1 Kolinto 11:26 - Amazwi Yakwe Leza 2013

²⁶ Cii cikusenula ukuti lyonsi lino mwalya umukate uu nga nu kumwa mu lwako luu ala mukulanda imfwa ya Mwene kufika lino aliza.

1 Kolinto 11:26 ပူးပေါင်းရင်းမြစ်များ

Yoane 14:3

Lyene ndi napita kukumuteyanyizizya ncende, ndawela kwiza mutola kuti kunondi akuno namwe mukaye.

Yoane 21:22

Yesu amwaasuka ati, “Ndi nkasi kuti alali kufika na lino ndiza, uzye cikupazi? Wemo ndondela.”

Yoane 21:23

Caleka mpwelo isalangana konsi mu alondezi yakwe Yesu ukuti wii wene atalafwa. Lelo Yesu atavwanzile vino wii wene atalafwa. Wene wavwanzile ati, “Ndi nkasi kuti alali kufika na lino ndiza, uzye cikupazi?”

Milimo 1:11

yati, “Mwe antu amu Galile nga pacani muimi mukulola mwiyulu? Yesu wi uwasendwa kufuma kunomuli nu kuya kwiyulu, alawela mu musango uli umwi kwene uno mwamulolelamo akuya kwiyulu.”

1 Kolinto 15:23

Lelo cila muntu alazyukuka pa nsita yakwe. Klistu uwali uwankolelo kuzyukuka, nga antu yakwe nao yalazyukuka lino alawela.

1 Kolinto 4:5

Acino mutalinzile kupingula umuntu ali wensi lino nsita yasontwa itali kuti ifike. Upinguzi wakusyalikizya utalacitika suka Mwene akize. Wene alasokolola paswe vintu vino vyafiswa mu mfinzi, nga nu kuumbula mapange ya nkama aya mu melenganyo ya antu. Alino lyene umuntu wensi Leza alamutasya ndi vino cingamulinga.

1 Tesalonika 4:16

Kulaya kulaizya ilamulo, kuvwika kwi zwi lya mungeli mukulu, ciunda ca ntandala yakwe Leza, nga Mwene umwisikulu aliika kufuma mwiyulu. Yao afwile nu utailo muli Klistu yalazyukuka nkolelo yaye nu umi.

2 Tesalonika 1:10

Cii cilacitika pa wanda ulya lino Mwene aliza kuti apelwe lulumbi ku antu yakwe yonsi nga nu mucinzi kufuma kuli yonsi ataila. Namwe kwene mulapendelwako, pano mwataile vino twamunenyile.

Ayebulai 9:28

Mu musango uli onga Klistu wapilwe kuya impolelwa yakufumya maifyo ya antu aingi. Wene alaloleka iila lyakwe ciili, asi ku kufumya maifyo, lelo ukwiza tuula yao akumulolela.

2 Petulo 3:10

Lelo uwanda wa kuwela kwa Mwene uliza wa mwivi. Pa wanda ulya mayulu yalalowa ni congo cikulu nga moto ulasungulula nu konona vyamu mayulu nu konona insi na vyonsi vyayamo.

1 Yoane 2:28

Endi, mwe ana mwe ikalini mu utandano na aliwe, pakuti lino alaloleka swemo tuce tupame kwaula kuya ni nsonyi pa Wanda wa kwiza kwakwe nupya.

Yuda 1:14

Enoki, cikolwe calenga cinimbali kufuma pali Adamu, awino apa mpiti wasowile pamulandu wao ati, “Cumi Mwene aliza pali pamwi na angeli yakwe amuzilo mazimbi na mazimbi.

Umbwilo 1:7

Lolini, wene akwiza mu makumbi! Antu yonsi yalamulola, pamwi na yao kwene amutosile mu mbazo. Antu yonsi pano nsi yalalosya pamulandu na aliwe. Vii avino cilaya.

Umbwilo 22:20

Wino akupeela umboni wakwe kuli vii vyonsi akuti, “Endi! Nkwiza zuwa!” Ameni! Iza Mwene Yesu!