ZEFANYA 1:14 - KITTA' MATANGKASA'

¹⁴ A'reppese'mi allo pangadelanNa Batara; iyo, sanna'mi a'reppese'na, ba'lalo labattumi silalonna. Anjo alloa sangnging kapacceang, sa'genna manna tantara kaminang barania lammarrang-marrang todong lanri tappu' panrannuanna!

ZEFANYA 1:14 ပူးပေါင်းရင်းမြစ်များ

YESAYA 15:4

Appiraunga tojemmi tu Hesybon siagang tu Eleale, na kalangngerang sa'ranna ke'nanga sa'genna mange ri Yahas. Ba'lalo sikamma tantaraya annekkere'mi; tappela'mi kabaranianna ke'nanga.

YESAYA 33:7

Tau gammaraka siagang barania ammarrangi appala' tulung; sikamma tau nisuroa mange a'boya passiamakkang angngarruki napakamma si'na.

YESAYA 66:6

Pilangngeri! Nia' sa'ra gamarrung ri kotaya; nia' sa'ra battu ri BallakKu; iaminjo sa'rangKu a'balasaka mae ri musua!

YESAYA 8:22

yareka naung, tena apa-apa lanacini' ke'nanga pantaranganna kasukkarrang siagang sassang kammayatompa bayang-bayang appakamallaka. Lanipelaki ke'nanga mae ri anjo tampa' sassanga.

YEREMIA 25:36

Akkunrarengko siagang angngarrukko si'na pa'mai'nu lanri larroNa Batara naNapanraki bansanu kammayatompa Naancuruki anjo pa'rasangannu amanga.

YEREMIA 30:7

Battumi allo sannaka heba'na, allo tenaya sangkammanna. Untu' ummakKu, anjo alloa appakalussaki; mingka laKupasalamaki ke'nanga.”

YEREMIA 46:5

Mingka inakke, Batara, Kuciniki ke'nanga ammunduru' napakamma malla'. Sikamma tantarana nibetai, lari napakamma malla' tamassaile mae ri boko.

YEREMIA 48:41

Kota-kotana siagang sikamma pattahanganna laniallei, siagang tantarana lamallaki rapang baine eroka ammana'.

YEHEZKIEL 12:23

Jari pabattui mae ri ke'nanga angkanaya iNakke Batara Kaminang Tinggia appiali kamma anne: Anjo paruntu' kanaya laKupattaenami, sa'genna tenamo nanipaui ri Israel. Salaku sambenna pabattuangi ke'nanga angkana narapi'mi wattunna, siagang sikontu botoa la'rupa ngasemmi.

YEHEZKIEL 7:12

Tasalloami nanarapi' wattunna, a'reppese'mi allonna! Tau ammallia siagang tau a'baluka tanggappayami passawallang apa-apa, lanri sikontuna taua lanituju ngasengi ri hukkunganNa Allata'ala.

YEHEZKIEL 7:16

Nia' sipa'gang lata'lappasa' nampa lari naiki ri pa'bulukanga. Anjoreng lasanrapangi ke'nanga jangang-jangang pune-pune nibongkaya battu ri ka'bunga; kabusu'na lakkunrarengi pa'risi' lanri dosa-dosana ke'nanga.

YO"EL 1:15

A'reppese'mi AllonNa Batara, iamintu allo appakamalla'-mallaka; wattu appabattuna kaancurang Kaminang Makoasaya.

YO"EL 2:1

Tuiki tarompeka, pasa'rai tanra bahayaya ri Bulu' Sion matangkasaka, ri pammantangnganNa Allata'ala. Annekkere' mako, he pandudu'na Yehuda! Nasaba' a'reppese'mi AllonNa Batara siagang tasalloami nabattu.

YO"EL 2:11

Assa'ra gunturu'mi sa'ranNa Batara assare parenta, mae ri tantarana. Tamaka jaina pasukanna! Tamaka kassa'na anjo tantara anggaukangai parentaNa! Tojeng tamaka lompona siagang heba'na AllonNa Batara! Tena manna sitau akkulle attahang.

YO"EL 2:31

Mataalloa la'jari sassangi siagang bulanga la'jari ejai sangkamma cera'. Kabusu'na anjo lakajariangi lalang tenanapa nabattu AllonNa Batara, iamintu allo hebaka siagang appakamalla'-mallaka!

YO"EL 3:14

Assa'bu-sa'bui tau ri Ka'bung Pangadelanga. Nasaba' anjoreng labattui silalonna AllonNa Batara.

YO"EL 3:16

Ammammuki Batara battu ri Sion, iamintu bulu'Na; battu ri Yerusalem a'gunturu' sa'ranNa. Langika siagang buttaya ta'goccangi napakamma. Mingka tuli laNaalleangngangi siagang Najagai Batara iamintu Israel, umma'Na.

AMOS 8:2

Akkuta'nangi Batara ri nakke angkana, “Apa nucini' Amos?” Appialima' angkana, “Se're karanjeng nibonei rappo-rappoang ti'no'.” Nakanamo Batara, “Narapi'mi wattunna mae ri ummakKu Israel, rapang rappo-rappoang ti'nokamo. Tenamo nalaKupinra pole rancanaKu siagang ma'nassa laKuhukkungi ke'nanga.

ZEFANYA 1:10

Nakana Batara, “Ri anjo alloa lania' kalangngerang sa'ra karru' ri Pakke'bu' Lompo Juku'. Sa'ra piraung lakalangngerang battu ri kampong berua, siagang sa'ra runtung heba' lammarrung battu ri bulu'-buluka.

ZEFANYA 1:7

A'reppese'mi allonNa Batara; anjo alloa langngallemi tindakang Allata'ala. Lanri kammana anjo a'mereki mako ri dallekanNa. Sadia-sadiami Batara untu' ambunoi umma'Na rapang koro'bang lanipassareang siagang le'ba'mi Nakio' battu musu-musunna Yehuda. Nakana Batara,

MALEAKHI 4:5

Mingka ri tenanapa nabattu anjo allo hebaka siagang appakamalla' le'baka Kupattantu, laKusuroi battu Na'bi Elia.

LAMPA-LAMPANA 2:20

La'jari sassangi alloa, la'jari ejai bulanga sangkamma cera' ri tenanapa nabattu AllonNa Batara, iamintu allo malompoa siagang mala'birika.

FILIPI 4:5

Parallui nacini' ngaseng taua sipa'-sipa' baji'nu ri katallassannu. Nasaba' tasalloami Nalabattu Batara.

1 TESALONIKA 4:16

Punna sallang naung KalenNa Isa battu ri suruga, lakkio' lompoi malaeka' lompoa siagang lanipasa'rai tarompe'Na Allata'ala untu' a'jari pammatei. Nampa nipabangung la'bi riolo tu Karistenga.

IBRANI 12:26

Anjo wattua nipata'bangkai linoa ri sa'ranNa. Mingka kamma-kamma anne a'janjimi pole Nakana, “LaKupata'bangka iji sikalipi pole, teai linoa bawang, mingka langika pole.”

YAKOBUS 5:9

Teako ta'liwakki larronu siagang teako sisalakangi, sollanna tena Nahukkungko Allata'ala. U'rangi! A'reppese'mi hakinga! A'birimmi battu!

2 PETRUS 2:3

Lanri angngoana anjo guru-guru takontutojenga nalanacaritamo mae ri kau carita-carita napare'-pareka kalenna sollanna akkulle anggappa passawallang battu ri kau. Mingka sallomi nipasadia pangadelang eroka antappuki hukkunganna ke'nanga; kammayatompa sallo tommi attayang kapanrakang le'bakamo nipattantu lanagappaya ke'nanga.