YOHANES 12:20 - KITTA' MATANGKASA'

²⁰ Ri alla'na anjo tau jaia a'lampa mange ri Yerusalem ero' assambayang ri wattunna passua'-suarrang, nia' todong siapa are tu Yunani.

YOHANES 12:20 ပူးပေါင်းရင်းမြစ်များ

YESAYA 11:10

Nia' sallang se're wattu nalabattu sitau karaeng turunganna Daud, a'jari tau niparhatikang ri sikontu bansaya. Labattui ke'nanga mae ri ia, siagang sanna' nipakalompona pammantanganna.

MARKUS 7:26

Nampa napala' dudu ri Isa sollanna Nabongka assulu' anjo setanga battu lalang ri ana'na. Anjo bainea teai tu Yahudi. Anjorengi ri daera Fenisia, pa'rasangang Siria, nilassukang.

YOHANES 12:1

Ri annangallonapi nanarapiki Allo Lompona Paskaya, a'lampami Isa mange ri Betania. Anjorengi ammantang Lazarus, anjo le'baka Napattallasa' poleang Isa battu ri kamateanna.

YOHANES 12:19

Jari nakanamo tu Farisia massing para ia, “Tena apa-apa akkulle nigaukang! Cini'mi lari ngasemmi bonena linoa amminawang ri Ia!”

YOHANES 7:35

Nakana ngasemmo tukoasana tu Yahudia, massing para ia, “La'lampa kemaei anne taua nitakkullea ambuntuluKi? Apa eroKi a'lampa mange ri tu Yahudi pantarang pa'rasanganga, ri pa'rasanganna tu Yunania, naero' Naajara' tu Yunania?

LAMPA-LAMPANA 14:1

Kammatommi anjo kajarianga ri Ikonium. A'lampa tommi Paulus siagang Barnabas ri balla' sambayanna tu Yahudia; na'bicara kamma tommo anjo, sa'genna jai sikali tu Yahudi siagang bansa maraenga a'jari tappa' ri Isa.

LAMPA-LAMPANA 16:1

Napatulusu'mi lampana Paulus mange ri Derbe, nampa mange ri Listra. Anjoreng nia'mo se're tu tappa' ri Isa niareng Timotius. Amma'na tu Yahudi, tappakamo ri Isa; mingka manggena tu Yunani.

LAMPA-LAMPANA 17:4

Nia'mo siapa are tau a'jari tappa', nampa amminawang ri Paulus siagang Silas; kammayatompa jai todong tu Yunani mallaka ri Allata'ala, siagang bai'-baine nibilang tutoaya, a'jari tappa' todong.

LAMPA-LAMPANA 20:21

Baji' namae ri tu Yahudia, yareka mae ri bansa-bansa maraenga, tuli kupakainga' ngasemmi sollanna massing toba', battu ri dosa-dosana ke'nanga nabattu mae ri Allata'ala siagang tappa' mae ri Isa.

LAMPA-LAMPANA 21:28

Nakkio' ke'nanga angkana, “He, tu Israelka, bantu saiki'! Iaminne tau le'baka a'lampa mange-mange angngajaraki sikontu taua pangngajarang angngewai bansa Israelka, siagang andakkai sikamma parentaNa Allata'ala, le'baka napabattu Musa; kammayatompa nahina tongi anne Balla'Na Batara. Na kamma-kamma anne ba'lalo naerammi bansa-bansa maraenga antama' ri Balla'Na Batara, anra'ma'-ra'massi anne tampa' matangkasaka!” (

LAMPA-LAMPANA 8:27

A'lampami Filipus. Anjo wattua nia' sitau pagawe balla' lompoa ri Etiopia, sitabang lalang pa'lampanna ammotere' mange ri pa'rasanganna. Anjo taua pagawe tinggi, anta'galakai sikontu pa'barang-baranganna Kandake, karaeng bainea ri Etiopia. Anjo taua battumi ri Yerusalem, untu' anynyomba ri Allata'ala. Na anjo wattua ammotere'mi siagang ratei a'dongko' ri karetana. Lalang ammempona rate ri karetana, sitabangi nabaca Kitta'na Na'bi Yesaya.

ROMA 1:16

Inakke tappa' sikalia' mae ri anjo Kabara' Bajika, lanri iaminjo kabara' kakoasanNa Allata'ala eroka ampasalamaki sikontu tau tappaka; uru-uruna iamintu bansa Yahudia, nampa bansa maraenga pole.

ROMA 10:12

Anne nataba ngasengi sikontu rupataua; nasaba' tena simmaraenna tu Yahudia siagang bansa-bansa maraenga. Anjo Allata'ala se'rea, Bataranai sikontu rupataua. Napassareangi barakka'Na alla'bia jaina mae ri sikamma tau appala' tulunga mae ri Ia.

GALATIA 2:3

Anjo Titus, kuaganga sipa'lampang, tu Yunani. Mingka tena nanipassai anturuki paratoranna sunnaka;

GALATIA 3:28

Lalang ri kammana anjo tenamo nanipasimmaraengi tu Yahudia siagang bansa-bansa maraenga, yareka ataya siagang tau bebasaka, yareka tu bura'nea na tu bainea. A'jari se're ngaseng mako lanri Isa Almasi.

KOLOSE 3:11

Kale'bakkanna allanynya'mi sikontu passimmaraenganna tu Yahudia siagang bansa-bansa maraenga, yareka tu nisunnaka siagang tu tenaya nisunnaki; tenamo passimmaraengang ri bansa battu-battua siagang tau bambalaka; tenamo passimmaraengang ri tu a'jari ataya siagang tu bebasaka; nasaba' Almasimi a'jari yangaseng-ngasenna. Asse're ngasemmi ke'nanga lalang ri Almasi!