2 Kolinto 4:16 - Amazwi Yakwe Leza 2013

¹⁶ Swemo tusyanenuka. Mili itu ikucucuka, lelo sweisikulu tukukomeleziwa mu myenzo cila wanda.

2 Kolinto 4:16 ပူးပေါင်းရင်းမြစ်များ

Masamu 119:81

Umi wane wati uongoka apakulonda ukuluzi wako, lelo nemo nkapaalila umu ulayo wako.

Masamu 27:13

Ukuya kwene nemo nazumila ukuti ndikala pano nsi, mpaka sile ince ndole usuma wako we Yawe.

Masamu 51:10

We Leza, mpeko umwenzo wa kuyela uwike munondi umwenzo upya uposye.

Masamu 73:26

Nanti sile umwili wane nu mwenzo wane vingatontenkana, we Leza, wewe uli maka yane, awewe nkalukisya pee!

Ezaya 40:29

Leza wene aliwe akakomelezya yano yacepelwa amaka, na yano yatonta kwene.

Ezaya 40:31

Lelo kuli yayo akataila muli Yawe awe cumi yene amaka yao yakaweluluka. Yakakatuka na maka wakwe lyang'anda, na lino yavulumuka ulwilo yasitonta. Na lino yakupita sile, nalyo kwene amaka yao yasisila.

Yelemiya 45:3

‘Wemuno ukailizyanya uti, kalanda kasikolo ala nsyame mwe! Nemo Yawe akandundila sile ucuzi apa macuzi yane. Nintonta sana muno nkuteta, nsikukasula nu utulo!’ ”

Luka 11:3

Utupeele cila wanda ivyakulya vitu vya manda pe.

Loma 12:2

Mutakolana na antu amu nsi mu miyele yao, lelo lekini Leza apindulule myenzo inu kuti myelenganyizizye inu iye ipya. Lyene mulaya na maka akumanya kulonda kwakwe Leza, mulamanya vintu visuma pamwi ni vikamuzanzya.

Loma 7:22

Kwene mwenzo wane onsi ukazumilizya Masunde yakwe Leza.

1 Kolinto 15:58

Caleka, mwe inane akundwe, komelikini nupya tekelini mutanenuka. Cincilini lyonsi lino mukutumikila Mwene. Mwamanya ukuti mukuombela Mwene mutaya kucula sile.

2 Kolinto 12:15

Acino nemo ndapela ni nsansa vyonsi vino nakwata pamwi nu umi wane. Namutemwa cuze, uzye lyene mwemo mumantemwa panono?

2 Kolinto 4:1

Leza mu mizu yakwe watupela mulimo uu kuti twaomba. Acino tusyatonta.

Efeso 3:16

Nkalenga ukuti Leza, kulingana nu kucindama kwa ukama wa cikuku cakwe, amukomye na Mupasi wakwe kuti muye akomeleke mu myenzo.

Efeso 4:23

Myenzo inu nga na yakampingu inu viye vipya,

Kolose 3:10

nupya mwati mwingila mu umi upya. Ndakai mukulunduluka mu kulolana na kaumba winu pakuti mumumanyikisye ningo mu ufumaluke.

Tito 3:5

wene watutuuzile. Citali apamulandu wa vicitwa visuma vino twacita, lelo apamulandu wa mizu yakwe umwisikulu acino watutuulile. Wacisile cii pa kutufula mu maka yakwe Mupasi Wamuzilo, wino uwatulenga kuvyalwa cipya cipya nu kutandika umi upya.

1 Petulo 3:4

Lelo kuyemba kwinu kulinzile kuya ukwa mukasi kinu, ukwa kukwata myenzo ifuke nupya itekele manda pe. Pa manso yakwe Leza cii icili campomvu kuluta.

1 Petulo 4:14

Alongo amwemwe ndi cakuti antu yamutuka pamulandu wakulondela Klistu. Cii cikulanga ukuti Mupasi wa lulumbi, Mupasi wakwe Leza ali namwe.