaeli nga nu kupapata uku Mwene kuti awezezye Ng'anda yakwe ikulu vino yali.

Malaki 3:4

Lyene amawila ya antu amu Yuda nu mu Yelusalemu yano yakaleta yalazanzya Yawe, ndi vino yamuzanzyanga uku mpiti.

Milimo 4:31

Lino yamala kupepa, ng'anda ino yakonganilemo itenta. Onsi yazuziwa na Mupasi Wamuzilo, alino yatandika kukosola ilandwe lyakwe Leza nu kuposya.

Umbwilo 21:23

Kuwala kwi lanzi nu mwezi kusyalondekwa mu musumba ukulu, pano lulumbi lwakwe Leza lukayengesa mwenemo, nga nu Mwana wa Mfwele ali lampi lyauko.

Yakapingula 6:21

Lyene umungeli wakwe Yawe avungulula ikasa lyakwe nga akatusya insongo ya ntuwa ino walemile, akumya ku nyama nu ku mukate usi na citutumusi. Alino umoto iufuma mwi we nu koca inyama yonsi kumwi nu mukate. Lyene umungeli wilya pali pakongoloka.