YESAYA 51:5 - KITTA' MATANGKASA'

⁵ A'reppese'mi kasalamakkang laKupassareanga; a'birimmi battu pammetangKu. KalengKu lammarenta mae ri bansa-bansaya. Sikamma pa'rasangang bellaya natayang-tayangA' siagang naminasai gau' malompoKu.

YESAYA 51:5 ပူးပေါင်းရင်းမြစ်များ

PAMMUJI 110:6

LaNahukkungi bansa-bansaya, sa'genna tassiara' maya'na ngaseng. Lapapossoki sikamma tukoasaya ri sikontu linoa.

PAMMUJI 67:4

Poro mammuji bansa-bansaya mae ri Katte, o, Allata'ala, poro appala' sukkuru' ngasengi sikontu bansaya mae ri Katte.

PAMMUJI 85:9

Erokka' ampilangngeri kananNa Karaeng Allata'ala; Napa'janjiangi kasalewanganga mae ri katte, umma'Na, assala' tenaja nigaukang poleangi dosaya.

PAMMUJI 96:13

Saba' Batara battu ammarenta ri lino, laNaadeli bansa-bansaya siagang adele' na lambusu'.

PAMMUJI 98:9

Saba' battui untu' angngadeli linoa; bansa-bansaya laNaadeli siagang adele' na tojeng.

YESAYA 11:11

Anjo alloa laNapakei pole sikalipa kakoasanNa Batara siagang Naerang umma'Na niaka tassesa battu ri Asyur siagang battu ri Mesir, ri pa'rasangang-pa'rasangang Patros, Sudan siagang Elam, ri Babel, Hamat siagang pulo-pulo bellaya.

YESAYA 24:15

na tau niaka ri bageang iraya lamammuji mae ri Ia. Pandudu' niaka ri biring tamparanga lanapakala'biriki Batara, Allata'alana Israel.

YESAYA 26:4

Tuli tappa' mako mae ri Batara, saba' Karaeng Allata'ala tuli anjagaiki'.

YESAYA 33:2

O, Batara, Kikamaseang laloi ikambe. IKattemi panrannuanna ikambe. Kijagai ikambe ri tunggala' alloa, siagang pasalamaki ikambe ri wattu kasukkaranga.

YESAYA 33:22

Sikontu pakkakasa' niaka ri kappala'na ke'nanga tena ngaseng matu-matunna; sikamma sombala'na takkulleai nipaka'rang! Sikontu kakalumanynyanganna pasukang musua lanirampasaki, teai sipato' jaina, sa'genna manna tau pesoka anggappa ngaseng bageang. KalenNa Batara la'jari karaenta; Ia lammarenta, ampaentengi hukkunga siagang ampasalamakki' battu ri musua.

YESAYA 40:10

Ciniki, battui Karaeng Allata'ala siagang koasaNa ero' anggaukangi kaporeanNa. Nirurungang ri sikamma tau le'baka Nalappassang.

YESAYA 42:4

tena naranggasela yareka tappu' minasa, sa'genna nipaenteng kaadelanga ri lino. Sikamma pa'rasangang bellaya nakkuki ri pangngajarranna.”

YESAYA 46:13

LaKupa'reppeseki allo kalappassanga, talanipammonokami wattu kasalamakkang laKupassareanga. LaKupasalamaki Yerusalem, siagang Kusare Israel kalompoang.”

YESAYA 49:1

Pilangngeria', he sikamma pa'rasangang bellaya parhatikangi kana-kanangku. Nakio' memamma' Batara ri tenanapa kunilassukang, Napile memamma' bakukku nitianangngang.

YESAYA 54:17

Mingka sikamma sanjata nipareka untu' ambaliangko, tena ngaseng nala'matu-matu. Na sikamma tuduhang ri kalennu ri pangadelanga lanupa'butti angkanaya sala ngasengi. INakke lassareko hadia pammetang ikau sikamma atangKu,” kammaminjo kananNa Batara.

YESAYA 56:1

Nakana Batara ri umma'Na, “Gaukangi apa adeleka siagang apa situruka siagang hukkungKu. Saba' sinampe' mami naKubattu ampasalamakko na nipa'nyata kaadelangKu.

YESAYA 59:16

Lannasaki lanri tenana tau maju siagang tenana appattojeng. Jari Napakemi kakoasang KalenNa untu' ampasalamaki siagang assarei ke'nanga pammetang.

YESAYA 60:9

Iaminjo sikamma kappala' battua a'labu angngerangi umma'Na Batara ammotere' battu ri pa'rasangang bella. Angngerang tongi pera' siagang bulaeng untu' mammuji ri Karaeng Allata'alanu; mae ri Allata'alana Israel Kaminang matangkasaka, ampa'jariai umma'Na nipakalompo.

YESAYA 62:11

Napassareangi Batara anne pasanga mae ri sikontu cappa'na buttaya, angkana, “Pabattui mae ri pandudu'na Sion angkana, ‘Ciniki, battumi Batara Mappasalamaka! Nirurungang ri sikamma tau le'baka Nalappassang.’ ”

YESAYA 63:5

A'boyA' tau, mingka tena akkulle antulungA', lannasakKa' lanri tenana akkulle ambantuA'. Nampa kagassingang KalengKu antulungA', kalarroangKu ambantuA'.

YO"EL 3:12

Nakana pole Batara, “Sikamma bansaya musti sadiai siagang a'lampai mange ri Ka'bung Pangadelanga. AnjorengA' langngadeli bansa-bansa singngampi'na ummakKu.

ZEFANYA 2:11

LaNapa'jari Batara malla' ke'nanga. LaNaancuruki rewata-rewata niaka ri tompo'na buttaya. Nampa sikontu bansaya lanynyombai mae ri Batara, massing ri pa'rasanganna ke'nanga.

MATIUS 28:18

A'reppese'mi Isa ri ke'nanga, na Nakana, “Sikontu koasaya, ri suruga siagang ri linoa le'ba' ngasemmi nipassareang ri Nakke.

MATIUS 3:2

“Toba' ngaseng mako battu ri gau' dosa-dosanu, nasaba' tasalloami nappakkaramulamo ammarenta Allata'ala, salaku Karaeng!”

MARKUS 16:15

Nakanamo Isa ri ke'nanga, “A'lampamako mange ri sikontu linoa, siagang pa'la'bammi Kabara' Baji' battua ri Allata'ala, mange ri sikontu rupataua.

LUKAS 24:47

Kammayatompa, lalang arenNa anjo Karaeng Mappasalamaka, musti nibirittakangi mae ri sikontu bansaya angkanaya musti tobaki sikontu rupataua, kammayatompa Napammopporangi Allata'ala dosa-dosaya. Na anjo birittaya, musti nipabattui appakkaramula battu ri Yerusalem.

LAMPA-LAMPANA 17:31

Nasaba' le'ba'mi Napattantu wattunna nalaNaadeli sikontu bonena anne linoa siagang adele'. Anjo tugasaka lanagaukangi tau le'bakamo nipile ri Allata'ala untu' anggaukangi anjo tugasaka. Na sollanna akkulle tappa' ngaseng taua ri anjo passalaka, Napattallasa' poleammi Allata'ala anjo taua battu ri kamateanga!”

ROMA 2:16

Kammaminjo lakajarianga sallang ri allo le'bakamo nipattantu. Ri anjo alloa – situru' Kabara' Baji' kubirittakanga – laNaadeli Allata'ala lalang Isa Almasi rahasia atinna siagang rahasia pikkiranna sikontu rupataua.

2 KORINTUS 5:10

Nasaba' attantumi angkanaya lanierangki' mange andallekang ri pangadelanNa Almasi; siagang massing langgappa maki' pa'balasa' situru' apa le'baka nigaukang ri linoa anne, iamintu panggaukang baji' yareka panggaukang ja'dala'.

PAOLE 30:14

Teako akkuta'nang kammai, nasaba' anjo parentaya niaki anrinni. Nuapele'mi siagang akkullemi nupau, jari poro lanugaukang mami.

1 SAMUEL 2:10

Musu-musunNa Batara ancu'-ancuruki, mallaki ke'nanga; a'gunturuki battu ri langika. Batara angngadeli sikontu anne linoa, na Nasare koasa mala'biri' ri karaeng Nipilea.”