YEREMIA 7:6 - KITTA' MATANGKASA'

⁶ Tea' mako manjallakkangngi pole mae ri bansa maraenga, ana'-ana' kukanga, siagang janda-jandaya. Teako ammunoi tau tena salana ri anne pa'rasanganga. Teako anynyombai ri rewata-rewata maraenga, nasaba' anjo kammaya langngerangi kapanrakang mae ri kau.

YEREMIA 7:6 ပူးပေါင်းရင်းမြစ်များ

2 KARAENG-KARAENG 21:6

Ana' kalenna napassareang a'jari koro'bang nitunu. Nagaukang tongi Manasye gau'-gau' sanroa, a'jari paciniki, ammakei pangngissengang, siagang appalaki pangngunju' mae ri roh-roh tanicinika. Sanna' dorakana mae ri Batara sa'genna napanai'mo larroNa Batara.

2 KARAENG-KARAENG 24:4

la'biangampa lanri sikontu pammunoang nagaukanga mae ri sikamma tau tenaya nasala. Tena Naero' Batara ampamopporangi Manasye lanri anjo panggaukang-panggaukang kammana.

PAMMUJI 106:38

Napassolongi cera'na tau tenaya nasala, cera'na ana'-ana' kalenna ke'nanga, untu' nikoro'bangkang mae ri barhala-barhala; sa'genna nara'massi ke'nanga anjo pa'rasanganga.

PANGNGEBARANG 23:10

Tea sikaliko appaletteki pa'baeng-baeng butta sossorang yareka nuallei buttana ana' kukanga.

YESAYA 59:7

Tulusu' nurancanakangi ja'dalaka, siagang erokko akkaro-karo anggaukangi. Tena nubata-bata ammuno tau tenaya salana. Kemae-kemae lampanu, tuli ammolikko karuntungang siagang kapanrakang.

YEREMIA 13:10

Anne bansa ja'dalaka sanna' kapala batuna siagang taerokai mannuruki ri Nakke. Anynyombai siagang napa'jari atai kalenna ke'nanga mae ri rewata-rewata maraenga. Lanri kammana minjo nala'jari ke'nanga rapang anjo lipa' bodo tenaya matu-matunna.

YEREMIA 19:4

Kugaukangi anjo passalaka lanri anne bansaya nabokoiMa'. Narantassi anne tampaka lanri assarena koro'bang mae ri rewata-rewata tenaya naassengi ke'nanga, tenaya naassengi boe-boena ke'nanga siagang sikamma karaenna tu Yehuda. Nabonei tommi ke'nanga anne tampaka cera'na tau tenaya nasala.

YEREMIA 2:30

Tena matu-matunnu Kuhukkung, lanri teanu appilangngeri pappakainga'. Rapang singa a'jalloka, sangkamma tomminjo batenu ambunoi sikamma na'binu.

YEREMIA 2:34

Ra'masaki pakeannu napakamma cera'na tu kasi-asia siagang tau tenaya salana, teai cera'na palukka' nijakkalaka. Mingka manna nakamma

YEREMIA 26:15

Mingka u'rangi, punna nubunoa', ikau ngaseng siagang pandudu'na anne kotaya lantanggongi kasalang pammunoanga ri tau tenaya salana. Nasaba', Batara assuroa' untu' ampabattui anjo pappakaingaka mae ri kau ngaseng.”

YEREMIA 26:23

Nampa naerang ke'nanga ammotere' anjo Uria mange ri Karaeng Yoyakim. Nampa nasuro buno karaenga anjo Uria, na napela' maya'na ri pa'jerakkang tau jaia.

YEREMIA 35:15

Tena ammariKu assuroi battu mae ri kau sikamma atangKu na'bi-na'bia, siagang napakainga' mako ke'nanga sollanna nupakabaji' panggaukannu na nupamari a'gau' ja'dalaka. Napakaingakko ke'nanga sollanna tena nunynyomba mae ri rewata-rewata maraenga siagang tena nupare' atai kalennu mae ri anjo rewata-rewataya, sollannu akkulle ammantang tuli anrinni ri pa'rasangang Kupassareanga mae ri kau siagang mae ri boe-boenu. Mingka taerokako amparhatikangi siagang taerokako mappilangngeri ri Nakke.

YEREMIA 5:28

kammayatompa a'jari co'mo' siagang coppong tallasa'na. Tena sanggana kaja'dallanna ke'nanga. Tena na'gau' adele' lalang ri passala'na ana'-ana' kukanga, siagang tena naalleangngangi ha'na sikamma tau nijalakkanga.

YEREMIA 7:5

Pinrai katallassannu siagang panggaukannu. Adelekko tasse're-se're tau mae ri parannu tau.

YEREMIA 7:9

A'lukkakko, ammunoko, a'gau' bawangko, sa'bi balle-balleko, assareko koro'bang mae ri Rewata Baal, siagang anynyombako mae ri rewata-rewata tenaya nanuassengi.

PIRAUNG 4:13

Mingka kajariang tojemmi anjo kammaya, lanri dosana sikamma imanga siagang na'bia. Le'baki napasolong cera'na tau tenaya salana.

YEHEZKIEL 18:6

Tena nanynyomba ri barhalana tu Israel yareka tena nangnganre koro'bang nipassareanga ri tampa'-tampa' panynyombanga ri rewata-rewataya. Tale'bakai naodo' bainenna paranna tau yareka attinro siagang baine battua bulanna.

YEHEZKIEL 22:7

Tena manna sitau battu ri pandudu'nu ampakalompoi tau toana. Nutipui bansa maraeng niaka annompang siagang angngalleko passawallang battu ri kasusaanna jandaya siagang ana' kukanga.

KAIMANGNGANG 19:33

Teako ampanggaukang kodi mae ri bansa maraeng niaka ammantang ri pa'rasangannu.

KAIMANGNGANG 25:17

Teako annipui mae ri parannu tu Israel, mingka paralluko malla' mae ri Batara, Allata'alanu.

MALEAKHI 3:5

Nakana Batara Kaminang Koasaya, “LabattuA' mae ri kau ngaseng untu' angngadeli. LabattuA' linta' anjari sa'bi mae ri pabale'-bale' mataya, sikamma tau a'gau' bawanga, pasa'bi balle-ballea, a'gau' jekkonga ansarei gajina tau angnganre gajia, tau anjallakkangai sikamma jandaya, ana'-ana' kukanga, siagang bansa maraeng battua annompang, mae ri sikontu tau tenaya napakala'birikKa'.”

MATIUS 27:25

Appiali ngasemmi anjo tau jaia angkana, “Boli'mi kamma, ikambepa siagang ana'-ana'na ikambe antanggongi hukkunganga lanri kamateanNa!”

MATIUS 27:4

Nakanamo ri ke'nanga, “Dorakama' kubalukangi tau tenaya salanna, sa'genna nihukkung mate!” Appialimi ke'nanga angkana, “Ikatte tena naparallu kijampangi; anjo urusannu kau!”

PAOLE 11:28

Mingka lanitunraiko punna tena numannuruki mae ri parenta-parentaNa Karaeng Allata'alanu, passangalinna ta'gilingko untu' anynyomba ri rewata-rewata maraenga ia tenaya nale'ba' nusomba.

PAOLE 24:17

Teako rampasaki ha'na bansa maraenga siagang ana'-ana' kukanga, siagang teako allei pakeanna jandaya untu' a'jari boro' lanri pangnginrangnganna.

PAOLE 27:19

‘Nitunrai tau anrampasakai ha'na tubattu-battua, ana' kukanga, siagang jandaya.’ ‘Aming!’

PAOLE 8:19

Teako takkaluppai ri Karaeng Allata'alanu siagang teako ta'gilingi mae ri rewata-rewata maraenga untu' anynyomba siagang ampakalompoi ke'nanga. Anne alloa kupakaingakko angkanaya punna tena tanugaukanna tonja kammaya, ma'nassa tena todong tanipanrakkinnu ri Batara.

YAKOBUS 1:27

Tutu situlusu'na siagang sitojennaya ri agamaya situru' paccini'Na Allata'ala, iamintu annulunga ana'-ana' kukang siagang janda-janda kasi-asi, kammayatompa mangngatutui ri kale sollanna tena nanipanraki ri anne linoa.