YOSUA 14:12 - KITTA' MATANGKASA'

¹² Lanri kammana anjo, sareamma' kamma-kamma anne daera pa'moncongang Napa'janjianga Batara mae ri nakke ri wattungku ammotere' siagang sikamma tau kuaganga angngerang laporang. Anjo wattua kalennu allangngereki, angkanaya anjoreng nia' bansa lompo tinggia pakkaleanna, niarenga bansa Enak. Lalangi ke'nanga ri kota-kota lompo nitemboka tammulilina ammantang. LaNatulunga' kapang Batara, sa'genna akkulle kubongka ke'nanga, sangkamma Napaua Batara.”

YOSUA 14:12 ပူးပေါင်းရင်းမြစ်များ

2 KARAENG-KARAENG 19:4

Nia'mo sitau panglima tinggi pangka'na battu nasuro karaeng Asyur untu' antunai Allata'ala mattallasaka. Inai angngassengi, gassingka Nalangngere'mi Karaeng Allata'alanu anjo kana-kana mappakatunaya mae ri KalenNa, siagang Nahukkung tau le'baka ampasuluki anjo kana kammaya. Lanri kammana anjo appala' doang laloko mae ri Allata'ala untu' taunta attallasaka ija.”

2 PATTOTTORANG 14:11

Nampa appala' doang Asa ri Karaeng Allata'alana, nakana, “O Batara, iKatteji bawang akkulle ambantui tau lammaya andallekangi tau kassaka. Kitulung laloi ikambe kamma-kamma anne, o Karaeng Allata'alana ikambe! Ri Katteji bawang tanjeng ikambe, siagang lanri arenTa bawang nassulu' anne ikambe untu' angngewai anne pasukang sannaka lompona. O Batara, iKatteji bawang Allata'alana ikambe. TeaKi' pa'biangngi KalenTa nibeta ri se'reang rupatau.”

PAMMUJI 44:3

IKatte kalenTa ambongkai bansa-bansaya sollanna ammantang ummatTa ri pa'rasanganna ke'nanga. Bansa-bansa maraenga Kicilakai, mingka ummatTa Kilappassang a'bakka'-bakka'.

PAMMUJI 60:12

O, Allata'ala, tenaka Kimminawang siagang ikambe? Tenaka Kimaju siagang tantarana ikambe?

PAMMILANGNGANG 13:28

Mingka pandudu'na anjo pa'rasanganga kassa'-kassa' ngasengi. Kota-kotana ke'nanga lompo-lompo ngasengi siagang ammakei tembo' kalli' pattahangngang. Nampa pole, anjo tau nacinika ikambe anjoreng sangkammai jari-jarina tau lompo tinggia tinggi.

PAMMILANGNGANG 13:33

Ba'lalo nia' nacini' ikambe tau sangkamma rassasa, iamintu jari-jarina tu Enak. Punna nipasinrapangi siagang ke'nanga, ikambe rapang jaki' katimbang; siagang mattantu kammaminjo panggappana ke'nanga mae ri kambe.”

PAMMILANGNGANG 21:34

Nakanamo Batara mae ri Musa, “Teako mallakki mae ri ia. LaKusareko pammetang. Lanubetai anjo karaenga, sikontu ra'ya'na kammayatompa pa'rasanganna. Gaukammi ri ia sangkamma apa le'baka nugaukang mae ri Karaeng Sihon ammarentaya ri Hesybon.”

ROMA 8:31

Apamo lanikana kamma-kamma anne ri passala' kammaya ngaseng anjo? Punna Narurungangki' Allata'ala, maka inai akkulle angngewaki'?

PAOLE 1:28

Jari apa matu-matunta mange anjoreng? Anjo tau nikiringa mange anjoreng napakamalla' maki' lanri nalaporo'na ke'nanga angkana anjo bansa niaka anjoreng la'bi kassakangngangi siagang la'bi baraniangngangi na ikatte, kammayatompa lalangi ke'nanga ammantang ri kota-kota nikallika tembo' kammaya langi' tinggina. Acciniki ke'nanga rassasa anjoreng!’

PAOLE 9:1

“Pilangngeri sikamma sari'battangku ngaseng! Anne alloa a'limbangko untu' ampantamakki daerana bansa-bansa la'bi lompoanganga siagang la'bi kassakkangnganga naikau. Kota-kotana ke'nanga lompo-lompo ngasengi, siagang tinggi tembo' pattahanganna sanrapang tinggina langika.

PAOLE 9:3

Mingka kamma-kamma anne ikau kalennu lanciniki antekamma bateNa Karaeng Allata'alanu a'jappa ri dallekannu rapang pepe' appakamutunga. LaNabetai ke'nanga ri dallekang matannu, sa'gennu akkulle ambongkai ke'nanga siagang angngancuruki silalonna ke'nanga sangkamma Napa'janjianga Batara.

FILIPI 4:13

Lanri kakoasang Napassareanga Almasi mae ri nakke, akkullema' majarre' andallekangi a'rupa-rupaya katallassang.

IBRANI 11:33

Lanri tappa'na ngaseng ke'nanga, nanabetamo sikamma karaeng ammarentaya. Nagaukangi ke'nanga apa-apa tojenga, sa'genna natarimamo apa Napa'janjianga Allata'ala. Natongkoki ke'nanga bawana singa-singaya,

YOSUA 15:14

Ia jari-jarina Enak iamintu Sesai, Ahiman, siagang Talmai. Nabongka ngasemmi Kaleb anjo ke'nanga battu ri Hebron.

HAKING-HAKING 1:20

Nipassareammi kota Hebron mae ri Kaleb situru' parentana Musa. Saba'na kariolo nia' tallu golongang turunganna Enak le'ba' nabongka Kaleb assulu' battu ri anjo kotaya.

1 SAMUEL 14:6

Nakanamo Yonatan ri anjo turungkaya, “Umba kimange ri balla' jagana anjo tu Filistin kapereka. Gassingka ero'ji Batara antulungki'. Nasaba' akkullei Nasare Batara pammetang taua, baji' napunna jai tau kammayatompa lalang sike'de'na tau.”