YESAYA 13:8 - KITTA' MATANGKASA'

⁸ Lanibattui ke'nanga ri kamallakkang lompo, nammulingkara' sanrapang baine pa'risika nasa'ring lamana'. Lamassing sicinikimi ke'nanga lalang malla', ejai rupanna napakamma siri'-siri'.

YESAYA 13:8 ပူးပေါင်းရင်းမြစ်များ

2 KARAENG-KARAENG 19:26

Sikamma tau ammantanga anjoreng tena kullena; ta'bangkai siagang mallaki ke'nanga. Rapangi ke'nanga ruku' niaka ri paranga yareka ruku' attimboa rate ri pattongko'na ballaka, a'jari kalotoroka punna niiri' ri anging bambang battu raya.

PAMMUJI 48:7

Anjoreng annekkereki ke'nanga napakamma malla' siagang pa'risi', sanrapang baine eroka ammana',

YESAYA 26:17

Rapang baine lamanaka ammulissara' siagang ammarrang napakamma pa'risi', kammaminjo ikambe ri dallekanTa, o Batara.

YEREMIA 13:21

Apa lanukana sallang punna sikamma tau nupare' aganga ambetako siagang angkoasaiko? Tantu lapa'risiki nusa'ring rapang baine eroka ammana'.

YEREMIA 30:6

Coba sai pikkiri' siagang salidiki! Maka akkullei tu bura'nea allassukang ana' lolo? Punna kamma, angngapa Kucini' tunggala' bura'nea pi'lasa' tanja'na anjallakkangi battanna siagang limanna rapang baine eroka ammana'?

YEREMIA 4:31

Allangngereka' sa'ra kunrareng rapang baine eroka ammana'; rapang baine lolo allassukanga ana' bungasa', kammaminjo karru'na Yerusalem siagang sukkara'na a'mai'. Akkaeng-kaengi limanna nakkunrareng, angkana, “Bala kugappa – lanibunoa' ri musua!”

YEREMIA 46:5

Mingka inakke, Batara, Kuciniki ke'nanga ammunduru' napakamma malla'. Sikamma tantarana nibetai, lari napakamma malla' tamassaile mae ri boko.

YEREMIA 48:41

Kota-kotana siagang sikamma pattahanganna laniallei, siagang tantarana lamallaki rapang baine eroka ammana'.

YEREMIA 49:22

Rapang jangang-jangang rajawali attambero siagang ka'nyi'na takka'ranga, kammami anjo musua labattu siagang antamberoi Bozra. Anjo alloa tantara Edom lamallaki rapang baine eroka ammana'.”

YEREMIA 49:24

Pandudu'na Damsyik a'jari lammai, siagang lari napakamma malla'. Pa'risiki nasa'ring kalenna siagang sessai rapang baine eroka ammana'.

YEREMIA 50:43

Nalangngere'na anjo kabaraka, lammami nasa'ring karaeng Babel. Nibattuimi ri malla', siagang pa'risi'mi nasa'ring kamma baine eroka ammana'.

YEREMIA 51:30

Ammarimi tantara Babel a'bundu', siagang ammantammi ri sikamma pattahangnganga. Tenami kabaranianna ke'nanga siagang tenamo pakkullena. Sikamma pakke'bu' lompona kotaya le'ba' ngasemmi nirumbang, siagang sikamma ballaka le'ba'mi nitunu.

YEHEZKIEL 20:47

Suroi anjo romanga ampilangngeri apa Kupaua, iNakke, Batara Kaminang Tinggia, mae ri ia, ‘Pilangngeri! LapparinrA' pepe' akkullea antunui sa'genna cappu' sikamma poko' kayu niaka ri kau, baji' nakalotoroka kammayatompa mataya. Anjo pepe' a'rinra-rinraya tena nakkulle nibuno. La'le'lereki battu timboro' a'lampa wara', na sikontu taua lanapisa'ringi bambanna.

HOSEA 13:13

Nia' kasampatanna Israel untu' attallasa', mingka sanna' dongo'na sa'genna tena napa'matu-matui anjo kasampatanga. Rapangi ana' lolo lalang battang; tasalloami nalassu' mingka takkulleai assulu' battu ri pammanakkanna amma'na.

YO"EL 2:6

Ri wattu a'bakkana ke'nanga, annekkere' kabusuki taua, sikontu tanjaka pi'lasa' ngaseng kontu tenaya cera'na.

NAHUM 2:10

Ancuru'mi Niniwe, sinomi na kalotoro'. La'bai pa'maika napakamma malla'. A'jari lammami siagang annekkereki kulantuka. A'jari pi'lasa' kabusuki rupanna taua.

YOHANES 16:21

Punna nia' sitau baine la'biring ammana', lasusai, nasaba' narapi'mi wattunna lasessa. Mingka kamma lassu'na ana'na, nakaluppaimi pa'risi'na anjo bainea napakamma rannu, lanri lassu'namo anjo ana'na antama' ri lino.

1 TESALONIKA 5:3

Punna nakana taua, “Amang ngasenji siagang sannang ngasenji,” iaminjo wattua nati'ring natuju ke'nanga kapanrakang na tena manna sitau akkulle ta'lappasa'. Tena nanisanna-sannai nakajariang anjo passalaka; sanrapangi pa'risi'na se'rea baine ri wattunna lanalassukang ana'na.