YOSUA 22:27 - KITTA' MATANGKASA'

²⁷ mingka untu' a'jari pammatei mae ri katte ngaseng, siagang mae ri jari-jarita ri allo ri boko, angkana kammatojengi ikambe anne nigaukangi ibadaya mae ri Batara ri Kema KahaderanNa, koro'bang nitunu, passare-passare siagang koro'bang passari'battangngang. Lanri kammana anjo, tenamo nalanakana jari-jarinu angkanaya anjo jari-jarina ikambe tena passisambunganna siagang Batara.

YOSUA 22:27 ပူးပေါင်းရင်းမြစ်များ

PA'JARIANG 31:48

Nakanamo Laban ri Yakub, “Anne pattambungang batua la'jari pangngu'rangi mae ri katte sipa'rua.” Iaminjo saba'na naniareng anjo tampaka Galed.

PA'JARIANG 31:52

Baji' na anne pattambunganga, kammayatompa anjo batu pappakaingaka, iami lampakaingakki' angkanaya takkulleai kulalloi anne pattambunganga untu' mange ambundukiko. Nampa ikau pole takkulleai nulalloi anne pattambunganga siagang anne batu pangngu'rangi untu' mange ambundukia'.

PAMMUJI 16:5

O, Batara, iKatteji bawang Bataraku; Kisarea' sikontu apa kuparalluanga, sarengku niaki lalang limanTa.

YESAYA 19:19

Anjo wattua ri pappokokanna pa'rasangang Mesir lania' se're tampa' pakkoro'bangngang mae ri Batara, siagang ri pa'baeng-baenna nia' se're benteng batu nisa'la' akkale-kalea untu' Batara.

PAOLE 12:11

Nampa lammile Karaeng Allata'alanu se're tampa' untu' lanupake anynyomba mae ri Ia. Anjoreng mako musti a'lampa angngerangi sikontu apa kuparentakanga, iamintu koro'bang nitunua siagang sikamma koro'bang maraengannaya, koro'bang bage sampulona panggappannu siagang koro'bang nupa'janjianga mae ri Batara.

YOSUA 22:10

Ri wattunna battu suku Ruben, suku Gad siagang suku Manasye bageang irayaya mange ri Gelilot – bageang lau'na iji Binanga Yordan – ambangummi ke'nanga se're tampa' pakkoro'bangngang lompo siagang gammara' ri ampi'na binangaya.

YOSUA 22:26

Jari, nanabangung ikambe anne tampa' pakkoro'bangnganga, teai untu' koro'bang nitunu yareka untu' passarena ikambe,

YOSUA 22:28

Jari, pattujunna ikambe iamintu; ebara' angkana akkana kammatojengi jari-jarinu sallang, akkullemi angkana jari-jarina ikambe, ‘Ciniki anjo tampa' pakkoro'bangnganga! Boe-boena ikambe ambangungi se're tampa' pakkoro'bangngang sangkammaya rupanna siagang tampa' pakkoro'bangnganNa Batara, teai untu' koro'bang nitunu yareka untu' passare, mingka untu' a'jari pammatei mae ri katte ngaseng.’

YOSUA 22:34

Kala'busanna nakanamo suku Ruben siagang suku Gad, “Anne tampa' pakkoro'bangnganga a'jari sa'bi mae ri katte ngaseng angkanaya Batarami Allata'ala.” Jari naaremmi ke'nanga anjo tampa' pakkoro'bangnganga “Sa'bi”.

YOSUA 24:27

Le'baki anjo nakanamo Yosua mange ri yangasenna anjo taua, “Anne batua a'jari sa'bi mae ri katte. Sikontu kana-kana Napabattua Batara mae ri katte, le'ba'mi nipau ri dallekanna anne batua. Jari, iaminne batua la'jari sa'bi mae ri kau ngaseng, untu' ampiu'rangiangko sollanna tena nanuewai Allata'alanu.”

1 SAMUEL 7:12

Le'baki anjo appaentemmi Samuel se're batu, ri pa'baeng-baenna Mizpa siagang Sen. Nakanamo, “Natulung maki' Batara siganna'na.” Nampa naareng anjo batua “Batu Pannulungang”.