YOHANES 19:29 - KITTA' MATANGKASA'

²⁹ Anjoreng ri tampaka nia' se're mangko' rassia anggoro' kacci. Angngallemi taua se're bunga batu karang nampa napantama' ri je'ne' anggoroka. Nampa nipataba anjo bunga batu karanga ri se'rea passukki', nanipajonjo mae ri bawaNa Isa.

YOHANES 19:29 ပူးပေါင်းရင်းမြစ်များ

1 KARAENG-KARAENG 4:33

Akkullei a'bicara ri sesena poko'-pokoka siagang lamung-lamunga – battu ri poko' camaraya ri Libanon sa'genna ruku'-ruku' lu'mu' attimboa ri rinring-rinring batua. A'bicara tongi ri sesena olo'-oloka, sangkamma ebara'na olo'-olo' akka'nyika, olo'-olo' allosonga siagang jukuka.

PAMMUJI 51:7

Sitojenna, ja'dala' memanga' baku' nilassukangku, nataba memamma' dosa baku' lalangku ri battang.

KALAPPASSANG 12:22

Angngalle mako sisikko' leko'-leko' nampa nutallangngang naung ri katoang nipammoneia anjo cera'na gimbalaka, nampa nupasapu mae ri ruaya benteng pakke'bu'nu siagang irateanganna pakke'bu' balla'nu. Sa'genna bari'basa' tena manna sitau akkulle ambokoi balla'na.

PAMMILANGNGANG 19:18

Lalang ri anjo passala' makase'rea, iamintu punna nia' tau mate lalang ri kemaya, tau tenaya nara'masa' musti angngallei sitangke hisop, nampa najallakkang antama' ri anjo je'neka, nampa napiracciki anjo kemaya siagang sikontu apa-apa niaka lalang, kammayatompa sikamma tau niaka anjoreng. Lalang ri passala' makaruaya, iamintu punna nia' tau nisero ri maya', jera' yareka buku tumate, tau tenaya nara'masa' musti napiracciki anjo tau ra'masaka kamma sumpaeng.

MATIUS 27:34

Battuna anjoreng nasaremi angnginung anggoro' Isa, nicampuruka campurang sannaka pai'na. Mingka Naassenna kasia'na teami Isa angnginungi anjo anggoroka.

MATIUS 27:48

Nia'mo kalase'renna ke'nanga akkaro-karo mange angngalle bunga batu karang, nampa napantama' ri anggoro' kaccia; nampa napasappi' ri cappa' kayu la'bua, na napanai' napa'reppese' mae ri bawaNa Isa.

MATIUS 27:50

Ammarrang lompomi pole Isa, nampa tappu' nyawaNa.

MARKUS 15:36

Nia'mo sitau battu ri ke'nanga linta' mange angngalle bunga batu karang, nampa napantama' ri anggoro' kaccia. Nampa napatinting anjo bunga batu karanga ri se'reang cappa' kayu; na napamange ri bawaNa Isa siagang nakana, “Tayangi, na nicini', maka laniaki battu Elia ampanaungi battu ri anjo kayu sallika.”

LUKAS 23:36

Sikamma surudadua amminawang turu' tommi ancau-caui Isa. Battumi ke'nanga assarei Isa anggoro' kacci;