YOHANES 5:40 - KITTA' MATANGKASA'

⁴⁰ Mingka tena ngaseng nuero' battu mae ri Nakke sollanna nugappa katallassang mannannunganga.

YOHANES 5:40 ပူးပေါင်းရင်းမြစ်များ

PAMMUJI 81:11

INakkemi Batara Allata'alanu, anrurungangko assulu' battu ri Mesir. Wattunnu cipuru' Kusareko kanre.

YESAYA 49:7

Nakana Allata'ala matangkasa', Mappasalama'na Israel, mae ri tu nihina dudua, siagang nikabirisia ri bansa-bansaya kammayatompa a'jari ataya ri sikamma tukoasaya, “Sikamma karaenga lanaciniki panggaukangKu; lambangungi ke'nanga ampakalompoA'. Sikamma tukoasaya lanacini' tongi, nampa su'ju' anynyomba.” Kajariangi anjo kammaya lanri le'ba'mi Napile Batara atanNa; Allata'ala matangkasa'na Israel majarreki ri janjinNa.

YESAYA 50:2

Angngapa namanna sitau ummakKu tania' appiali, wattungKu battu angkioki ke'nanga? Maka a'mereki ke'nanga lanri nakapangi angkana takkulleA' allappassangi siagang ampasalamaki ke'nanga? Sikontutojenna, lanri parentaKu na'jari kalotoro' tamparanga, sikamma binangaya Kupa'jari parang lompo, sa'genna mate ngaseng jukuka na'rasa parru.

MATIUS 22:3

Nasuromi pala'-palayanna anjo Karaenga mange ambuntuli sikamma tau le'baka niburittai mae ri anjo passua'-suarranga. Mingka taerokai battu anjo sikamma tau le'baka niburittai.

MATIUS 23:37

“O Yerusalem, O Yerusalem! Kau ambunoi na'bi-na'bia. Nusambilai batu sikamma tunisuroNa Allata'ala sa'genna mate. A'mole-moleMa' ero' anraka' ngasengko sanrapang anrong janganga ancokkoi ana'-ana'na irawangang ka'nyi'na. Mingka tena ngaseng nuero'!

YOHANES 1:11

Battui ri pa'rasangang KalenNa mingka tanitarimayai ri bansaNa.

YOHANES 10:10

Punna palukka' battu, ero'naji a'lukka', ammuno siagang ammanraki. Mingka iNakke naKubattu, sollanna anggappa katallassang rupataua iamintu katallassang kala'bianga.

YOHANES 3:19

Iaminne passala'na nanituntuki: Battumi anjo singaraka antama' ri anne linoa, mingka nangaiangangi rupataua sassanga kala singaraka, lanri ja'dala'na ngaseng panggaukanna ke'nanga.

YOHANES 5:39

Nupilajari Kittaka lanri nupikkiriki angkanaya kammaminjo carana nanugappa katallassang mannannunganga. Na iaminjo Kittaka a'jari sa'bi ri KalengKu.

YOHANES 5:41

Tena naKu'boya pappalece battu ri rupataua.

YOHANES 5:44

Antekammako lakkulle tappa' punna erokko nipalece ri parannu tau, mingka taerokako a'boya pammuji battu ri Allata'ala Tenaya Ruanna?

YOHANES 6:27

Teako naporo untu' kanre lala'busuka siagang labottokaji bawang nanuanjama-jama. Anjamako untu' kanre tenaya nakkulle botto' siagang akkullea assare katallassang mannannungang. Iaminjo kanre kammaya laNasareangko Ana' Ma'rupataua, nasaba' Iami le'ba' Nalanti' Allata'ala Manggea.”

YOHANES 6:37

Sikamma tau Napassareanga Manggea mae ri Nakke, labattui mae ri Nakke. Manna inai tena nalaKusorongboko punna battui mae ri Nakke.

YOHANES 6:40

Memang, iaminne Nakaerokanga ManggeKu: Sikamma tau ancinikai Anaka na tappa' ri Ia, nagappami katallassang satunggu-tunggua, siagang laKupattallasa' poleangi sallang ri Allo Kiamaka.”

ROMA 6:23

Nasaba' pahalana dosaya iamintu kamateanga; mingka pangngamaseang Napassareang bawang-bawanga Allata'ala, iamintu katallassang sitojennaya siagang katallassang satunggu-tunggua lalang ri Isa Almasi, Batarata.

PAPPICINI' 22:17

Nakanamo RohNa Allata'ala siagang Bunting Bainea, “Mae mako!” Sikamma allangngerekai musti angkana tongi, “Mae mako!” Inai-nai turere, battu mako mae! Siagang inai-nai ero' mae mako angngalle cuma-cuma je'ne' katallassang!