YEREMIA 7:4 - KITTA' MATANGKASA'

⁴ Teako patappakki patipua, angkanaya, ‘Amangki', lanri anne Balla'Na Batara. Tojeng-tojeng anne Balla'Na Batara!’

YEREMIA 7:4 ပူးပေါင်းရင်းမြစ်များ

1 KARAENG-KARAENG 9:7

laKubongkai ummakKu Israel battu ri pa'rasangang le'baka Kupassareang mae ri ke'nanga. LaKubokoi tongi anne balla' le'baka Kupattantu untu' a'jari tampa' passambayangannu mae ri Nakke. Kemae-kemae bansa Israel lanihina siagang lanikakkali.

YESAYA 48:2

Mingka manna nakamma, lompoi pa'mai'nu ammangakui angkana ikau pandudu'nako kota matangkasaka; angkanaya ikau tanjengko mae ri Allata'alana Israel niarenga Batara Kaminang Makoasaya.

YESAYA 59:4

Appamajuko parkara natena passabakkanna, siagang tena naadele' batenu angngadeli. A'balle-balleko siagang apa tenaya matu-matunna nupattoang; apparekko rancana untu' ancilakai parannu tau siagang nugaukangi kaja'dallanga.

YESAYA 66:1

Nakana Batara, “Langika empoang kala'birangKu, na buttaya pattuppuang bangkengKu. Jari balla' antekammaya ero' nubangungangA' siagang tampa' apaya lanupa'jariangA' pammantangangKu?

YEREMIA 28:15

Yangasenna anjo kupabattui mae ri Hananya, nampa kukana pole, “Pilangngeri he Hananya! Tena naNasuroko Batara; nupa'jari tappa'mi anne bansaya ri bicara balle-ballea.

YEREMIA 29:23

Kammami anjo sarenna ke'nanga, lanri le'ba'na nagaukang dosa-dosa lompoa ri Israel, iamintu: a'gau' bawangi ke'nanga, siagang napakei arenNa Batara untu' ancaritai apa-apa tenaya natojeng. Anjo kammaya sisalai siagang ero'Na Batara. Naassengi apa nagaukanga ke'nanga, siagang ia KalenNa a'jari sa'bi angngewai ke'nanga. Kammami anjo le'baka Nakana Batara.”

YEREMIA 29:31

akkiring kabara' ri passala'na Semaya mae ri sikontu Israel nipelaka ri Babel. Iaminne anjo kabaraka, “Anjo Semaya a'bicarai mae ri kau sanrapang angkanaya na'bi kalenna; padahala' iNakke, Batara, tena naKusuroi. Lanri napa'jari tappa' mako mae ri kana balle-ballea,

YEREMIA 6:14

Anjo bokka'-bokka'na ummakKu nakanangi ke'nanga poro bokka' ca'diji bawang. Nakana ke'nanga, ‘Ah, tenangngapa-apa, yangasenna baji'ji siagang amanji.’ Nampa tena sikali nakamma anjo.

YEREMIA 7:14

Jari, anne BallakKu nupattoanga, siagang anne tampa' Kupassareanga mae ri boe-boenu siagang mae ri kau, laKupakamma tongi kota Silo riolo.

YEHEZKIEL 13:19

NuhinaMa' ri dallekanna ummakKu, lanri ero'nu poro anggappa sikangkang jelai gandung siagang pirang kere' are roti. Tau tenaya nasala nubunoi, nampa tau siratanga mate nulappassangi attallasa'. Nampa nuballe-ballei ummakKu siagang tappa'mi ke'nanga mae ri kau ngaseng.’ ”

MIKHA 3:11

Pamarenta-pamarenta kotaya ammarentai untu' anggappa doe' pacoco', imang-imanga angngajaraki hukkunNa Batara untu' anggappa gaji, siagang na'bi-na'bia appalaki pangngunju' battu ri Allata'ala untu' anggappa doe' – nampa nakapang ngasengi ke'nanga angkanaya Niagangngangi ke'nanga ri Batara. Nakana ke'nanga, “Niaki Batara ri tangnga-tangngata; tena nalanatujuki' bala.”

ZEFANYA 3:11

Anjo wattua, he ummakKu, tenamo nuparallu pole siri'-siri' lanri le'ba'nu angngewa mae ri Nakke. LaKubongkai sikamma tau tampoa siagang borroa, siagang tenamo nulangngewa mae ri Nakke irate ti bulu' matangkasakKu.

LUKAS 3:8

Pappicinikammi rolong lalang ri panggaukannu, angkanaya ma'nassa toba' mako battu ri dosa-dosanu! Teako angkanai kaboe-boenu anjo Abraham. U'rangi angkanaya: Manna anne batu-batua akkulle tongi Napa'jari Allata'ala sossoranna Abraham!