YOHANES 19:6 - KITTA' MATANGKASA'

⁶ Ri wattunna nacini' imang-imang kapalaya siagang pangawalaka ngaseng anjo Isa, ammarrang-marrammi ke'nanga, angkana, “Allei salli'! Allei salli'!” Nakanamo Pilatus ri ke'nanga, “Allemi anne Taua nampa ikau tommo ansalliki. Nasaba' inakke tena kugappa kasalanNa manna sirupa.”

YOHANES 19:6 ပူးပေါင်းရင်းမြစ်များ

MATIUS 26:58

Battu bellami Petrus ampinawang bokoi Isa, sa'genna paranglakkenna Imang Lompoa. Antama'mi ammempo ri alla'na pajagaya, ero' naasseng angkanaya antekamma kale'bakkanna lakajarianga ri Isa.

MATIUS 27:22

Akkuta'nammi Pilatus ri ke'nanga nakana, “Jari apa lakugaukangi ri anne Isa, nigallaraka Almasi?” Appialimi ke'nanga angkana, “Allei Salli'!”

MATIUS 27:24

Kala'busanna naassemmi Pilatus angkanaya tena memang tommo maraeng akkulle nagaukang. Siagang akkullei a'jallo' anjo tau jaia punna tena niturukiangi ero'na. Jari angngallemi je'ne', nampa nabissai limanna ri dallekanna anjo tau jaia. Na nakana, “Inakke tena nakutanggongi kamateanNa anne taua! Anne urusannu ngaseng kau!”

LUKAS 23:4

Nakanamo Pilatus ri imang-imang kapalaya siagang anjo tau jaia, “Tena sikali kugappa manna se're kasalanna anne taua lampassiratangi nihukkung.”

YOHANES 18:3

Jari battumi Yudas mange anjoreng, angngerang se're pasukang tantara Roma siagang siapa are pangawala'na Balla'Na Batara. Iaminne ke'nanga nisuroa ri imang-imang kapalaya siagang tu Farisia. Angngerangi ke'nanga sanjata, lampu, siagang sulo.

YOHANES 18:31

Nakanamo Pilatus ri ke'nanga, “Allemi anne Taua nampa nuadeli situru' undang-undanna agamanu!” Mingka appialimi anjo tu Yahudia, angkana, “Tena nanikellaiki' ikambe anghukkung matei taua.” (

YOHANES 18:38

Akkuta'nammi Pilatus nakana, “Apa battuanna anjo katojenganga?” Assulukammi pole Pilatus nampa nakana ri tu Yahudia, “Tena kugappa kasalanna anne Taua, manna sirupa.

YOHANES 19:15

Ammarrang-marrammi ke'nanga, angkana, “Bunoi! Bunoi! Allei Salli'!” Akkuta'nammi Pilatus nakana, “Maka musti inakke ansalliki karaennu?” Appialimi imang-imang kapalaya angkana, “Tena ruanna karaeng pantaranganna Karaenna ikambe!”

YOHANES 19:4

Le'baki anjo assulukammi pole Pilatus nampa nakana ri anjo tau jaia, “Ciniki! Kuerangi anne Taua mae ri dallekannu ngaseng, sollanna nuasseng angkanaya tena kugappa kasalanNa manna sirupa.”

LAMPA-LAMPANA 2:23

Situru' ero' KalenNa, Natappukimi Allata'ala laNapassareang Isa Almasi mae ri kau ngaseng. Na ri wattunna nipassareang mae ri kau ngaseng, nuallemi nubuno, lanri nubalang parekanna nisalli' ri tau ja'dalaka.

LAMPA-LAMPANA 7:52

Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala.