YESAYA 17:10 - KITTA' MATANGKASA'

¹⁰ O, Israel, nukaluppaimi Allata'ala le'baka ampasalamakko siagang alla'langiko sanrapang moncong batu kassaka. Kabalekanna, nulamungimi kokonnu untu' rewata-rewataya.

YESAYA 17:10 ပူးပေါင်းရင်းမြစ်များ

YEREMIA 2:32

Maka nia' tulolo angkaluppai belo-belona, yareka bunting baine angkaluppai baju buntinna? Mingka ikau sallo sikaliMa' nukaluppai – takkulleami nirekeng angkana siapami sallona.

YESAYA 26:4

Tuli tappa' mako mae ri Batara, saba' Karaeng Allata'ala tuli anjagaiki'.

PAOLE 32:18

Nabokoi ke'nanga Allata'ala Mappasalama'na ke'nanga; nakaluppai Allata'ala assarea katallassang.

PAMMUJI 106:21

Nakaluppai ke'nanga Allata'ala Mappasalama'na ke'nanga le'baka anggaukangi gau'-gau' malompoa ri Mesir.

PAOLE 32:4

Batara Mappasalama'nu maporea, adeleki na sukku' baji' sikontu oloanNa. Allata'alanu tamamminra pa'mai'Na na matulusu' ri nyawa, manggaukangi ri bajika na ri siratanga.

HOSEA 8:14

Ambangungi tu Israel siapa jaina balla' karaeng, mingka nakaluppai ke'nanga angkana inai ampa'jari kalenna. Natambai tu Yehuda kota-kota pattahanganna napila' jai, mingka lappaturungA' pepe' untu' antunui sa'genna cappu' sikamma balla' lompona siagang kota-kotana ke'nanga.”

YEREMIA 17:13

Batara, iKatte panrannuanna Israel, ummatTa; sikontu a'bokoa ri Katte la'jari siri'-siri' ngasengi. Lalanynyaki ke'nanga battu ri anne linoa nampa a'lampa mange ri linona tau matea. Nasaba', iKatte kabattuanna je'ne' katallassanga le'ba' maKi' nabokoi, o Batara.

YEREMIA 12:13

UmmakKu appakioroki gandung, mingka katinting nagappa. Akkareso lompoi ke'nanga, mingka tena nanggappa wassele' ri usahana ke'nanga. Teai sitapo' larroKu sa'genna sala ngaseng kattoanna ke'nanga!”

YESAYA 51:13

Maka lanukaluppai Batara Mapa'jarinu angka'rangai langika siagang ampadongkokai dasara'na buttaya? Angngapa nunnekkere' sila'busu' allo mae ri jallo'na lapung tumanjallakkanga sadiaya ero' angngancurukko? Sikontutojenna anjo jallo'na ke'nanga talania' pakkullena mae ri kau.

YESAYA 12:2

Tojeng, anjo Allata'ala Mappasalamakku, inakke tappaka' mae ri Ia. Tena kumalla', saba' Napakajarreka'. Mappasalamakku iamintu Allata'ala, makkelonga' mae ri Ia.

PAMMUJI 106:13

Mingka linta'mi nakaluppai ke'nanga apa le'baka Nagaukang Batara siagang anggaukang apa-apa tamappala' tangara'Na.

PAMMUJI 85:4

Tenamo naKikalarroi ke'nanga; taKipa'jariami pangngalarroi lompoTa.

PAOLE 32:31

Naassengi musunna Israel angkanaya lammai pajagana ke'nanga, tena nasangkamma Allata'alana Israel hebaka.

PAMMUJI 79:9

Kitulung laloi ikambe o, Allata'ala, Tumappasalama'na ikambe, Kipammopporangi dosa-dosana ikambe siagang Kilappassangi ikambe untu' kalompoang kalenTa.

1 PATTOTTORANG 16:35

Akkana mako, “O Allata'ala, Mappasalamaka ikambe, pasalamaki ikambe battu koasana bansa-bansaya na Kipa'rappungang ammotere' ikambe sollanna akkulle appala' sukkuru' ikambe siagang mammuji ri areng matangkasatTa!”

PAOLE 32:15

Umma'Na Batara a'jari kalumanynyang, mingka nangai mangngewa, nasorongbokoi Mappasalama' porea. Co'mo' ngaseng kalenna, lanri bassoro' ri kanre, mingka nabokoi ke'nanga Allata'ala Mappa'jarina.

PAOLE 28:30

Punna tena numannuruki ri Karaeng Allata'alanu, anne kammaya lantujuko: La'bayuangko, mingka tau maraeng lambuntingi bayuannu. Lambangungko balla', mingka tena nanupammantangngi. Lanulamungi koko anggoro'nu, mingka tanukanreai rapponna.

PAOLE 8:19

Teako takkaluppai ri Karaeng Allata'alanu siagang teako ta'gilingi mae ri rewata-rewata maraenga untu' anynyomba siagang ampakalompoi ke'nanga. Anne alloa kupakaingakko angkanaya punna tena tanugaukanna tonja kammaya, ma'nassa tena todong tanipanrakkinnu ri Batara.

PAOLE 8:14

katutui baji'-baji' sollanna tena nu'jari tampo siagang takkaluppa ri Karaeng Allata'alanu, le'baka allappassangko battu ri Mesir, le'baka nupammantangngi nipare' ata.

PAOLE 8:11

“Katutui baji'-baji', sollanna tena nutakkaluppa mae ri Karaeng Allata'alanu; teako bawang-bawangngangi manna pole se'reja battu ri sikontu hukkunNa kupassareanga mae ri kau anne alloa.

PAOLE 6:12

katutui baji'-baji' sollanna tena nutakkaluppa mae ri Batara, le'baka allappassangko battu ri Mesir, tampa' le'baka nupammantangngi nipare' ata.

KAIMANGNGANG 26:20

Sikontu pakkaresoannu tena ngaseng matu-matunna, nasaba' tena nalangngerang wassele' buttanu siagang tena nala'rappo lamung-lamunnu.

KAIMANGNGANG 26:16

laKuhukkungko. LappabattuA' bala mae ri kau, garring siagang rammusu' tenaya nakkulle niballei sa'gennu a'jari buta siagang ta'ronang-ronang tallasa'nu. La'lamung-lamungko mingka tena nanugappai wassele'na, nasaba' labattui musu-musunnu ambetako siagang ampaccappuki sikamma apa-apa nulamunga.

ZEFANYA 1:13

Lanirampasaki barang-baranna ke'nanga siagang laniancuruki sikamma balla'na. Lambangungi ke'nanga balla', mingka takkulleai napammantangngi. Lappareki ke'nanga koko anggoro' mingka takkulleai nainung je'ne' anggoro'na.”

HABAKUK 3:18

tuli larannuna pa'maikku, nasaba' iKatte Karaeng Allata'ala mappasalamakku.

AMOS 5:11

Nujallakkangi tu kasi-asia siagang nurampasaki gandunna. Lanri kammana anjo talammantangnga mako lalang ri balla'-balla' ga'ganu, anjo le'baka nubangung. Tenamo nulangnginung anggoro' battu ri koko-koko anggoro' le'baka nulamungi.

HOSEA 4:6

Ikau ngaseng, sikamma imanga, tena nujampangiA', jari ummakKu tena tommo najampangiA' sa'genna natuju bala ke'nanga. Nutollaki ajarang-ajarangKu. Jari, iNakke laKutolla' tongko, siagang ana'-ana'nu tena nalaKuani salaku imang-imangKu.

PAMMUJI 65:5

Mate'nei tau Kipilea, siagang tau Kikioka untu' ammantang ri BallatTa. Lanipassukkuki ikambe ri sikamma apa baji' ri BallatTa, ri pammantangngang matangkasatTa.

PAMMUJI 31:2

IKattemi pa'la'langangku, o, Batara, teaKi' passalasaia'. Pasalamaka' lanri kaadelanTa,

PAMMUJI 18:2

Mangngaia' ri Katte, o, Batara, iKattemi kagassingangku.

PAMMUJI 9:17

Napa'nyatami KalenNa Batara lanri adele'na kaputusanNa. Loposoki tu ja'dalaka lanri panggaukang kalenna tonji.

YESAYA 17:9

Anjo wattua sallang, sikamma kota-kota kassaka pattahanganna ri Israel la'jari rumbangngang mami siagang la'jari sinomi, sangkamma kota-kota le'baka nabokoi tu Hewi siagang tu Amori ri wattunna lari ke'nanga battu ri tu Israel.

YESAYA 18:5

Ri tenanapa nawattu rappo-rappoang, ri wattu runannamo bunganna siagang ri tenanapa nati'no' anggoroka ri poko'na, laniancuru'mi Sudan ri musunna, kamma gampanna ladinga angkattiliki tangke-tangkenna anggoroka battu poko' anggoroka.

YESAYA 25:4

Saba' iKattemi palararianna tau lammaya, tampa' amanga mae ri tu kasi-asia lalang kasukkarranga. IKattemi pa'la'langngang battu ri anging lompoa, pa'la'langngang battu ri bambanna alloa. Saba' tau pallaka a'bakkai rapang anging lompo ri wattu bara',

YESAYA 30:29

Mingka ikau ngaseng, umma'Na Allata'ala, larannuko siagang lakkelongko sangkamma ri wattu bangngi passua'-suarrang agamaya. Larannuko rapang tau a'jappaya nirurungang ri sa'ra suling mange ri Balla'Na Batara ri Yerusalem, mappatojenna Israel.

YESAYA 33:2

O, Batara, Kikamaseang laloi ikambe. IKattemi panrannuanna ikambe. Kijagai ikambe ri tunggala' alloa, siagang pasalamaki ikambe ri wattu kasukkaranga.

YESAYA 44:8

He, bansaKu, teako mallakki yareka teako ta'bangkai; sai battu riolo iji sa'genna kamma-kamma anne le'ba'mi Kutappu riolo apa lakajarianga? Kau ngasemmi sa'bi-sa'bingKu. Tena pajaga maraeng siagang tena Kuasseng maraeng.”

YESAYA 61:10

Nakana Yerusalem, “Rannui pa'maikku lanri Batara, mate'nei atingku lanri Allata'ala. Rapang bunting bura'ne siagang baine ammake belo-belo ga'ga ngaseng, kammaminjo Napatabaya Batara ri nakke baju kasalamakkang siagang pammetang.

YESAYA 62:11

Napassareangi Batara anne pasanga mae ri sikontu cappa'na buttaya, angkana, “Pabattui mae ri pandudu'na Sion angkana, ‘Ciniki, battumi Batara Mappasalamaka! Nirurungang ri sikamma tau le'baka Nalappassang.’ ”

YEREMIA 3:21

Ri coppo'na bulu'-buluka nia' kalangngerang sa'ra gegere'; iaminjo sa'ranna umma' Israel angngarru' siagang appala' tojeng, lanri dorakami ke'nanga, siagang nakaluppaimi Karaeng Allata'alana ke'nanga.

YEHEZKIEL 23:35

Batara Kaminang Tinggia Nakana, “Lanri takkaluppa mako siagang a'boko mako battu ri Nakke, lanupisa'ringimi pa'risika passabakkang balere'nu siagang passundallannu.”

YO"EL 1:17

Matei binea ri butta kalotoroka. Tenamo gandung untu' niboli', na runtummo sikamma pammolikang tenaya bonena a'jari rumbangngang.

YEHEZKIEL 22:12

Nia' todong a'jari pabuno nigaji, nangaia ampaccoki julu bansana. Kabusu'na ke'nanga nakaluppaiMa'. INakke, Batara Kaminang Tinggia, anne akkana.