YOSUA 22:18 - KITTA' MATANGKASA'

¹⁸ Nampa kamma-kamma anne erokko ambokoi poleangi Batara? Punna nuewa anne alloa Batara, ammuko lalarroi mae ri sikontu umma' Israel.

YOSUA 22:18 ပူးပေါင်းရင်းမြစ်များ

2 SAMUEL 24:1

Larromi pole Batara mae ri tu Israel, nampa nanyonyo' Daud lanri ero'Na Napabattu kasukkaranga mae ri anjo bansaya. Nakana Batara ri ia, “Suro bilangi pandudu'na Israel siagang Yehuda.”

1 KARAENG-KARAENG 9:6

Mingka punna ikau yareka turungannu nubokoiA' siagang tena numannuruki ri hukkung-hukkungKu siagang parenta-parentaKu, kammayatompa anynyombako ri rewata-rewata maraenga,

2 KARAENG-KARAENG 17:21

Le'ba'na Nasa'la' Batara tu Israel battu ri tu Yehuda, naangka'mi tu Israel Yerobeam ana'na Nebat a'jari karaenna ke'nanga. Nampa naerammo Yerobeam anjo bansaya ambokoi Batara siagang anggaukangi dosa-dosa lompoa.

1 PATTOTTORANG 21:1

Eroki billisika ancilakai tu Israel; lanri kammana nanyonyo'mi Daud sollanna nasuro bilang taua.

1 PATTOTTORANG 21:14

Jari Napabattumi garringa Batara na natuju tu Israel, sa'genna nia'mo 70.000 tau ri ke'nanga mate napakamma.

2 PATTOTTORANG 34:33

Sikamma barhala-barhala appakaringi'-ringika, niaka ri sikontu Israel, niancuru' ngasemmi ri Karaeng Yosia. Nampa nasuro ra'yaka sollanna anynyomba mae ri Batara, Allata'alana boe-boena ke'nanga. Jari lalang attallasa'na ija Yosia, tuli majarreki tappa'na ra'yaka mae ri Batara.

KAIMANGNGANG 10:6

Nampa nakana Musa mae ri Harun siagang sikamma ana'na maraenga, iamintu Eleazar siagang Itamar, “Teako lappassangngi akkara'ngasa' uu'nu siagang teako kekkeki pakeannu lanri ero'na nupappicinikang angkanaya si'nako lanri kamateangko. Punna kamma anjo nugaukang, lamateko, siagang sikontu umma' Israel lanikalarroi ri Batara. Mingka sikontu umma' Israel maraenga akkulle si'na lanri anjo tau ruaya mate nakanrei pepe'Na Batara.

PAMMILANGNGANG 16:22

Mingka su'ju'mi Musa siagang Harun anynyomba siagang nakana, “O Allata'ala, iKattemi katallassang mae ri sikontu apa attallasaka. Punna sitauja bawang doraka, apaka larroKi' mae ri sikontu ummaka?”

PAMMILANGNGANG 32:15

Punna a'bokoko ambokoi Batara, anne sikontu bansaya lanilappassangi la'bi sallo pole a'la'ba' a'lampa ri parang lompoa, nampa ikau ngasemmi passabakkanna napanra' ke'nanga!”

PAOLE 7:4

sollanna tena nanipakabella ana'-ana'nu ri ke'nanga battu ri Batara, untu' anynyomba ri rewata-rewata maraenga. Punna anynyombako mae ri rewata-rewata maraenga, larroi Batara siagang laNaancuru' memangko silalonna.

YOSUA 22:15

Nabattumo ke'nanga mange ri tampa'na suku Ruben, suku Gad siagang suku Manasye rayaya ri daera Gilead.

YOSUA 22:16

Nampa lalang arenna sikontu umma'Na Batara, nakanamo ke'nanga mae ri suku Ruben, suku Gad siagang suku Manasye rayaya ri Gilead, “Angngapa nugaukangi anne panggaukang ja'dala' kammaya mae ri Allata'alana Israel? Lanri nubangunna anne tampa' pakkoro'bangngang kalennu, nuewami Batara! Tenamo nanuturuki parenta-parentaNa!

YOSUA 22:20

U'rangi, anjo Akhan ana'na Zerah taerokai anturuki parentaNa Batara ri passala'na barang-barang mustia niancuru'; nampa apa kale'bakkanna? Nihukkungi sikontu umma' Israel! Akhan bawang doraka, mingka teai kale-kalenna bawang mate!”

YOSUA 7:1

Le'ba'mi Naparentakang Batara mae ri umma' Israel angkanaya battu ri sikontu apa-apa mustia niancuru' ri Yerikho, tena sikali apa-apa akkulle nialle. Mingka anjo parentaya tena nanituruki. Nia' sitau bura'ne niareng Akhan andakkai anjo parentaya, sa'genna sanna' larroNa Batara mae ri umma' Israel. (Manggena Akhan niarengi Karmi siagang toana niarengi Zabdi, battu ri golongang bijanna Zerah lalang ri suku Yehuda.)

YOSUA 7:11

A'gau' dosami tu Israel. Le'ba'mi Kuparentakang mae ri ke'nanga sollanna naturuki parjanjiangKu siagang ke'nanga, mingka nadakkaimi ke'nanga anjo parentaKu! Sikamma barang-barang mustia niancuru', naallei ke'nanga. Nalukkaki ke'nanga siagang nacokkoi ri alla'na barang-baranna ke'nanga sollanna tena nakaassengang.

YOSUA 7:21

Ri alla'na barang-barang niallea, nia' kucini' juba sanna' ga'gana, pare' Babilonia, pera' kira-kira nia' rua kilo battala'na, siagang bulaeng sipolong kira-kira la'bi sitangnga kilo battala'na. Ero' dudua' ri anjo barang-baranga, jari kuallemi siagang kucokkoi lalang ri buttaya ri kemaku; rawa dudui pera'na kuboli'.”

1 SAMUEL 12:14

Mate'ne mako punna nupakala'biri' Batara, siagang anynyomba mae ri Ia, kammayatompa nuturuki parentaNa, sarroangampa punna ikau ngaseng siagang karaennu tuli tamamminrayako mae ri Karaeng Allata'alanu.

1 SAMUEL 12:20

Appialimi Samuel angkana, “Teako mallakki; manna pole le'ba'mi nugaukang anjo kaja'dallanga, teako a'bokoi battu ri Batara, passangalinna tuli anynyombako ri Ia situlusu'na atinnu.