YOHANES 7:19 - KITTA' MATANGKASA'

¹⁹ Sai le'ba'mi napassareang Musa ri kau ngaseng sikamma Naparentakanga Allata'ala? Mingka tenanniakka ri kau ngaseng anggaukangi anjo Naparentakanga. Angngapa nanuero' ngaseng ambunoA'?”

YOHANES 7:19 ပူးပေါင်းရင်းမြစ်များ

MATIUS 12:14

Mingka a'lampami anjo tu Farisia, nampa sikongkolo' a'boya akkala' ero' ambunoi Isa.

MATIUS 21:38

Mingka nacini'na ke'nanga anjo ana'na patanna koko nakanamo para ia, ‘Iaminne ana'na, warisi'na patanna koko. Umba nibunoi nampa nialleang warisi'na!’

MARKUS 11:18

Nalangngereki imang-imang kapalaya siagang guru-guru agamaya anjo kana-kananNa Isa. Jari appakkaramulami ke'nanga a'boya akkala' ero' ambunoi Isa. Malla'mi ke'nanga ri Ia, lanri lannasa' ngasemmi taua allangngereki apa-apa Napangngajarranga.

MARKUS 3:4

Nampa akkuta'nang ri anjo tau niaka ngaseng anjoreng nakana, “Manuru' agamaya, kereanga akkulle nigaukang ri allo Pammari-marianga? A'gau' baji' yareka a'gau' ja'dalaka? Appasalamaka tau yareka ammunoa tau?” Tenamo na nia' ri ke'nanga akkana.

MARKUS 3:6

A'lampami tu Farisia ambokoi anjo balla' sambayanga. Nampa assikongkolo' siagang siapa are ana'-ana'na Herodes, ero' ambunoi Isa.

YOHANES 1:17

Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi.

YOHANES 10:39

Usahami pole ke'nanga ero' anjakkalaki Isa, mingka ta'lappasaki Isa battu ri ke'nanga.

YOHANES 11:53

Anjo alloa appakkaramulami pamarentana tu Yahudia assikongkolo' ero' ambunoi Isa.

YOHANES 5:16

Jari ero'mi ke'nanga ansessai Isa, lanri Naballeina taua ri wattunna allo Pammari-marianga.

YOHANES 5:18

Pila' ero'mi ke'nanga ambunoi Isa, lanri akkana kammana Isa. Eroki ke'nanga ambunoi Isa, tena napassabakkang Naballeina bawang taua ri allo Pammari-marianna ke'nanga, mingka lanri Nakanana pole Isa angkanaya Bapa'Na anjo Allata'ala; jari battuanna, Napasangkammai KalenNa Allata'ala.

YOHANES 5:45

Teako angkanai laKupassalako ri dallekanNa Manggea. Ia lampassalayako sallang, iamintu Musa, iamintu tau nurannuanga.

YOHANES 7:1

Le'baki anjo a'lampami Isa ri kere-keremae ri pa'rasangang Galilea. Taerokai mange ri daera Yudea, lanri ero'na tukoasana tu Yahudia anjoreng ambunoi.

YOHANES 7:25

Le'baki anjo, nia' siapa are tu Yerusalem angkana, “Sai iaminne tau niboyaya, eroka nibuno?

LAMPA-LAMPANA 7:38

Musa tommi niaka ri tangnga-tangngana bansa Israel ri parang kassika, a'jaria tetena malaeka' naaganga a'bicara ri Bulu' Sinai siagang boe-boeta. Iami antarimayai battu ri Allata'ala kabara' katallassanga eroka nipabattu mae ri katte.

GALATIA 3:19

Jari punna kamma, untu' apa padeng nanipassareang anjo hukkung agamaya? Pialinna iamintu angkanaya, anjo hukkunga nipappitambangi sollanna nipa'nassa gau' dosana rupataua. Wattu tappakena anjo hukkung agamaya sa'gennaji kabattuanna sitau sossoranna Abraham le'baka nipau lalang ri janjinNa Allata'ala mae ri Abraham. Anjo hukkung agamaya, malaeka'-malaeka' ampabattui tete ri rupataua.

GALATIA 6:13

Kamanna tau anturukiai paratorang sunnaka tena tonja nagaukangi hukkung-hukkung agamaya. Mingka nakellaiko ke'nanga nisunna', sollanna akkulle napattampo-tampoang ke'nanga lanri nuturukinna anjo paratoranga.

PAOLE 1:17

Takkulleai battala' siali kaputusannu; musti nupasangkamma-kamma ngasengi taua punna nuadeli, manna pole inai teako pasimmara'-maraengi. Teako mallakki manna pole ri nai, nasaba' anjo kaputusang nupattantua iamintu kaputusang battu ri Allata'ala. Punna nia' parkara battala' dudui nusa'ring, erangi mae ri nakke, sollanna inakke antappuki.

PAOLE 33:4

Nituruki hukkung napassareanga Musa, barang kaminang tinggia anggaranna ri bansaya anne.