YOHANES 15:24 - KITTA' MATANGKASA'

²⁴ Ebara' angkana tenapa naKugaukangi apa-apa takkullea nagaukang tau maraenga ri tangnga-tangngana ke'nanga, tenaja nadoraka ke'nanga. Mingka kamma-kamma anne nacini'mi ke'nanga apa Kugaukanga, nanakabirisi ijA' siagang Manggea.

YOHANES 15:24 ပူးပေါင်းရင်းမြစ်များ

PAMMUJI 81:15

lalintakKa' ampatunduki musunna ke'nanga, naKubeta sikontu balinna ke'nanga.

KALAPPASSANG 20:5

Teako anynyombai ri patung kammaya anjo, nasaba' iNakkeji Karaeng Allata'alanu, siagang taerokA' nipasangkamma manna apa-apa mamo. Sikamma tau mangngabirissia mae ri Nakke Kuhukkungi sa'genna jari-jari lapisi' makatalluna siagang makaappa'na.

PANGNGEBARANG 8:36

Inai tena nabuntulukka', napakarugi kalenna; tau birisika ri nakke, natanringi kamateanga.”

MATIUS 11:5

accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, kammayatompa nibirittakammi Kabara' Baji' battua ri Allata'ala mae ri tu kasi-asia.

MATIUS 21:32

Nasaba' battumi Yohanes Paje'ne' ampicinikiang ngasengko carana katallassang Nakaerokia Batara, mingka taerokako tappa' ri pangngajara'na; mingka parentea siagang bai'-baine ja'dalaka tappaki ri ia. Na ikau ngaseng, manna pole nucini' ngasemmi anjo apa kajarianga tena tompa natappinra pikkirannu siagang tena tongija nuero' tappa' ri Batara.”

MATIUS 9:33

Nabongkami Isa assulu' anjo setanga battu lalang ri kalenna anjo tau pepea; sa'genna akkulle memammo silalonna a'bicara anjo tau pepea. Lannasa' ngasemmi tau jaia anciniki anjo kajarianga. Nakanamo ke'nanga, “Tena le'bakapaki' accini' kajariang kammaya anjo lalang ri pa'rasangang Israel!”

MARKUS 2:12

Ambangummi nai' anjo taua, na naalle memang tappere'na, nampa a'lampa assulu' niciniki ri tau jaia. Sanna' ngaseng lannasa'na anjo tau jaia. Ammuji-mujimi ke'nanga ri Allata'ala. Nakanamo ke'nanga, “Tena le'bakkapaki' accini' kajariang kammaya anne!”

LUKAS 24:19

Akkuta'nammi Isa Nakana, “Kajariang apa?” Appialimi ke'nanga angkana, “Anjo apa kajarianga ri KalenNa Isa, battua ri Nazaret. Ia na'bi. Teai sipato' lompona koasaNa, baji' ri kana-kananNa, kammayatompa ri panggaukanNa – baji' ri dallekanNa Allata'ala, kammayatompa ri dallekanna sikamma rupataua.

YOHANES 10:32

Mingka Nakanamo Isa ri ke'nanga, “Nucini' ngasemmi panggaukang baji' le'baka Kugaukang, situru' tugasa' Napassareanga Manggea ri Nakke. Battu ri yangasenna anjo panggaukanga, kereanga a'jari saba' nanusiratang ansambilA' batu?”

YOHANES 10:37

Punna taKugaukanga jamang Napassuroanga Manggea, teako tappaki ri Nakke.

YOHANES 12:10

Lanri kammana minjo naero' tommo imang-imang kapalaya ambunoi Lazarus.

YOHANES 12:45

Na inai-nai anciniki KalengKu, nacini' tommi Ia assuroa ri Nakke.

YOHANES 14:9

Mingka appialimi Isa Nakana, “Teaimi sipato' salloKu nia' ri tangnga-tangnganu, mingka tenapa nanuassengA' Filipus? Inai-nai le'ba'mo ancinikKa', nacini' tommi antu Manggea. Apa saba'na nukkulle angkana, ‘Kipicinikiang sai bedeng ikambe anjo Manggea?’

YOHANES 15:21

Lanagaukang ngasengi anjo kammaya mae ri kau, lanri amminawannu ri Nakke, siagang lanri tenana naassengi ke'nanga angkana inai assuroA'.

YOHANES 15:22

Ebara' angkana tena naKubattu siagang tenapa naKupabattuang ngaseng anjo sikammaya mae ri ke'nanga, tenaja naladoraka ke'nanga. Mingka kamma-kamma anne tenamo alasanna ke'nanga untu' antongkoki dosana ke'nanga.

YOHANES 15:23

Inai-nai angkabirisiA', nakabirisi tommi ManggeKu.

YOHANES 16:9

LaNapakasingaraki angkananaya dorakai tau tenaya natappa' ri Nakke;

YOHANES 3:2

Nia' se're wattu nabattu bangngi mange ri Isa. Nakana ri Isa, “Bapa' Guru, niassemmi angkanaya Allata'ala assuroKi' battu. Nasaba' tenanniakka manna sitau akkulle anggaukangi gau' appakalannasa' sangkamma le'baka Kigaukang, punna tena nanirurungangi ri Allata'ala.”

YOHANES 5:36

Mingka lompoangangi kasa'biangKu na kasa'bianna Yohanes. Apa Kugaukanga ri kamma-kammaya anne, iamintu jama-jamang Napassuroanga Manggea mae ri Nakke, iaminjo a'jari butti, ma'nassana Manggea assuroA' battu.

YOHANES 6:36

“Mingka kamma le'bakamo Kupau ri kau ngaseng, manna pole nucini'Ma', mingka tena nanutappa'.

YOHANES 7:31

Jaimi ri alla'na anjo taua a'jari tappa' ri Isa; nakanamo anne ke'nanga, “jari punna niaki battu anjo Karaeng Mappasalamaka, maka lajaiangangi gau' appakalannasa' Nagaukang naanne taua?”

YOHANES 9:32

Baku' nia'na linoa tenale'bakapi nilangngere' angkana nia' tau amballei tau butaya ri pakkaramula lassu'na sa'genna akkulle accini'.

YOHANES 9:41

Appialimi Isa Nakana, “Ebara' angkana buta ngasengko antu, tenaja nudoraka. Mingka lanri nukanana ngaseng, ‘Accini'jaki' anne’, iaminjo battuanna angkanaya doraka ngasengijako.”

LAMPA-LAMPANA 10:38

Nuassemmi angkanaya le'ba'mi Napile Allata'ala anjo Isa tu Nazaretka, naNapassareang RohNa Allata'ala siagang koasaNa mae ri Ia. Nuasseng tommi angkanaya le'ba'mi a'lampa mange-mange Isa anggaukangi kabajikanga; Naballeimi sa'genna a'jari baji' sikamma tau nasosoka setang, lanri niaki Allata'ala anrurungangi.

LAMPA-LAMPANA 2:22

Sikamma sari'battangku tu Israelka! Pilangngeri anne apa kupaua: Anjo Isa, battua ri Nazaret, nisarei tugasa' ri Allata'ala untu' ikau ngaseng. A'nassa sikalimi anjo lalang ri gau'-gau' appakalannasa' siagang apa-apa tenaya narapiki akkala'nu, le'baka Nagaukang Allata'ala ri tangnga-tangnganu lalang ri KalenNa anjo Isa. Yangasenna anjo massing nuassemmi.

ROMA 1:30

nangai nabotto'-bottoki arenna paranna tau; sanna' ngaseng tampona siagang kurangajara'na ke'nanga; nakabirisi Allata'ala siagang nangai pitikana-kanai ke'nanga. Cara'deki ke'nanga a'boya cara-cara untu' anggaukangi kaja'dallanga. Naewai siagang nabali-bali ke'nanga tau toana;

PAOLE 5:9

Teako anynyombai patung kammaya anjo, lanri iNakke Karaeng Allata'alanu siagang taeroKa' nipasangkamma manna apa-apa mamo maraenganga. Inai-nai angkabirisiA' laKuhukkungi sa'genna mae ri jari-jarina lapisi' matallua siagang makaappaka.

2 TIMOTIUS 3:4

Nangai ke'nanga a'bali'ballang, tena nappikkiri' baji' siagang borroi. Lanangaiangangi ke'nanga kasannanganna linoa namannurukia ri Allata'ala.

YAKOBUS 4:4

Teai ngasengko tau majarre'! Maka nuassengi angkanaya punna agangko mae ri linoa, a'jari musuko mae ri Allata'ala? Jari inai-nai ero' a'jari agang mae ri anne linoa, napa'jarimi kalenna musu mae ri Allata'ala.