ZEFANYA 2:8 - KITTA' MATANGKASA'

⁸ Nakana Batara Kaminang Koasaya, “Kulangngere'mi bansa Moab siagang Amon anghinai siagang ancau-caui ummakKu. A'bicara tampoi ke'nanga angkanaya lanarampasaki buttana ummakKu.

ZEFANYA 2:8 ပူးပေါင်းရင်းမြစ်များ

PA'JARIANG 19:37

Ana' toaya allassukammi sitau ana' bura'ne, nampa naaremmo anjo anaka Moab. Iaminne a'jari boe-boena tu Moab kamma-kamma anne.

PA'JARIANG 19:38

Na ana' makaruaya allassukang tommi sitau ana' bura'ne nampa naareng Ben-Ami. Iaminne a'jari boe-boe'na bansa Amon kamma-kamma anne.

YESAYA 15:1

Iaminne pappasanNa Batara ri sesena Moab. Kota Ar siagang Kir laniancuruki lalang sipattang, siagang pa'rasangang Moab la'jari sino sikali.

YESAYA 16:6

Nakanamo bansa Yehuda, “Nalangngere'mi ikambe antekamma kaborroanna bansa Moab. Naassengi ikambe angkanaya anjo ke'nanga tampoi siagang tinggi langgai. Bicaranna ke'nanga sangnging bicara kosong, tena bonena.”

YEREMIA 12:14

Nakana Batara, “Iaminne pasangKu ri passala'na bansa-bansa singngampi'na Israel, ampanrakiai pa'rasangang Kupassareanga mae ri ummakKu Israel. Rapang lamung-lamung nibi'buka battu ri buttaya, kamma tomminjo sikamma tau ja'dalaka laKupasuluki battu ri sikamma pa'rasanganna ke'nanga, kammayatompa laKulappassangi Yehuda battu ri panna'gallanna ke'nanga.

YEREMIA 48:1

Iaminne kananNa Batara Kaminang Koasaya, iamintu Allata'alana Israel, ri sesena Moab, nakana, “Cilakai pandudu'na Nebo, nasaba' runtummi kotana! Niallei Kiryataim, siagang benteng pattahanganna kassaka niancuru'mi, sa'genna siri'-siri' pandudu'na;

YEREMIA 49:1

Iaminne kananNa Batara ri sesena Amon, angkana, “Angngapai nabuttana suku Gad niallei siagang nipammantangngi ri tau anynyombaya ri Rewata Milkom? Apaka tenamo tu Israel akkulle angngallei anjo daeraya?

PIRAUNG 3:61

IKatte, Batara, Kilangngereki antekamma bateku nihina; Kiasseng ngasengi rancanana ke'nanga.

YEHEZKIEL 21:28

“He tau, a'boto mako! Pauangi tu Amon le'baka anghinai tu Israel, angkanaya iNakke, Batara Kaminang Tinggia, akkana, ‘Se're pa'dang sadiami untu' ammuno; anjo pa'danga le'ba'mi nikantisi' sa'genna accilla' sangkamma kila', sollanna sadia untu' ammuno.

YEHEZKIEL 25:1

Nakana Batara mae ri nakke,

YEHEZKIEL 35:12

Jari lanuassemmi angkanaya iNakke, Batara, Kulangngere'mi kana pacau-caunu ri wattunnu angkana: Moncong-monconga ri Israel a'jari sinoi siagang nipassareangi a'jari koro'banta.

YEHEZKIEL 36:2

‘Ri wattunna bansa-bansaya ri tammulilinu nabundukiko siagang naellakko, nahinai ke'nanga sikontu Israel. Rannui ke'nanga a'bicara angkanaya kamma-kamma anne anjo sikamma bulu'-bulu' battu riolo dudua iami ke'nanga pata. Lanri kammana anjo he moncong-monconga siagang bulu'-buluka, pangka-pangka binangaya siagang sikamma ka'bunga, he kota-kota ancurukamo a'jari rumbangngang siagang nibokoiamo ri tau ammantanna, kammayatompa niellaka siagang nicau-caua ri bansa-bansa niaka ri tammulilina, pilangngeri apa kananNa Batara Kaminang Tinggia mae ri kau: Lalang a'rerena larroKu Kucallai bansa-bansa niaka ri tammulilinu siagang kammaya Edom, lanri rannuna anghinako, na naalle passa buttaKu siagang narampasa' parang-parang ruku'na. Kamma-kamma anne larroA' siagang a'jalloKa' lanri anjo bansa-bansaya sanna' dudu nahinanu siagang napakatunako.

AMOS 1:13

Nakana Batara, “Bansa Amon a'mole-molei doraka, lanri kammana anjo ma'nassa laKuhukkungi ke'nanga. Ri wattunna a'bundu' ke'nanga untu' ampakaluaraki daerana, napuei battanna tubai'-baine tiananga ri Gilead.

AMOS 2:1

Nakana Batara, “Pandudu'na Moab a'mole-molei doraka, lanri kammana anjo ma'nassa laKuhukkungi ke'nanga. Nahinai ke'nanga Karaeng Edom anjo mateamo, iamintu nabongkaraki jera'na siagang naallei buku-bukunna nampa natunu a'jari au.

ZEFANYA 2:10

Kammami anjo pandudu'na Moab siagang Amon lanihukkungi lanri katampoanna siagang kaborroanna ke'nanga, kammayatompa lanri le'ba'na nahina umma'Na Batara Kaminang Koasaya.

YOSUA 5:9

Nakana Batara mae ri Yosua, “Anne alloa le'ba'mi Kupa'lanynya' katunaannu ngaseng salaku ata-ata ri Mesir.” Iaminjo naniareng anjo tampaka Gilgal, battuanna nipa'lanynya', sa'genna kamma-kamma anne.