YOHANES 17:26 - KITTA' MATANGKASA'

²⁶ Le'ba'mi Kupappiassengang arenTa mae ri ke'nanga; na kammaminjo tuli laKugaukang, sollanna tuli napariati ke'nanga pangngamaseanTa mae ri Nakke, naKuasse're siagang ke'nanga.”

YOHANES 17:26 ပူးပေါင်းရင်းမြစ်များ

PAMMUJI 22:22

Tena pakkulleku, Kilappassanga' battu ri tanru'na tedong romanga siagang muncenna singaya.

YOHANES 14:20

Punna narapi'mo wattunna anjo alloa, lanuassemmi angkanaya iNakke asse'reA' siagang Manggea, ikau ngaseng asse'reko siagang iNakke, na Kuasse're siagang ikau ngaseng.

YOHANES 14:23

Appialimi Isa Nakana, “Inai-nai angkamaseangA', lanaturuki ajarangKu. Lanikamaseangi ri ManggeKu. LaniakKa' siagang Manggea battu mae ri ia, ammantang anrurungangi.

YOHANES 15:15

Tenamo naKukio' atako nasaba' se'rea ata tanaassengai apa nagaukanga karaenna. Kukio' sari'battang mako, nasaba' sikontu apa Kulangngereka battu ri Manggea Kupabattui mae ri kau.

YOHANES 15:4

Tuli asse're mako mae ri Nakke, naKutuli asse're todong siagang ikau ngaseng. Takkulleai appasulu' rappo tangke-tangkea, punna tena natuli asse're mae ri poko'na. Kamma ngaseng tommako anjo; iapa nukkulle a'rappo, punna tuli asse'reko siagang iNakke.

YOHANES 15:9

Sangkamma bateNa Manggea angkamaseangA', sangkamma tomminjo Kukamaseannu. Paralluko tuli attallasa' salaku tau Kukamaseanga.

YOHANES 17:23

asse'reA' siagang ke'nanga, na iKatte siagang iNakke, sollanna a'jari se're tojeng-tojeng ke'nanga. Jari lanaassemmi linoa angkana iKatte assuroA', siagang Kikamaseangi ke'nanga, sangkamma KikamaseangKu.

YOHANES 17:6

Le'ba' maKi' Kupappiassengang mae ri sikamma tau battua ri anne lino le'baka Kipassareang ri Nakke. IKatte ngaseng pata anjo ke'nanga, na le'ba' ngasemmo Kipassareang ke'nanga mae ri Nakke. Naturukimi ke'nanga kananTa.

YOHANES 17:8

Le'ba'mi Kupabattu ri ke'nanga kana-kana Kipabattua mae ri Nakke, nanatarimamo ke'nanga. Naassemmi ke'nanga, angkanaya iNakke ma'nassa iKatte Kukabattui, siagang tappa'mi ke'nanga angkanaya iKatte assuroA' battu ri linoa.

YOHANES 6:56

Inai-nai angkanrei assingku, siagang inai-nai angnginungi cerakKu, iami a'jari se're siagang iNakke, siagang a'jari se'reMa' siagang kalenna.

YOHANES 8:50

Teai kala'birang untu' KalengKu Kuboya. Nia' se're ampa'boyangA' kala'birangKu, na Iami langngadeli taua.

ROMA 8:10

Mingka punna nia'mo Almasi lalang ri kalennu, manna pole lamate tubunu passabakkang dosa, mingka lanri baji'na passisambungannu siagang Allata'ala, lanisareko ammotere' katallassang ri RohNa Allata'ala.

1 KORINTUS 1:30

KalenNa Allata'ala ampasse'rei katallassannu siagang Isa Almasi. Tete ri Isa Almasi nanipa'jariki' cara'de'. Siagang tete ri Iatommi naNapasibajiki maki' Allata'ala mae ri KalenNa, iamintu Napa'jari maki' umma'Na, kammayatompa Napa'jari bebasa' maki'.

1 KORINTUS 12:12

Almasi sanrapang tubuna taua; anjo tubua se'reji, mingka jai anggotana. Sikontu anjo anggota tubua, manna najai, mingka a'jari se'rei ilalang ri tubua.

GALATIA 2:20

Kamma-kamma anne teaimi kalengku attallasa' mingka Almasi attallasa' ri kalengku. Anne katallassang niaka ri nakke kamma-kamma anne, iamintu katallassang matappa' mae ri Ana'Na Allata'ala, mangngamaseanga ri nakke, siagang le'baka angkoro'bangkangi KalenNa untu' katallassangku.

EFESUS 1:6

Nipujimi Allata'ala lanri la'biri'na kabajikang pa'mai'Na, le'baka allumpa Napa'nyata mae ri katte ri tete Ana'Na Nakarimangngia.

EFESUS 3:17

Naporo lanri tappa'nu mae ri Almasi, nammantammo Almasi lalang ri atinnu; siagang na'jari jarre'mo katallassannu lanri tatta'gala' jarre'namo pangngamaseanga lalang ri kalennu.

EFESUS 5:30

niassengi anjo nasaba' ikatte anggota-anggota tubuNaki' Almasi.)

EFESUS 5:32

Anjo ayaka lantang sikali battuanna. Kupasinrapangi anjo antekamma passisambunganNa Almasi siagang jama'aka.

KOLOSE 1:27

Mae ri anjo umma'Na, eroki Allata'ala ampa'nyatai antekamma baji'na siagang mala'biri'na anjo rahasiaNa untu' sikontu rupataua. Anjo rahasiaya, iamintu: Niaki Almasi lalang ri kalennu; battuanna langgappa tongko bageang lalang ri kalompoanNa Allata'ala.

KOLOSE 2:10

Na lanri asse'renamo katallassannu siagang Almasi, nisare tommako katallassang sukkuka. Nasaba' Almasi a'jari kapala mae ri sikontu roh-roh makoasaya siagang ammarentaya.

KOLOSE 3:11

Kale'bakkanna allanynya'mi sikontu passimmaraenganna tu Yahudia siagang bansa-bansa maraenga, yareka tu nisunnaka siagang tu tenaya nisunnaki; tenamo passimmaraengang ri bansa battu-battua siagang tau bambalaka; tenamo passimmaraengang ri tu a'jari ataya siagang tu bebasaka; nasaba' Almasimi a'jari yangaseng-ngasenna. Asse're ngasemmi ke'nanga lalang ri Almasi!

2 TESALONIKA 2:16

Poro KalenNa Batarata Isa Almasi, siagang Allata'ala Manggeta ansaleoriko siagang ampakajarre' ngasengi atinnu, sollanna akkulle nugaukang siagang nubirittakang apa bajika. Nasaba' Nakamaseangki' Allata'ala, siagang lanri lammoro' pa'mai'Na naNasareki' kabaraniang tojenga siagang panrannuang bajika.

IBRANI 2:12

Nakana Isa mae ri Allata'ala, “LaKubirittakangi mae ri sikamma sari'battangKu ri sesena iKatte. LamammujiA' mae ri Katte ri tangnga-tangngana passe're-se'reanna ke'nanga.”

1 YOHANES 3:24

Sikontu tau mappilangngeria mae ri sikamma parentaNa Allata'ala, asse'rei mae ri Allata'ala lalang ri katallassanna, siagang asse're tongi Allata'ala mae ri katallassanna. Na niasseng angkanaya asse'rei Allata'ala mae ri katallassanta, lanri le'ba'mi Napassareang RohNa mae ri katte.