1 Samueli 12:22 - Amazwi Yakwe Leza 2013

²² Pasi pano pamulandu wakucindika izina lyakwe ilikulu Yawe atalamutazyela awe, pamulandu wakuti wene walapa nu mulapo ukuti amamucita ukuya antu yakwe kololo.

1 Samueli 12:22 ပူးပေါင်းရင်းမြစ်များ

1 Yamwene 6:13

Nemo lyene ale namaikalanga pakasi ka antu yane mu Ng'anda ikulu yakwe Leza iya kwene iyakupepela mwenemo, ino ukunkuulila. Nupya ale ntalatala intazyele antu yane aina Izlaeli.”

1 Yamwene 8:57

We Yawe Leza witu sungala walukuya naswe, wakwe vino wayanga ni vikolwe vitu. Cingazipa ukuti utatutazyela nanti ukutufutatila.

2 Yamwene 14:27

Lelo Yawe wene atalondanga ukukoma aina Izlaeli yonsi foo. Icalenzile nu kuti ayakulule ukupitila umu mwene Yeloboamu umwana wakwe Yeoasyi.

2 Yamwene 21:14

Antu aalapusunsuka mwenemo, ndayatazyela icakuti anisi yao yalayacuzya wakwe cimwi. Yalacimviwa nu kupokwa impanga yao.

1 Milandu 28:9

“Acino we mwanane Solomoni, wauvwila Yawe Leza wa vikolwe vyako, nu kumutumikila nu mwenzo wako onsi, umu kuitemelwa. Pasi pano Yawe akaceceta umwenzo wa muntu ali wensi, nu kumanya ilango ni vilondwa vitu vyonsi. Ndi cakuti wamulondalonda, ulamuzana. Lelo ndi wamufutatila, nawe kwene alakutazyela umuyayaya.

2 Milandu 15:2

Nawe ali pakuya uku mwene Asa nu kumunena ati, “Musambazi Asa, na mwe ikazi amu Yuda mwensi pamwi na ina Benjamini, nguvwini! Yawe ali namwe cikulu sile mwamutontela. Ndi mwamulonda, mulamuzana. Lelo ndi mwamufutatila, ale nawe kwene alamufutatila.

Neemiya 9:17

Ivikana ukuyela, iviilila ni vinjelengwe vino wacisile apakasi kao. Vyumalala imyenzo nu kusolola intunguluzi yakuyaswilizya mu uzya ku Eguputo. Lelo wewe Leza wa luse, uwa cikuku na mizu, asisoka zuwa. Amizu yako akulu. Acino wemo utayatazyezile.

Masamu 106:8

Lelo wene wayapuswisye pamulandu wa ulayo wakwe apakuti alanga amaka yakwe alulumbi.

Masamu 94:14

We Yawe, utange utazyele antu yako, utange usumbe antu ali yakwako mpo.

Kufuma 32:12

Uzye mukulonda kuti aina Eguputo yakavwange yati, wayafumizye mu Eguputo nu uteyanyo wakuti ukayakome ku myamba nu kuyonona yonsi pyu? Wezya umwenzo wako, utonona antu yako lelo uyelele.

Ezaya 37:35

Anene nkusunga nu kucingilila umusumba uu, apakulanga vino ne mweneco nacindama, na pa ulayo uno nalavile umuomvi wane Davidi.”

Ezaya 41:17

Lino antu yane yalalola amanzi, lino ku myenzo yao kulalangoka nu kuuma pamulandu nu lusala, nemo ne Yawe ndauvwa kuno yakumpapata. Nemo ne Leza wakwe Izlaeli ntalatala njatazyele foo.

Ezaya 42:16

Ndatungulula impafu mu miseo ino yene yatamanya, ndayatungulula umu nzila izitamanyika kunoyali. Ndasangula imfinzi ino yakapita mwenemo kuti iye uluswepo. Alino amawe amu nzila, nemo ndayafumya mwenemo, pakuti yace yapita apaswepe. Ali vino nemo ndacita nupya ntalatala mvitazyele.

Ezaya 43:25

“Nene, endi nene kwene, anene nkafuta amaifyo inu, kuti ululumbi lwane luloleke. Nemo ntalatala mupele umulandu apa maifyo inu.

Ezaya 43:7

Ya yonsi yakaamilwa kwi zina lyane, nene nayaumvile kuti yampela ululumbi, nayapanzile nu kuyapeela umi.”

Ezaya 48:11

Nacino nemo nkucitila vii, umulandu sile uwakulonda ukuti antu yandumbanye. Ntangentemwe ukuti antu yansausya, awe. Nupya ntange ntemwe ukuti muze awino yalumbanya. Awe, cipelele ukutali! Pano anene sile nenga, nemuno antu yalinzile kuti yandumbanya.”

Ezaya 49:15

Acino Yawe nawe wayaasuka ati, “Uzye kwene nyina angilila umwanakwe wino akoonka? Uzye wene angata ukutemwa umwanakwe wino waivyalila? Lelo kwene nanti angilila, nemo ntalatala imwilile.

Ezaya 63:8

Nawe Yawe ali pakuvwanga ati, “Cumi cumi yaa ali antu yakwe nene, ali ana yane yano yatalatala yansangukile foo.” Fwandi ali cino nawe wayapususya kweneko,

Yelemiya 14:21

Si ungala wiusye vino watulaya, utatusuula foo. Utazewanya umusumba wa Yelusalemu, umwaya icilimba cako ca wene calulumbi. Utonona upangano wako uno wapangana naswe.

Yelemiya 14:7

Antu yane yakundilila, yati, “Nanti angala amaifyo itu yakutusinila, we Yawe ule utwazwilizye sile ndi muno walavile. Twifya wakwe cimwi kunuli, na ucisanguka witu wapitilila.

Yelemiya 14:9

Pacani cino wayela wa muntu uwataulizya amano, nanti wa musambazi wino atakweti amaka akutupususya? We Yawe, cumi kwene wemo waya apakasi kitu? Swemo sweswe antu yako, utatutazyela, awe.”

Nyimbo zya ndosya 5:20

Uzye lyene pacani cino watwilila? Uzye pacani cino watutazyelela?

Ezekelo 20:14

Lelo nupya nasuzile sile pano nga nailetile sile nenga insonyi ku antu amitundu, alolanga kuno nayafumyanga mu Eguputo.

Ezekelo 20:9

Lelo nacindikanga izina lyane, naleka nu kuti litazewana pa manso ya mitundu muno yikalanga mwenemo. Pano nanenyile imitundu iyo inti ndafumya mutundu wane mu mpanga ya Eguputo pa manso inu.

Malaki 1:2

Yawe akuti, “Nemo natemwa mwemwe.” Lelo mwemo mukati, “Uzye mwatutemwa uli?” Yawe wavwanga wati, “Uzye Esau atali umwina wakwe Yakobo? Nemo nasola Yakobo.

Mateo 11:26

Endi Tata, cii acino walondanga kuti cicitike.

Yoane 15:16

Asi mwemwe mwansolwile, lelo nene namusolwile nu kumutuma kuti mukaseeka vizao vingi, vino vikaikalilila. Caleka Tata alamupeela consi cino mulamulenga mwi zina lyane.

Loma 11:1

Lyene nuzye, uzye Leza wafutatila antu yakwe? Awe, cumi kwene citangaya vivyo. Pano nani kwene nene mwina Izlaeli, wamu mupanda wakwe Abulaamu, nupya nene uwamu mutundu wakwe Benjamini.

Loma 11:29

Pano Leza asyasenuka pali wino wasolola nu kupolelela.

1 Kolinto 4:7

Uzye aweni uwakwisile kuya mukulu kuluta pa auzo? Uzye Leza atakupile vyonsi vino wakwata? Uzye lyene ungaitumika uli kwati cino wakwata cisi uwila?

Efeso 1:12

Wene wacisile cii, pakuti swe muno twali ankolelo kupaalila muli Klistu tulumbanye lulumbi lwakwe.

Efeso 1:6

Lekini tulumbanye Leza pa cikuku cakwe ca lulumbi, na pa wila uno watupeela mu Mwana wakwe mukundwe!

Malango 14:2

Mwemwe antu yakwe Yawe Leza winu, yano waisolwela umwisikulu pa mitundu yonsi iya pano nsi kuti muye antu yakwe kololo.

Malango 31:17

Lino cico icamwata uwo cilacitika indayasokela cuze. Indayatazyela cakuti lyene nu kuzanzwa yalazanzwa. Lino amazanzo avule yalayacitikila ali lino yalamanya ukuti ivintu vii vikuyacitikila pamulandu wakuti nene, ne Leza wao, insi nayo nupya.

Malango 31:6

Posyini nupya muzyansye. Mutezya ukuyoopa nanti ukuzakaza, pano Yawe Leza winu amaya namwe. Wene atalatala amusye nanti ukumutazyela.”

Malango 31:8

Yawe umwisikuli amamukolelelanga nupya amayanga namwe. Atalatala amusye nanti ukumutazyela. Mutuvwa intete nanti kutovoka.”

Malango 7:6

Mulinzile ukucita vii, pamulandu wakuti mwemwe yakwe Yawe Leza winu. Wene wamusolwile ukufuma mu antu yonsi pano nsi kuti muye antu yakwe aiyele.

Malango 9:5

Asi pamulandu wakuti mwemo mukacita ivyawololoke nanti kuya ni miyele isuma icingalenga kuti mwemo muyapoke impanga. Lelo pamulandu wa ukakasi wa antu amu nko zii, Yawe Leza winu alayazinga mu mpanga ilya pa manso inu, kuti afikilizye cino walavile ku vikolwe vinu, Abulaamu, na Isaki na Yakobo.

Filipi 1:6

Nupya nkusininkizya ukuti Leza, wino uwatandike mulimo usuma uu munomuli, alautwalilila kufika lino alaumala pa Wanda wakwiza kwakwe Klistu Yesu.

Ayebulai 13:5

Mwaikala umi uwa kuntatemwisya impiya, mwalola ukuti vino mukweti vyamukwana. Pano Leza wati, “Ntalatala imusye nanti kumutazyela.”

Yoswa 7:9

Lino aina Kenani pali pamwi na antu yauze akaya ya mpanga ilya yaluvwa cii, yaliza yatuzinguluke nu kutulovya swensi pano pansi. Uzye lyene wemo ulacita cani pakuti umucinzi wako ukulu utakononeke?”

1 Petulo 2:9

Lelo mwemwe mutundu usololwe, yasimapepo aku wene. Mwemwe luko lwamuzilo, nupya antu yakwe Leza yano asololwa kuti yalande vicitwa vyakwe Leza vyakuzunguka. Leza uwamwama kuti mufume mu mfinzi nga mwize mu luswepo lwakwe ulwakuzunguka.