ZEFANYA 1:7 - KITTA' MATANGKASA'

⁷ A'reppese'mi allonNa Batara; anjo alloa langngallemi tindakang Allata'ala. Lanri kammana anjo a'mereki mako ri dallekanNa. Sadia-sadiami Batara untu' ambunoi umma'Na rapang koro'bang lanipassareang siagang le'ba'mi Nakio' battu musu-musunna Yehuda. Nakana Batara,

ZEFANYA 1:7 ပူးပေါင်းရင်းမြစ်များ

AYUB 24:1

“Angngapa nataNapattantua Allata'ala allo pangadelanga, sollanna anggappa kaadelang tau angngassengai?

PAMMUJI 46:10

Napammari pa'bundukanga ri sikontu linoa, anrong panaya siagang pokea Naancuruki, pa'lapa' a'bundalaka untu' batangkalea Natunui.

YESAYA 13:3

Le'ba'mi Nakio' Batara sikamma pejuang nipileNa. Kassaki ke'nanga, napatappaki kalenna siagang akkullei Nakalompoang pa'mai'. Nasarei tugasa' Batara ke'nanga untu' anghukkungi sikamma tau natabaya pangngalarroinNa.

YESAYA 13:6

Appiraung mako, lanri a'reppese'mi allonNa Batara, iamintu allo kapanrakang Napabattua Batara Kaminang Koasaya.

YESAYA 2:12

Ri anjo alloa laNapakatunai Batara Kaminang Koasaya sikamma tau ampakatinggiai kalenna, na nahukkung tau borroa siagang tau tampoa.

YESAYA 29:2

Mingka laNapabattui Allata'ala balaya irate ri anjo kotaya, sa'genna ammarrang siagang akkunrareng taua. Kabusu'na kotaya lasangkammai tampa' pakkoro'bangngang attalaka cera'.

YESAYA 34:5

Napasadiami pa'danNa Batara ri suruga, na kamma-kamma anne latattabami anjo pa'danga mae ri bansa Edom, le'baka nitappuki hukkunganna laniancuru'.

YESAYA 34:6

Lattalaka ceraki pa'danNa Batara siagang larassi jannana ke'nanga, rapang cera'na siagang jannana olo'-olo' nikoro'bangkanga. Saba' appasadiai Batara koro'bang ri Bozra, siagang lajai tau Nabuno ri butta Edom.

YESAYA 6:5

Nampa kukanamo, “Bala! Tenamo panrannuangku inakke, lanri ra'masa'na bawaku napakamma dosa, na kuammantang ri tangngana bansa kammaya todong cilakana. Mingka manna nakamma, mata kalengku anciniki Karaenga, iamintu Batara Kaminang Makoasaya!”

YEREMIA 46:10

Mingka inakke, Yeremia kukanamo, iaminne allonNa Karaeng Allata'ala Kaminang Tinggia siagang Kaminang Koasaya; ri anjo alloa Napa'balassi sikontu musu-musunNa. Pa'danNa bassoroki angnganre tau siagang angnginung cera'. Anne alloa Batara Kaminang Koasaya, Nasamballei koro'bang-koro'banga wara', ri anjo birinna Binanga Efrat.

YEHEZKIEL 7:10

Battumi allo angngeranga bala mae ri Israel. Kajariammi ri kemae-kemae gau' pallaka. Katampoanga narapi'mi pamangeanna.

YEHEZKIEL 7:7

Sikontu-kontuna kala'busannami mae ri kau, he bansa niaka ammantang anrinni ri buttaya. Kamma-kamma anne tenamo pa'gaukang passua'-suarrang ri tampa' pakkorobangngang ri moncong-monconga, mingka ia niaka poro karicuang mami.

YO"EL 1:15

A'reppese'mi AllonNa Batara, iamintu allo appakamalla'-mallaka; wattu appabattuna kaancurang Kaminang Makoasaya.

YO"EL 2:11

Assa'ra gunturu'mi sa'ranNa Batara assare parenta, mae ri tantarana. Tamaka jaina pasukanna! Tamaka kassa'na anjo tantara anggaukangai parentaNa! Tojeng tamaka lompona siagang heba'na AllonNa Batara! Tena manna sitau akkulle attahang.

YO"EL 2:31

Mataalloa la'jari sassangi siagang bulanga la'jari ejai sangkamma cera'. Kabusu'na anjo lakajariangi lalang tenanapa nabattu AllonNa Batara, iamintu allo hebaka siagang appakamalla'-mallaka!

AMOS 6:10

Sitau anggota kaluargana ia tugasaka angngurusuki panguburanna, laniaki battu siagang naerangi assulu' maya'na bijanna. Lakkioki mae ri tau niaka ri bageang bokona anjo ballaka angkana, “Apaka nia' ija maraeng attallasa' pantaranganna ikau?” Na lania'mo sa'ra appiali angkana, “Tenamo!” Anjo anggota kaluarga tugasaka antarawangi anjo mayaka lanakana, “Tea' mako a'bicarai pole! Takkulleaki' ampaui arenNa Batara.”

AMOS 8:3

Ri anjo alloa sikamma kelong-kelonga ri balla' karaenga la'jari karruki. Kemae-kemae attambung mayaka, le'baka nipela' cokko-cokko.”

HABAKUK 2:20

Niaki Batara lalang ri Balla'Na matangkasaka; siratangi sikontu taua ri tompo'na buttaya a'mereki ri dallekanNa.

ZEFANYA 1:14

A'reppese'mi allo pangadelanNa Batara; iyo, sanna'mi a'reppese'na, ba'lalo labattumi silalonna. Anjo alloa sangnging kapacceang, sa'genna manna tantara kaminang barania lammarrang-marrang todong lanri tappu' panrannuanna!

ZAKHARIA 14:1

A'reppese'mi allo pangadelanNa Batara. Na laniella'mo Yerusalem, siagang lanibage-bagei wassele'na ri dallekang matannu.

ZAKHARIA 2:13

A'mereki ngaseng mako ri dallekanNa Batara! Nasaba' ammentemmi battu ri tampa' pammantanganNa ri suruga.

MALEAKHI 4:1

Nakana Batara Kaminang Koasaya, “Labattui sallang allonNa nasikontu tau tampoa siagang tau ja'dalaka nitunui rapang rarame. Ri anjo alloa lanitunui sa'genna la'busu' ke'nanga, siagang tenamo ke'nanga latassesa.

MATIUS 22:4

Jari nasuromi pole pala'-palayanna maraenga anjo Karaenga. Napasammi ke'nanga angkana: ‘Pauang ngasengi anjo tau le'baka niburittai angkanaya: Tattala ngasemmi apa-apaya ri passua'-suarrang pa'buntinganna Karaenga. Sikamma sapia siagang sapi rungka kaminang bajika le'ba'mi nisuro polong. Kamma-kamma anne sadia ngasemmi. Umbamo kimange anjoreng assua'-suara' ri pa'buntinganga!’

ROMA 3:19

Kamma-kamma anne niassemmi angkanaya sikamma anjo tattulisika lalang ri hukkung-hukkung agama Yahudia, tattuju mae ri sikamma tau niaka irawangang pamarentahanna anjo hukkung-hukkunga. Lanri kammana, tenamo sitau akkulle appare' alasang siagang akkullei nituntu' ri Allata'ala sikontu bonena linoa.

ROMA 9:20

Mingka ikau sari'battang, tau biasajako bawang! Takkulleako barani appiali mae ri Allata'ala! Maka akkullei se'rea pammantangang bunga mae ri tau amparekai, angkana, “Apa saba'na nanupare' kamma' anne?”

FILIPI 4:5

Parallui nacini' ngaseng taua sipa'-sipa' baji'nu ri katallassannu. Nasaba' tasalloami Nalabattu Batara.

KOLOSE 1:12

kammayatompa appala' sukkuru' mae ri Manggea. Nasaba' iaminjo Manggea ampa'jari siratangko antarimai apa le'baka Napasadia Allata'ala untu' umma'Na lalang ri kakaraengang singaraka.

1 SAMUEL 16:5

Appialimi Samuel angkana, “Iyo kammatojengi. Battua' mae untu' assare koro'bang mae ri Batara. Jari tangkasi ngasengi kalennu sollannu akkulle amminawang ri anjo pa'gaukang koro'banga.” Isai siagang ana'-ana'na nasuro ngaseng tommi massing antangkasi kalenna, siagang naundang mange ri anjo pa'gaukanga.

1 SAMUEL 20:26

Mingka anjo alloa tena nasero kanai Saul anjo passalaka, nasaba' napikkiriki angkana, “Gassingka nia' tamangngapa-apana sa'genna tena natangkasa' kalenna situru' atorang agamaya.”