1 Samueli 17:26 - Amazwi Yakwe Leza 2013

²⁶ Davidi auzya aonsi aimi pipi na aliwe ati, “Uzye icani cino yali nu kucitila umuntu alakoma umwina Filisti wi, pa kufumya akalanda nu kuzewana kwa ina Izlaeli? Umwina Filisti wi, wino atasilamulwa, icani cino angacuzizya ivita vyakwe Leza wa umi nu kuvituka?”

1 Samueli 17:26 ပူးပေါင်းရင်းမြစ်များ

2 Yamwene 19:4

Umwene waku Asilya watatuma umukalamba wa vita ku kwiza tukananga intusi kuli Yawe Leza waumi. Fwandi Yawe Leza wako anguvwa intusi zizya apakuti apezye antu yaya yakatukana. Wemo lenganga sile Yawe apakuti angapususya antu itu yano yasyala penepo.”

2 Milandu 32:17

Senakelibu walemvile yakalata nayauze umwali amazwi akusausya Yawe, Leza wa ina Izlaeli, ala akuti, “Tuleza twa nsi zyonsi tutatala twatuula antu yatuko nanti yamwi mu makasa yane, vivyo kwene nanti a Leza wakwe Hezekiya kwene atalatuula antu yakwe mu makasa yane.”

Neemiya 5:9

Ali cino nani nkumunena inti, “Cino mukucita citazifile foo. Uzye musikulonda mwapita na antu akwatila Mwene Leza witu coopo apakuti mutaleka intusi zyafuma pakasi ka anisi itu atupata?

Masamu 44:13

Ainipamba nga yalola vino watucitila lyene pasi pakutusoweka.

Masamu 74:18

Waiusya, we Yawe, ukuti anisi yako yakukuseka, nga ni viwelewele vikukusausya.

Masamu 79:12

We Mwene, ala apa misuula yonsi ino ainamasi yakusuula, wemo uyawezezye amaila cinimbali.

Ezaya 37:23

Uzye aweni wino wemo ukatuka nu kusausya? Uzye aweni wino wemo ukuzaukila nu kumutumbila inkansi? Ala asi muntu muze, lelo anene, Wamuzilo wilya wakwe Izlaeli.

Yelemiya 10:10

Lelo wemo Yawe, wewe uli Leza wacumi. Wewe uli Leza waumi, nupya Mwene wa pee. Lino wasoka, insi ikatenta. Antu amu nko zyuze yatangazizimizya ukali wako.

Yelemiya 9:25

Yawe nupya avwanga ati, “Insita imwi iliiza lino nemo ndavunuka antu yonsi, yano yasilamulwa sile uku mwili. Antu yaa yonsi yasilamulwa, lelo ukwaula kusunga upangano uno cimililanga.

Yelemiya 9:26

Antu yayo ali ina Eguputo, na ina Yuda, na ina Edomu, na ina Amoni, na ina Moabu nga na yonsi aikala mu lwanga, yano yakapela inkuuzu lwa pa mausyu yao. Kusi nanti wenga pa antu yaa nanti umwina Izlaeli kwene wino wasunga upangano wane.”

Ezekelo 28:10

Wemo ulafwa wakwe simbwa, ainamasi yayo atamanya ne Leza, yalakukoma. Ee, anene ne Yawe nakunenelapo nu kukukonkomezezya penepo.”

Danieli 5:23

Wemo wasangukile Umwene wa mwiyulu. Wapile ilamulo kuti yakuletele ingako ni ngeso ukufuma mu Ng'anda ikulu yakwe Leza. Alino wewe, na yacilolo yako, na aci yako, na aci yako apa mbali yamwelile waini mu viya vii nu kulumbanya tuleza utwapangilwa na siluva na zaabu, nu mukuwa, ni cela, ni mbao nga na mawe, vivyo ivitangalola nanti ukuvwa. Lelo utacindike Leza wino wafumbata umi wako umwi kasa lyakwe kumwi na vyonsi vino ukacita.

Danieli 6:27

Wene akapususya nu kutuula. Wene akacita ivizungusyo ni vinjelengwe. Wene watatuula Danieli kuli yacisama yatamukoma.’”

Danieli 9:16

We Mwene, uku mpiti watupokololanga, acino utatwalilila ukusokela Yelusalemu. Ala Yelusalemu umusumba wako, umwamba wako wamuzilo. Amaifyo itu ni nkota zya vikolwe vitu ivyalenga kuti antu atuzingulwike yasoweka Yelusalemu kumwi na swe antu yako.

Yowelo 2:19

Yawe aasuka antu yakwe ati, “Namamutumila ingano, ivyakumwa na mafuta, nupya mulikuta cuze. Ntalazumilizya nupya kuti ainamasi yamuwele nu kumutumfya.

Malango 5:26

Uzye kwatala kwaya umuntu umwi uwatala uvwa izwi lyakwe Leza wa umi akuvwanga ukufuma mu moto, nga pacisila atwalilila ukuya umupuma?

1 Tesalonika 1:9

Antu yaya yonsi yakulanda pa kuzengela kuno mwatuzengile, nga na vino mwazenzwike ku kupepa tuluwi nu kutandika kutumikila Leza wa cumi nupya uwa umi.

Yoswa 3:10

Lino mulaya pankolelo, wene atalaposiwa ukumuzingila aina Kenani, aina Hiti, na ina Hivi, na ina Pelizi, na ina Giligasi, na ina Amoli nga na ina Yebusi. Vii avino mulamanya ukuti Leza wa umi ali pakasi kinu

1 Yoane 5:20

Twamanya ukuti Mwana wakwe Leza wiza nupya uwalenga kuti tumanye Leza wa cumi. Swemo tukaikala muli Leza wa cumi, na muli Yesu Klistu Mwana wakwe. Wene ali Leza wa cumi nupya aliwe akatupeela umi wape.

1 Samueli 11:2

Nawe Naasyi umwina Amoni aasuka ati, “Kwene ukupangana tungapangana cipangano, lelo suka sile intale intonkole cila muntu apakasi kinu ilinso ilya kuli ndilo, pakuti ciletele aina Izlaeli umuzewanya.”

1 Samueli 14:6

Yonatani anena umusenda mpamba wakwe ati, “Iza, tulambuke tuye ku nkambi iya viyantu vivi vino vitasilamulwa. Limwi Yawe angatwazwa. Pano kwene kutaya nanti cimwi icingalesya Yawe ukutupeela amaka ya kucimvya, ciye tuvule nanti tucepe.”

1 Samueli 17:10

Lyene umwina Filisti avwanga ati, “Ilelo nemo ivita vya ina Izlaeli natimvisuula wakwe cimwi! Letini umuntu wenga uwakuti tulwe nawe.”

1 Samueli 17:30

Lyene Davidi asenukila ku muntu muze atandika ukulanda nawe, ale akumuzya ivili vimwi kwene, na antu nayo ale yakumwasuka wakwe vino yaswike pankolelo.

1 Samueli 17:36

Nemo nakoma yacisama ni vinyama ivyakolana ni viuli, nga ndacita icili cimwi kwene ku mwina Filisti wii atamanya Leza, nupya wino wasausya ivita vyakwe Leza.

1 Samueli 31:4

Alino Saulo anena umusenda mpamba wakwe ati, “Somola ulupanga lwako untote sile imfwe ukuluta kuti iviyantu vii ivitamanya Leza vize mu kunseka nga vinkome.” Umusenda mpamba nawe pali pakukana sana, pano wali ni ntete izya kucita cico. Acino Saulo pali pakutoola ulupanga lwakwe apona penepo aitota nga afwa.