Yaakobo 2:12 - ULufingo uLupwa

¹² Pe shɨnɨɨsho, mʉlongaje na kʉbhomba, kumo mʉkʉmbʉkhaje kʉtɨ ʉMʉlʉngʉ akhayɨbhalonga kʉlandatana ni zwi lyakwe. Izwi liniili lɨkʉtʉsatʉla ɨtwe kwepa mu mbiibhi.

Yaakobo 2:12 ပူးပေါင်းရင်းမြစ်များ

Yaakobo 1:25

Ɨleelo umuntu we akʉsɨbhɨɨlɨla ku wusimishizu izwi lya Mʉlʉngʉ, lye lɨlɨ na makha aga kʉtʉsatʉla ɨtwe kwepa mu mbiibhi, na kʉlɨlandata sita kwɨwa zye ayimvwizye, wʉnʉʉyo we akʉsaywa mu ziila zye akʉbhomba.

Yaakobo 2:8

Mu Wusimbe uWufinjile ɨndajɨzyo ɨya wʉmwene wa Mʉlʉngʉ yɨkʉtɨ, “Ʉmʉgane uwamwinyu anza she uyiganile wʉneewe.” Ɨnga nalyoli mʉkʉbhomba shɨnɨɨsho, we mʉkʉbhomba akhinza.

Bhakolosaayi 3:17

Zyozyonti zye mʉkʉlonga, awe kʉbhomba, bhombaji zyonti kwɨ taawa lya Mwene uYeesu, na kumusalifwa ʉTaata ʉMʉlʉngʉ kʉshɨlɨla kʉkwakwe.

Bhafiliipi 4:8

Bhanholo bhaanɨ mʉ lwɨtɨkho, ɨnkʉmalɨɨlɨzya kʉbhabhʉʉzya kʉtɨ, mʉlemaje zye zya nalyoli, zye zɨkʉpaalwa, ɨzya wugolosu, zye mfinjile, zye zɨkhondeeye, ɨzya lushindikho, ɨzyɨ togo, nɨ zya kʉpaalwa.

Luuka 4:18

“UMupepu wa Mwene alɨ peeka nɨɨne, kʉnongwa ye ʉMʉlʉngʉ ansebhile kʉbhalʉmbɨɨlɨla abhapɨɨna iNtumi iNyinza. Ansonteleziizye kʉbhabhʉʉzya bhe bhalɨ mwɨ jeela, intumi ɨzya kʉsatʉlwa kwabho, na bhe bhatakʉlola, intumi ɨzya kʉlola winza. Ansonteleziizye kʉbhapokha bhe bhakʉbhonelwa,

Yookhani 8:32

Pe mʉtɨwʉmanye uwanalyoli, woope uwanalyoli wʉtɨɨbhape ʉwʉsatʉlwe.”

Bhagalatiya 6:2

Mwavwanaje mʉ wʉtolwe wiinyu, kwɨ dala lɨnɨɨlyo mʉtɨkwɨlɨzye ɨndajɨzyo zya Kilisiti.