YESAYA 9:18 - KITTA' MATANGKASA'

¹⁸ Sanna' larroNa Batara Kaminang Koasaya, na hukkunganNa rapangi pepe' a'rinra lompo; nampa anjo bansaya napare' kayu tunuang sa'genna cappu' nakanre pepe'. Tena manna sitau angkamaseangi sari'battanna.

YESAYA 9:18 ပူးပေါင်းရင်းမြစ်များ

1 KARAENG-KARAENG 16:21

Kajariammi passisala-salanga ri bansa Israel lanri nia' ero' sollanna Tibni, ana'na Ginat, a'jari karaeng, mingka nia' todong ero' sollanna Omri a'jari karaeng.

PAMMUJI 37:20

Mingka tu ja'dalaka lapossoki, musunNa Batara lalanynyaki sanrapang bunga ri paranga, lalanynyaki ke'nanga lalang umbua.

PAMMUJI 68:2

Ammentemmi Allata'ala ampasisa'la'-sa'laki musunNa, tau birisika ri Ia larimi battu ri dallekanNa.

PAMMUJI 83:14

O, Allata'ala, pasimbung laloi ke'nanga sanrapang limbu'bu', sanrapang rarame niirikanga ri anging.

YESAYA 1:31

Rapangi rarame akkanrea lanri nitaba ri racci' bara pepe', kamma tomminjo sikamma tukoasaya lanipanraki lanri panggaukang-panggaukang kalenna tonji ke'nanga, iamintu kaja'dallanna ke'nanga. Nampa tena tau akkulle ampamari anjo kaancuranna.

YESAYA 1:7

Pa'rasangannu nipanrakimi; kota-kotanu la'busu'mi nitunu. Ri dallekang matannui nialle tampa'nu ri bansa maraeng siagang naancuru' ngaseng sikamma apa niaka.

YESAYA 26:11

O, Batara, sadia maKi' langhukkungi musunTa, mingka tanaassengai kalenna ke'nanga. Lappassammi ke'nanga ammakkala' kacci anciniki pangngamaseanTa mae ri ummatTa. Lappassammi ke'nanga cappu' niancuru' ri hukkungang Kisadiakanga mae ri ke'nanga.

YESAYA 27:4

Tenamo naKularro. Ebara' angkana nia' ruku' yareka rompo' katinting, laKupa'lanynyaki, laKutunui sa'genna cappu' ngaseng.

YESAYA 3:5

Lamassing sijalla'-jallakkangi taua. Tau rungkaya tanajampangiai tau toaya, siagang tau ca'dia tanajampangiai tau lompoa.

YESAYA 30:30

LaNapappilangngerangi Batara sa'ra mala'biri'Na, nampa tunggala' taua lanakasiaki koasaNa hebaka. KalarroanNa lappabattui pepe' appamutunga, bosi lompo, bosi batu siagang anging lompo.

YESAYA 30:33

Battu riolo iji nale'ba'mo nipasadia tampa' pattunuanna karaeng Asyur. Anjo tampaka lantangi naluara', rassi kayu tunuang attambung-tambung. LaNaparinrai Batara nampa nappasa'Na Napatui' sangkamma batu a'rinra assulu' ri nappasa'na.

YESAYA 33:12

Rapangko batu karang nitunua, lanipa'jari pa'leo'; rapang rompo' katinting nibattasaka nampa nitunu lalang ri pepeka.

YESAYA 33:14

Sikamma tau dorakaya ri Sion lannekkereki napakamma malla'. Nakana ke'nanga, “KaputusanNa Allata'ala rapangi pepe' a'rinraya sa'genna satunggu-tungguna. Maka nia' tau akkulle attahang lalang ri anjo pepe' appakaancuruka?”

YESAYA 5:24

Nutollaki ajaranNa Batara Kaminang Koasaya, na nuhina parentaNa Allata'ala matangkasa'na tu Israel. Lanri kammana anjo, rapang rarame siagang ruku' kalotoro' la'busu' nakanre pepe', kamma tomminjo aka'-aka'nu la'jari bottoki, bunga-bungannu la'jari kalotoroki na la'busu' nairi' anging.

YESAYA 50:11

He ikau ngaseng tau ancilakaiyai parannu tau, lanipanrakiko lanri ri rancana kalennu tonji. Batara ampareki anjo kajarianga kammaya, lasannaki batenu nisessa.

YEREMIA 9:3

siagang tau tuli sadia a'balle-balle. Ri sikontu pa'rasangang, tena koasana katojenganga, ba'lalo kajekkonganga teai sipato' jaina. Nakana Batara, “Tena ammari-marina ummakKu anggaukangi kaja'dallanga, tena naaniA' salaku Allata'alana ke'nanga.”

HOSEA 13:3

Lanri kammana anjo lalanynya' kabusuki anjo taua rapang allung yareka saliuka ri wattu bari'basa'na alloa. Lasanrapangi ke'nanga limbu'bu' niri'bakang ri anging ri panggilingang gandunga, siagang sanrapang umbu assuluka battu ri rateanna pattunuanga.

YO"EL 2:20

Anjo pasukang katimbang niaka battu wara' laKubongkai, sipa'gang Kuondangi mange ri parang kassika. Mange ri Tamparang Matea laKulusuru' barisang ri dallekang, mange ri Tamparang Tangngaya Kusorong barisang ri bokoanna. La'rasai sikamma bakkena. Kuancuruki ke'nanga lanri le'ba'na ke'nanga ansessa ngasengko.

YO"EL 2:3

Rapang pepe' akkanrea siagang appakamutung naputtai ke'nanga sikontu lamung-lamunga. Riolo, anjo pa'rasanganga rapangi Eden, iamintu kokonNa Batara, kale'bakkanna, santanja'mi parang kassi' kalotoroka. Tenamo nia' ammantang tassesa, tena sikali ta'lappasa' battu ri pa'bakkaina ke'nanga.

AMOS 7:4

Anggappa' se're paccini' pole battu ri Batara Kaminang Tinggia. Kuciniki sadia-sadia untu' anghukkungi umma'Na siagang pepe'. Anjo pepeka nalepaki tamparanga sa'genna la'busu' irawa ri buttaya siagang appakkaramulami napammutung kokoa.

OBAJA 1:18

UmmakKu Israel larapangi pepe' angkanrei jari-jarina Esau, rapang pepe' angkanreai sa'genna cappu' raramea ri kokoa. Tena manna sitau battu ri jari-jarina Esau akkulle lata'lappasa'. INakke, Batara anne akkana!

NAHUM 1:10

Lanitunuko rapang rarame kalotoro' kontu rompo' akkatinting sikalasaka.

NAHUM 1:6

Inai akkulle attahang punna larro Batara? Inai akkulle ta'lappasa' battu ri pangngalarroinNa? Napa'betteseki larroNa a'rinraya ancuruki batua a'jari limbu'bu' ri dallekanNa.

MALEAKHI 4:1

Nakana Batara Kaminang Koasaya, “Labattui sallang allonNa nasikontu tau tampoa siagang tau ja'dalaka nitunui rapang rarame. Ri anjo alloa lanitunui sa'genna la'busu' ke'nanga, siagang tenamo ke'nanga latassesa.

MATIUS 25:41

Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na!

PAOLE 32:22

A'rinrai larroKu rapang pepe' ampakamutungi sikamma apa niaka mattompo' butta; a'le'lereki pepeka sa'genna sirinna langika, antunui monconga sa'genna aka'-aka'na.

IBRANI 6:8

Mingka punna rea siagang ruku'-ruku' akkatinting wassele'na anjo buttaya, tenamo matu-matunna anjo buttaya siagang lanitunrai sallang ri Allata'ala nampa ri kala'busanna lanitunui sa'genna la'busu'.

PAPPICINI' 14:11

Anjo umbunna pepe' ansessayai anjo taua lanaiki turus sa'genna satunggu-tungguna. Allo bangngi tena nale'ba' ammari nisessa ke'nanga, iamintu sikamma tau anynyombaya ri anjo olo'-oloka siagang patunna, sikamma tau niaka pammateina areng battu ri anjo olo'-oloka.”