YOSUA 22:28 - KITTA' MATANGKASA'

²⁸ Jari, pattujunna ikambe iamintu; ebara' angkana akkana kammatojengi jari-jarinu sallang, akkullemi angkana jari-jarina ikambe, ‘Ciniki anjo tampa' pakkoro'bangnganga! Boe-boena ikambe ambangungi se're tampa' pakkoro'bangngang sangkammaya rupanna siagang tampa' pakkoro'bangnganNa Batara, teai untu' koro'bang nitunu yareka untu' passare, mingka untu' a'jari pammatei mae ri katte ngaseng.’

YOSUA 22:28 ပူးပေါင်းရင်းမြစ်များ

PA'JARIANG 31:48

Nakanamo Laban ri Yakub, “Anne pattambungang batua la'jari pangngu'rangi mae ri katte sipa'rua.” Iaminjo saba'na naniareng anjo tampaka Galed.

2 KARAENG-KARAENG 16:10

Ri wattunna a'lampa Karaeng Ahas mange ri Damsyik untu' ambuntuli karaeng Tiglat-Pileser, nia' nacini' tampa' pakkoro'bangngang anjoreng. Nampa nakiring contona anjo tampa' pakkoro'bangnganga mange ri Imang Uria ri Yerusalem, siagang sikontu ukkurang-ukkuranna.

KALAPPASSANG 25:40

Jagai sollanna nipare' anjo lampua situru' conto le'baka Kupicinikiangko irate ri anne monconga.”

YESAYA 19:19

Anjo wattua ri pappokokanna pa'rasangang Mesir lania' se're tampa' pakkoro'bangngang mae ri Batara, siagang ri pa'baeng-baenna nia' se're benteng batu nisa'la' akkale-kalea untu' Batara.

IBRANI 8:5

Anjo jama-jamang imang nagaukanga ke'nanga, sikontutojenna poro pangngebaranji siagang bayang-bayanji bawang mae ri apa niaka ri suruga. Anjo le'ba'mi Napau Allata'ala mae ri Musa riolo, iamintu ri wattunna lappaenteng KemaNa Batara Musa. Kammami anne kananNa Allata'ala mae ri Musa, “U'rangi! Yangasenna anjo musti nupareki situru' panrala' le'baka nipaccinikangko rate ri monconga.”

YOSUA 22:27

mingka untu' a'jari pammatei mae ri katte ngaseng, siagang mae ri jari-jarita ri allo ri boko, angkana kammatojengi ikambe anne nigaukangi ibadaya mae ri Batara ri Kema KahaderanNa, koro'bang nitunu, passare-passare siagang koro'bang passari'battangngang. Lanri kammana anjo, tenamo nalanakana jari-jarinu angkanaya anjo jari-jarina ikambe tena passisambunganna siagang Batara.

YOSUA 22:29

Patappa'mi, angkanaya tena nalaero' ikambe angngewai Batara yareka lammari anynyomba mae ri Ia lanri natambaina ikambe tampa' pakkoro'bangnganga untu' koro'bang nitunu yareka koro'bang gandung yareka untu' koro'bang passare, nampa nia'mo tampa' pakkoro'bangnganNa Karaeng Allata'alata ri dallekanna Kema KahaderanNa Batara.”

YOSUA 24:27

Le'baki anjo nakanamo Yosua mange ri yangasenna anjo taua, “Anne batua a'jari sa'bi mae ri katte. Sikontu kana-kana Napabattua Batara mae ri katte, le'ba'mi nipau ri dallekanna anne batua. Jari, iaminne batua la'jari sa'bi mae ri kau ngaseng, untu' ampiu'rangiangko sollanna tena nanuewai Allata'alanu.”