YEREMIA 7:13 - KITTA' MATANGKASA'

¹³ MangKu pole a'mole-mole a'bicara mae ri kau, mingka taerokako mappilangngeri. Nugaukang ngasengi sikamma anjo dosaya, siagang taerokako appiali punna akkiokKa'.

YEREMIA 7:13 ပူးပေါင်းရင်းမြစ်များ

PANGNGEBARANG 1:24

Le'ba' mako kukio' ngaseng, mingka taerokako siagang tena ngaseng nujampangi.

YESAYA 50:2

Angngapa namanna sitau ummakKu tania' appiali, wattungKu battu angkioki ke'nanga? Maka a'mereki ke'nanga lanri nakapangi angkana takkulleA' allappassangi siagang ampasalamaki ke'nanga? Sikontutojenna, lanri parentaKu na'jari kalotoro' tamparanga, sikamma binangaya Kupa'jari parang lompo, sa'genna mate ngaseng jukuka na'rasa parru.

YESAYA 65:12

Lamate ngasengko passabakkang gau' katerassang. Saba' ri wattungKu akkio', tena nuppiali, siagang ri wattungKu a'bicara, tena nuppilangngeri. La'bi nungaiangngangi angngewaya ri Nakke siagang anggaukangi ja'dalaka.

YESAYA 66:4

Lanri kammana anjo laKugaukang tommi apa Kukaerokia naKupitujui ke'nanga sikamma bala nakamallakkanga ke'nanga. Saba' ri wattungKu akkio', tena tau appiali; ri wattungKu a'bicara, tena tau appilangngeri. La'bi nangaiangngangi ke'nanga angngewaya ri Nakke siagang anggaukangi ja'dalaka.”

YEREMIA 11:7

Ri wattunna Kuerang boe-boena ke'nanga assulu' battu ri Mesir, Kuterassi Kupakainga' ke'nanga sollanna mannuruki ri Nakke. Manna sa'genna ri kamma-kammaya anne tulusu' Kupakainga'na ummakKu ri anjo passalaka,

YEREMIA 11:8

siagang Kusuroi ke'nanga mannuruki ri anjo parjanjiangKu, mingka taerokai ke'nanga mappilangngeri siagang mannuruki. Ba'lalo tuli kapala batuna siagang ja'dala'na ke'nanga sangkamma riolo. Lanri kammana anjo sikontu hukkungang niaka tattulisi' lalang ri anjo parjanjianga Kupabattumi mae ri ke'nanga.”

YEREMIA 13:10

Anne bansa ja'dalaka sanna' kapala batuna siagang taerokai mannuruki ri Nakke. Anynyombai siagang napa'jari atai kalenna ke'nanga mae ri rewata-rewata maraenga. Lanri kammana minjo nala'jari ke'nanga rapang anjo lipa' bodo tenaya matu-matunna.

YEREMIA 13:11

Rapang lipa' bodo tassikko' jarreka ri aya'na tau ampakeai, kammami anjo erokKu sollanna tassikko' umma' Israel siagang Yehuda mae ri Nakke. Lanri kammanami anjo na'jarimo ke'nanga ummakKu ampa'jariai arengKu nipuji siagang nipakalompo. Mingka, taerokai ke'nanga mannuruki ri Nakke.”

YEREMIA 25:3

“Lalang ruampulo antallu taung, appakkaramula battu ri taung makasampulona antallu ammarenta Yosia ana' bura'nena Amon ri Yehuda, sa'genna anne alloa le'ba'mi a'bicara Batara mae ri nakke siagang tale'baka' takkaluppa ampabattui mae ri kau ngaseng apa le'baka Napau. Mingka tena nujampangi.

YEREMIA 26:5

Musti nupilangngeri tongi apa napaua ata-atangKu, sikamma na'bi tenaya ammarina tuli Kusuro battu mae ri kau. Mingka teako ampilangngeri ke'nanga.

YEREMIA 29:19

Yangasenna anjo kammaya kajariangi mae ri ke'nanga, lanri tena naturuki pasangKu tenaya ammari-marina Kupabattu mae ri ke'nanga tete ri atangKu na'bi-na'bia. Taerokai ke'nanga amparhatikangi anjo pasangKu.

YEREMIA 32:33

NabokoiMa' ke'nanga siagang manna pole tuli Kuajara' ke'nanga mingka tuli tenana naero' mappilangngeri siagang tena naero' angngu'rangi.

YEREMIA 35:14

Yonadab napisangkai jari-jarina angnginung anggoro', nampa mannuruki ke'nanga ri anjo pappisangkana. Sa'genna anne alloa tena manna sitau battu ri ke'nanga angnginung anggoro'. Mingka iNakke, tena ammariKu a'bicara mae ri kau, mingka taerokako mappilangngeri ri Nakke.

YEREMIA 35:15

Tena ammariKu assuroi battu mae ri kau sikamma atangKu na'bi-na'bia, siagang napakainga' mako ke'nanga sollanna nupakabaji' panggaukannu na nupamari a'gau' ja'dalaka. Napakaingakko ke'nanga sollanna tena nunynyomba mae ri rewata-rewata maraenga siagang tena nupare' atai kalennu mae ri anjo rewata-rewataya, sollannu akkulle ammantang tuli anrinni ri pa'rasangang Kupassareanga mae ri kau siagang mae ri boe-boenu. Mingka taerokako amparhatikangi siagang taerokako mappilangngeri ri Nakke.

YEREMIA 35:17

Lanri kammana anjo, naiNakke, Batara Kaminang Koasaya, iamintu Allata'alana Israel, lappabattuA' mae ri kau – tu Yehuda siagang Yerusalem – sikontu bala le'baka Kupattantu untu' ikau ngaseng, sangkamma le'baka Kupau. Anjo kammaya Kugaukangi lanri tenana nuero' mappilangngeri punna a'bicarA' mae ri kau, siagang lanri tenana nuero' appiali ri wattunnu Kukio'.”

YEREMIA 44:4

Tulusu' Kusuroi battu ata-atangKu sikamma na'bia mae ri kau, ampisangkaiko anggaukangi anjo kaja'dallang tenaya Kungai.

YEREMIA 5:21

“Pilangngeri, he ikau ngaseng sikamma tau dongoka siagang toloa! Nia' matannu, mingka tena nuccini'; nia' tolinnu mingka tena nullangngere'!

YEREMIA 6:10

Appialia' angkana, “Batara, inai musti kupa'bicarai, siagang inai musti kupappakaingakki? Kapala batui ke'nanga siagang taerokai mappilangngeri. Nakakkali siagang nakabirisi ke'nanga pasanTa kupabattua mae ri ke'nanga.

YEREMIA 7:25

Baku' assulu'na boe-boenu battu ri Mesir sa'genna anne alloa tuli nia' Kusuro ata-atangKu, sikamma na'bia, battu mae ri kau.

HOSEA 11:2

Mingka pila' Kukioki anjo anakKu pila' napakabellai kalenna battu ri Nakke. Angngerangi koro'bang siagang attunui dupa untu' Rewata Baal siagang rewata-rewata maraengannaya.

HOSEA 11:7

siagang terasa'na nyawana ero' ambokoiA'. Jari lanijallakkangi ke'nanga, mingka tena lakkulle allappassangi ke'nanga manna pole nammarrang ke'nanga appala' tulung.”

HOSEA 9:17

Anjo Allata'ala kulayania laNatollaki umma'Na, lanri teai ke'nanga mappilangngeri ri Ia. La'lampai ke'nanga mange-mange ri alla'na bansa-bansaya.

ZAKHARIA 7:13

Tena naKupiali pappala' doanna ke'nanga, lanri tenana todong namappilangngeri ke'nanga ri wattungKu a'bicara.

MATIUS 23:37

“O Yerusalem, O Yerusalem! Kau ambunoi na'bi-na'bia. Nusambilai batu sikamma tunisuroNa Allata'ala sa'genna mate. A'mole-moleMa' ero' anraka' ngasengko sanrapang anrong janganga ancokkoi ana'-ana'na irawangang ka'nyi'na. Mingka tena ngaseng nuero'!