YOHANES 14:6 - KITTA' MATANGKASA'

⁶ Appialimi Isa Nakana, “INakkemi oloanga untu' angngassengi Allata'ala, siagang untu' anggappai katallassanga. Tenanniakka tau akkulle battu mae ri Manggea punna tena nangngolo ri Nakke.

YOHANES 14:6 ပူးပေါင်းရင်းမြစ်များ

MATIUS 11:27

Nampa Nakana Isa, “Yangaseng-ngasenna le'ba'mi Kipassareang mae ri Nakke. Tenanniakka manna sitau angngassengi AnatTa, pantaranganna iKatte. Tenanniakka todong angngassengKi', pantaranganna AnatTa, siagang sikamma tau le'baka Kupauang.

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

YOHANES 1:17

Nitarimai HukkunNa Batara, tete ri Musa. Mingka pangngamaseang siagang pangngatutuiNa Allata'ala nipa'nyatami lalang ri Isa Almasi.

YOHANES 1:4

Iaminjo Kanaya nakabattui katallassanga, na iaminjo katallassanga assingari rupataua.

YOHANES 10:28

Kusarei ke'nanga katallassang satunggu-tunggua, natena nalapanra' ke'nanga sa'genna satunggu-tungguna. Tena manna sitau akkulle angngalle passai ke'nanga battu ri limangKu.

YOHANES 10:7

Sikalipa pole Nakana Isa, “Annaba tojengi anne kanangKu: INakkemi timungang naoloa gimbalaka.

YOHANES 10:9

INakkemi timungang. Inai-nai ammalo battu ri Nakke antama', iami lanipasalama'; assulu' antamai nanggappa kanre.

YOHANES 14:19

Sinampe' mami natenamo nakkulle linoa ancinikKa'. Mingka ikau ngaseng lanucinikKa'. Na lanri attallasakKa', iaminjo nuttallasa' ngaseng todong.

YOHANES 15:1

Nakanamo pole Isa, “INakkemi sanrapang poko' anggoro' sitojennaya, na ManggeKu a'jari Tummarakaina ri kokonNa.

YOHANES 18:37

Akkuta'nammi Pilatus nakana, “Jari punna kamma, KaraengKo padeng?” Appialimi Isa Nakana, “Nupaumi angkanaya iNakke anne karaengA'. Se'reji pattujunna naKunilassukang siagang naKubattu ri anne linoa, iamintu ampabattui katojenganga. Inai-nai battu ri anjo katojenganga iami lampilangngeriA'.”

YOHANES 5:21

Anjo Manggea ampabangungi tau matea naNasare ke'nanga katallassang sitojennaya siagang mannannunganga; kammayatompa anjo Anaka assarei katallassang mannannungang tau eroka Nasare katallassang.

YOHANES 6:33

Nasaba' roti Napassareanga Allata'ala, Iamintu niaka manurung battu ri suruga, siagang assarea katallassang mae ri rupataua.”

YOHANES 6:51

INakkemi roti manurunga battu ri suruga iamintu roti assarea katallassang. Tau angkanreai anne rotia lattallasaki satunggu-tungguna. Roti laKupassareanga iamintu KalengKu, untu' katallassanna rupataua ri lino.”

YOHANES 6:57

Anjo Mangge attallasaka, Iami assuroA' battu, siagang ri Iatommi anjo Manggea naKuattallasa'. Sangkamma tommi anjo, inai-nai angkanreai assingKu labattu ri Nakkemi nattallasa'.

YOHANES 6:68

Nakanamo Simon Petrus ri Ia, “O Batara, inaimi lanamangei ikambe? Kana-kananTa assarei katallassang mannannungang.

YOHANES 8:32

lanuassemmi Allata'ala tojenga, siagang lanri kammana minjo nula'jari maradeka.”

YOHANES 8:51

Annaba tojengi anne Kukanaya: inai-nai anturuki kanangKu tena nalamate sa'genna satunggu-tungguna.”

LAMPA-LAMPANA 3:15

Nubunoi anjo Isa, na sikontutojenna Iami kabattuanna katallassanga untu' sikontu rupataua. Mingka nipattallasa' poleammi ri Allata'ala battu ri kamateanga. Kalennami ikambe anciniki anjo apa kajarianga.

LAMPA-LAMPANA 4:12

Lalang bawang ri Isa nakkulle nipasalama' rupataua. Nasaba' ri sikontu anne linoa, tenanniakka se're tau le'ba' nisare koasa ri Allata'ala untu' ampasalamakki', pantaranganna Isa Almasi.”

LAMPA-LAMPANA 9:2

nappala' sura' koasa untu' lanapake a'lampa mae ri pamimping-pamimpinna balla' sambayanna tu Yahudia ri Damsyik. Sollanna, punna nia' tau tappa' ri Isa nagappa anjoreng, akkullei najakkala' ke'nanga, nampa naerang mange ri Yerusalem.

ROMA 15:16

Napa'jarima' palayanNa Isa Almasi, sollangku nisuro mae ri bansa pantaranganna bansa Yahudia, iamintu bansa-bansa maraenga. Nipa'jarima' imang sollanna kubirittakang Kabara' Baji' battua ri Allata'ala mae ri ke'nanga, sollanna akkulle ke'nanga nitarima a'jari koro'bang mae ri Allata'ala. Kuminasai ke'nanga nanitangkasi ri RohNa Allata'ala, sollanna akkulle a'jari koro'bang matangkasa' mae ri Allata'ala.

ROMA 5:2

Nasaba' tappa' maki' mae ri Isa Almasi, nisare maki' pakkulle ampahang bajiki pangngamaseanNa Allata'ala, siagang lanri iaminjo pangngamaseanga nakiattallasa' kamma-kamma anne. Lanri kammaminjo narannumo pa'maitta, nasaba' nia'mo panrannuanta angkanaya akkullei nikasia' mate'nea, laNapassareanga Allata'ala!

ROMA 5:21

Jari sangkamma angkanaya musti mateki' passabakkang nigaukanna dosaya, sangkamma tomminjo Nasare maki' oloang Allata'ala sollanta assibajiki ammotere' siagang Ia, lanri mangngamaseanNa mae ri katte. Na lanri baji'mi ammotere' passisambunganta siagang Allata'ala, laNasare tommaki' katallassang mannannungang tete ri Isa Almasi, Batarata.

1 KORINTUS 15:45

Nia' tattulisi' lalang ri Kittaka angkanaya, “tau riolo dudua, iamintu Adam, a'jari tu mattallasa',” mingka ia Adam kala'busanga iamintu Roh assarea katallassang.

EFESUS 2:18

Tete ri Almasi, siagang lanri RohNa Allata'ala se'rea, akkulle maki' a'reppese' mae ri Manggea, baji' na tu Yahudi yareka bansa maraenga.

KOLOSE 2:17

Yangasenna anjo poro bayang-bayannaji bawang apa-apa labattua; mingka lampa'nyatayai sikammaya anjo iamintu Almasi!

KOLOSE 2:9

Nasaba' sikontu batangkalenNa Allata'ala nia'mi lalang ri KalenNa Almasi, iamintu lalang ri ma'rupataua.

KOLOSE 3:4

Jari, assala'na katallassannu sitojenna iamintu battu ri Almasi; na punna a'nyatamo Almasi sallang, la'nyata tommako siagang Ia lalang ri kalompoanNa.

IBRANI 7:25

Lanri kammanami anjo nakkulle Isa sa'genna satunggu-tungguna ampasalamaki sikontu tau battua mae ri Allata'ala tete ri KalenNa; nasaba' attallasaki satunggu-tungguna sollanna akkulle Napappala'-palakkang sikamma anjo taua mae ri Allata'ala.

IBRANI 9:8

Ilalammi ri anne atoranga, Napappicinikang RohNa Allata'ala sa'genna singara' angkanaya ilalang nia'na ija ammenteng bageang dallekanna anjo pammantanganga, tenapa natassungke oloang antamaya mae ri anjo Kamara' Kaminang Matangkasaka.

1 PETRUS 1:21

Tete ri Iami nanutappa' mae ri Allata'ala, le'baka ampattallasa' poleangi battu ri kamateanga siagang le'baka ampakala'biriki. Jari, Allata'alami nupatappa', siagang ri Allata'ala tommi le'ba' nupadongko' panrannuannu.

1 PETRUS 2:4

Lanri kammana, battu mako mae ri Batara. Iami sanrapang batu mattallasaka, iamintu batu nipelaka ri rupataua lanri nakana tena matu-matunna; mingka nipilei ri Allata'ala a'jari batu lompoa anggaranna.

1 PETRUS 3:18

Nasaba' le'ba'mi sikali mate Almasi untu' satunggu-tungguna passabakkang dosana rupataua; Ia tena salanna mingka matemi untu' tau salaya. Nagaukammi Almasi kammaya anjo sollannu akkulle Narurungang ngaseng mae ri Allata'ala. Nibunomi tubuNa, mingka nipattallasa' poleammi ammotere' katallassang rohaniNa.

1 YOHANES 1:8

Punna nikana tena nakidoraka, niballe-balleimi kalenta; taniassengami Allata'ala lalang ri atinta.

1 YOHANES 2:23

Inai-nai tena namangakui Anaka, ma'nassa tena tommo namangakui Manggea. Na inai-nai ammangakui Anaka, ma'nassa namangakui tommi Manggea.

1 YOHANES 5:20

Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga.

1 YOHANES 5:6

Iaminjo Isa Almasi, antamaka ri anne linoa angngerang je'ne' lanapa'je'neka siagang cera' kamateanNa. Tena naje'ne' bawang Naerang battu, mingka je'ne' siagang cera'. Na KalenNa RohNa Allata'ala a'jari sa'bi angkanaya kammatojengi anjo; nasaba' iaminjo Roh kontutojenga.

2 YOHANES 1:9

Inai-nai tena nanna'gala' jarre' mae ri pangngajaranNa Almasi, passangalinna ammengkai battu ri apa le'baka Napangngajarrang, anjo taua tena Allata'alana. Inai-nai tuli anna'gala' mae ri pangngajaranNa Almasi, natarima tommi Allata'ala Manggea siagang pole Anaka.

PAPPICINI' 1:5

siagang battu ri Isa Almasi, sa'bi tamamminraya. Iami uru-uru nipattallasa' poleanga ammotere' battu ri kamateanga siagang Iami makoasaya irateanganna sikamma karaeng niaka ri lino. Nakamaseangki' Isa, siagang lanri kamateanNa naNapata'lappasa' maki' battu ri dosa-dosata ngaseng.

PAPPICINI' 19:11

Tassungkei kucini' surugaya, nampa nia' kucini' sikayu jarang kebo'. PabaeNa niarengi I Tamamminraya siagang I Tojeng. Adeleki hukkungang Natappukia siagang pa'bundukang Nagaukanga.

PAPPICINI' 20:15

Sikamma tau tenaya natattulisi' arenna lalang ri Kitta'na Tau Attallasaka, lanipela' ngasemmi antama' ri tamparang pepeka.

PAPPICINI' 22:1

Napicinikiang tomma' anjo malaekaka binanga assarea katallassang je'ne'na. Anjo binangaya accillaki je'ne'na sanrapang kaca a'lo'loroka battu ri empoang kala'biranNa Allata'ala siagang battu ri anjo Ana' Gimbalaka,

PAPPICINI' 22:17

Nakanamo RohNa Allata'ala siagang Bunting Bainea, “Mae mako!” Sikamma allangngerekai musti angkana tongi, “Mae mako!” Inai-nai turere, battu mako mae! Siagang inai-nai ero' mae mako angngalle cuma-cuma je'ne' katallassang!

PAPPICINI' 3:14

“Untu' mae ri malaeka'na jama'ah Laodikia, tulisiki kamma anne: Iaminne pappasang battua ri Aminga, Sa'bi tojenga siagang tamamminraya, kabattuanna sikontu apa Napa'niaka Allata'ala.

PAPPICINI' 3:7

“Untu' mae ri malaeka'na jamaah ri Filadelfia, tulisiki kamma anne: Iaminne pappasang battu ri Ia matangkasaka siagang kontutojenga. Iami anta'galaki konci battua ri Daud; punna Nasungkei pakke'buka, tena manna sitau akkulle antongkoki, siagang punna Natongkoki, tena manna sitau akkulle ansungkei.