YOSUA 6:19 - KITTA' MATANGKASA'

¹⁹ Sikontu barang-barang pera', bulaeng, tambaga, siagang bassia musti nisa'laki untu' Batara, nampa niboli' ilalang ri tampa' pammolikang barang-baranNa Batara.”

YOSUA 6:19 ပူးပေါင်းရင်းမြစ်များ

2 SAMUEL 8:11

Napassareang kabusuki Daud anjo sikontu hadiaya mae ri Batara untu' nipake lalang ri upacara sambayanga. Kammatommi anjo nagaukangi sikamma barang-barang bulaenga siagang pera' le'baka narampasa' battu ri Hadadezer siagang bansa-bansa nabetaya, iamintu bansa Edom, Moab, Filistin siagang Amalek.

1 KARAENG-KARAENG 14:26

Narampasaki sikontu barang-barang tinggia anggaranna ia niaka lalang ri Balla'Na Batara siagang ri balla' kakaraenganga, kammayatompa pakkakasa'-pakkakasa' bulaeng nasuro pareka Salomo.

1 KARAENG-KARAENG 7:51

Le'ba'namo Salomo ambangungi Balla'Na Batara, naboli'mi lalang ri gudang-gudanna anjo ballaka iamintu sikontu peraka, bulaenga, siagang barang-barang maraeng ia le'baka napassareang Daud, manggena, ri Batara.

2 KARAENG-KARAENG 24:13

Sikontu pakkakasa' bulaeng napareka Karaeng Salomo untu' Balla'Na Batara, nipanraki ri Nebukadnezar. Nampa sikontu barang-barang niaka anggaranna lalang ri anjo Balla'Na Batara siagang ri balla' karaenga naengkaki mange ri Babel. Sikontu anjo passalaka kajariangi situru' apa le'baka Napau riolo Batara.

1 PATTOTTORANG 18:11

Napassareang ngasemmi Daud mae ri Batara sikamma anjo hadiaya, untu' nipake lalang gau' passambayangang. Kamma tomminjo nagaukangangi sikamma barang-barang bulaeng le'baka narampasa' battu ri Hadadezer siagang bansa-bansa nabetaya, iamintu bansa Edom, Moab, Amon, Filistin, siagang Amalek.

1 PATTOTTORANG 26:20

Tumaraengannaya lalang ri suku Lewi nisarei tanggong jawa' mae ri barang-barang niaka lalang ri Balla'Na Batara, siagang mae ri gudang tampa' pammolikang sikamma apa-apa lanipassareanga mae ri Allata'ala.

1 PATTOTTORANG 26:26

Selomit siagang bija pammanakanna tanggong jawa' mae ri sikontu passare napassareanga Karaeng Daud, kapala-kapala kaluargaya, pamimping-pamimping pa'rappungang bijaya, siagang sikamma perwira tinggina tantaraya.

1 PATTOTTORANG 26:27

Anjo sikamma passarea iami sipa'gang battu ri barang-barang narampasaka ke'nanga lalang pa'bundukang, siagang passarena ke'nanga untu' eroka lanipake poro untu' lalang ri Balla'Na Batara.

1 PATTOTTORANG 26:28

Bodona kana, Selomit siagang kaluargana iami tanggong jawa' mae ri sikontu apa le'baka nipassareang untu' poro eroka nipake lalang ri Balla'Na Batara, kammaya pole sikamma passare tete ri Na'bi Samuel, ia le'baka napassareang Karaeng Saul, Abner ana'na Ner, siagang Yoab ana'na Zeruya.

1 PATTOTTORANG 28:12

Napassareang tommi Daud sikontu rancana le'baka napikkiri' untu' bageang-bageang bokona anjo ballaka siagang sikamma kamara' niaka angkulilingi, kammayatompa gudang-gudang tampa' pammolikang sikamma pakkakasa' Balla'Na Batara siagang sikamma passare eroka nipassareang untu' Batara.

2 PATTOTTORANG 15:18

Sikontu bulaeng, pera', siagang barang-barang narampasaka lalang bundu' manggena, kammayatompa barang-barang kalenna naboli' kabusuki ri Balla'Na Batara untu' a'jari Napatang Batara.

2 PATTOTTORANG 31:12

nampa naboli' anjo sikontu passarea siagang passare bage sampuloa battu ri pa'barang-baranganna ra'yaka lalang ri anjo gudang-gudanga. Nia' sitau tu Lewi niarenga Konanya nisare tugasa' untu' pangawasa', siagang andi'na niarenga Simei a'jari pambantuna.

NEHEMIA 10:38

Mingka nia' sitau imang turungang battua ri Harun musti anrurungangi ke'nanga anjo tu Lewia, punna napasse're ke'nanga anjo sikamma passarea. Nabage sampulona anjo sikamma passarea musti nierangi ri tu Lewia mange ri kamara'-kamara' parsadiaanga ri Balla'Na Batara ri Yerusalem.

YEREMIA 38:11

Jari a'lampami Ebed-Melekh siagang anjo tau tallua mange ri gudanna balla' karaenga, angngalle kaeng-kaeng toa anjoreng, nampa napanaung siagang otere' mae ri nakke lalang bungunga.

KAIMANGNGANG 19:24

Lalang ri taung makaappa'na sikontu rapponna musti nupassareangi mae ri Nakke untu' ampappicinikangi pappala' sukkuru'nu mae ri Nakke, Batara.

MIKHA 4:13

Nakana Batara, “He pandudu'na Yerusalem, a'lampamako mange angngonjo'-onjokangi musunnu! LaKupakagassingko rapang sapi attanru' bassia siagang akkanuku tambagaya. Lanuancuruki jaia bansa, siagang kakalumanynyangngang wassele' narampasaka ke'nanga lanupassareangi mae ri Nakke, Batarana sikontu linoa.”

PAMMILANGNGANG 31:11

Le'baki anjo naallemi tu Israel anjo sikontu barang nirampasaka, kammayatompa sikamma tunitahanga siagang olo'-oloka,

PAMMILANGNGANG 31:12

nampa naerang mae ri Musa siagang Imang Eleazar kammayatompa mae ri sikontu umma' Israel. Anjo wattua sitabangi ke'nanga akkema ri lappara' Moab, ri birinna Binanga Yordan, ri ampi'na kota Yerikho.

PAMMILANGNGANG 31:22

Sikontu apa-apa attahanga ri pepe', kammayami bulaeng, pera', tambaga, bassi, tima kebo' siagang tima le'leng, musti nitangkasi ngasengi lalang ri pepeka. Nampa musti nitangkasi todong sikontu anjo barang-barang kammaya siagang je'ne' upacara pannangkasi sollanna tenamo nara'masa'. Sikontu barang maraengannaya, ia tenaya nattahang ri pepe', musti nitangkasi siagang je'ne' upacara pannangkasi.

MATIUS 27:6

Mangemi imang-imang kapalaya anrappungi anjo doeka. Na nakana ke'nanga, “Anne doeka, doe' cera'. Situru' atoranga ri agamaya, anne doe' kammaya takkulleai nipantama' ri pammoneang passidakkanga lalang ri Balla'Na Batara.”

MARKUS 12:41

Ri wattunna ammempo Isa ri dallekanna pammoneang passidakkaya ri Balla'Na Batara, Naciniki tasse're-se'remi taua appantama' doe' passidakka anjoreng ri pammoneang passidakkaya. Jai tau kalumanynyang appantama' doe' sijaiang.

YOSUA 7:11

A'gau' dosami tu Israel. Le'ba'mi Kuparentakang mae ri ke'nanga sollanna naturuki parjanjiangKu siagang ke'nanga, mingka nadakkaimi ke'nanga anjo parentaKu! Sikamma barang-barang mustia niancuru', naallei ke'nanga. Nalukkaki ke'nanga siagang nacokkoi ri alla'na barang-baranna ke'nanga sollanna tena nakaassengang.