YEREMIA 42:2 - KITTA' MATANGKASA'

² mae ri nakke nampa angkana, “Bapa', sangkamma kicinika kalenta, ikambe anne riolo jaiki', na kamma-kamma anne sike'de' mamaki' ammantang. Napalaki ikambe ri katte Bapa', nakiero' ampappala' doangngangi ikambe mae ri Karaeng Allata'ala kisombaya. Kipappala' doangngangi ikambe anne niaka ija tassesa ri Karaeng Allata'ala kisombaya,

YEREMIA 42:2 ပူးပေါင်းရင်းမြစ်များ

1 KARAENG-KARAENG 13:6

Nampa nakanamo Karaeng Yerobeam ri anjo na'bia, “Tulunga' nuppala' doang mae ri Karaeng Allata'alanu untu' inakke. Palaki pangngamaseanNa sollanna Napakabaji' limangku!” Appala' doammi anjo na'bia ri Batara, nampa baji'mo limanna karaenga.

PAMMUJI 119:170

Boli'mi kamma ta'rapi' pappalakku mae ri Katte, Kipasalamaka' situru' janjinTa.

KALAPPASSANG 8:28

Nakanamo karaenga, “Baji'mi, kulappassangko a'lampa mange ri parang lompoa untu' assare koro'bang mae ri Batara, Allata'alanu, assala' tenaja nu'lampa bella. U'rangi, na nupappala' doanganga'!”

KALAPPASSANG 9:28

Appala' doang mako mae ri Batara; ganna'mi kasessanna ikambe lanri anne gunturuka siagang bosi eska. Lakulappassang mako a'lampa. Tea' mako ammantangngi pole anrinni.”

YESAYA 1:15

Punna nupatara limannu appala' doang, tena Kuero' amparhatikangi. TaKujampangiai angkana siapa jaina pappala' doannu, taerokA' ampilangngeri, nasaba' iaminjo limannu jai sikali tau nabuno.

YESAYA 1:9

Ebara' angkana tena Napata'lappasaki Batara Kaminang Koasaya siapa are tau battu ri katte, ma'nassa cappu' ngaseng maki', rapang kota Sodom siagang Gomora.

YESAYA 37:4

Nasuroi karaeng Asyur perwira tantarana untu' anghinai Allata'ala mattallasaka. Inai angngassengi, gassingka Nalangngereki Karaeng Allata'ala anjo panghinaanga na Nahukkung tau ampasulukai anjo kana kammaya! Lanri kammana anjo appala' doang laloko mae ri Allata'ala untu' sikamma tau attallasaka ija.”

YESAYA 42:20

Israel, jai nucini', mingka tena nuparhatikangi, tassungkei tolinnu, mingka tena nullangngere'.”

YEREMIA 15:11

O Batara, punna ma'nassa tena memang kugaukangi tugasakku siagang baji', siagang tena nakualle musu-musua ri dallekanTa ri wattunna anggappa ke'nanga bala siagang susa, lappassammi kajariang tojeng pattunrana sikamma anjo taua. (

YEREMIA 2:27

Lanipakasirikko, lanri sipolong kayu nukio' bapa' siagang se're batu nukio' amma'. Tena nubattu mae ri Nakke, passangalinna nubokoiA'. Mingka punna battu kasukkaranga, nampami iNakke nukio' untu' battu ampasalamakko.

YEREMIA 21:2

“Appalakko pitunju' battu ri Batara untu' ikatte, nasaba' nikurummi kotata ri Nebukadnezar karaeng Babel siagang pasukanna. Gassingka lappa'niaki gau' malompo Batara untu' ikatte, na Napassa Nebukadnezar ampamonoki ammotere' pasukanna.”

YEREMIA 36:7

Gassingka lanri kammana anjo nalappala' doang ke'nanga mae ri Batara, siagang toba' battu ri panggaukang-panggaukang ja'dala'na ke'nanga. Teai sipato' larroNa Batara mae ri ke'nanga siagang Naancangi ke'nanga.”

YEREMIA 37:20

Kamma-kamma anne, karaeng nipakala'birikku, kipilangngeri laloi anne pappalakku. Tea' laloki kiringia' ammotere' mange ri balla' tarungku niaka ri balla'na Yonatan, gassingka matea' sallang anjoreng.”

YEREMIA 37:3

Karaeng Zedekia nakiringi Yukhal ana'na Selemya, siagang Imang Zefanya ana'na Maaseya untu' battu ampalaki ri nakke sollanna kuappala' doang mae ri Karaeng Allata'ala untu' kasalamakkanna bansaya.

YEREMIA 38:14

Ri se'reang wattu maraeng, Karaeng Zedekia nasuroi taua angngeranga' mange andallekang ri ia ri pakke'bu' lompo makatalluna Balla'Na Batara. Nakana ri nakke, “Erokka' akkuta'nang ri kau, siagang musti nupiali silambusu'na. Teako niakki apa-apa nucokko.”

YEREMIA 40:15

Nampa a'bicara cokko-cokkomi Yohanan mae ri Gedalya angkana, “Baji'mi nakua'lampa ambunoi Ismael; tena manna sitau langngassengi angkana inai ambunoi. Angngapa namusti nilappassang ambunoko? Anjo sallang kale'bakkanna sikontu tu Yehuda asse'reamo anrinni siagang ikau, lasisa'la'-sa'laki ammotere', sa'genna akkullei ancuru' sikontu ra'ya' niaka ija tassesa ri Yehuda.”

YEREMIA 42:20

angkanaya le'ba' mako appare' kasalang lompo. Nupalaki sollangku appala' doang mae ri Karaeng Allata'alata untu' ikau ngaseng, siagang a'janjiko untu' anggaukangi sikontu apa Napaua Batara.

PIRAUNG 1:1

Tamaka sinona Yerusalem anne kamma, kota suara' dudua riolo. Tamaka porena riolo ri alla'na bansa-bansaya, anne kamma rapammi janda. Riolo kontui kota kaminang nisomba, anne kamma nipa'jarimi ata.

YEHEZKIEL 12:16

Tena siapa jaina battu ri ke'nanga laKupasalama' battu ri pa'bundukanga, battu ri kacipuranga, siagang battu ri garringa, sollanna ri tangnga-tangngana anjo bansa maraenga, langngu'rangimi ke'nanga angkanaya le'baki ke'nanga a'gau' kodi sikali. Jari lamangakumi ke'nanga angkanaya iNakke Batara.”

HOSEA 8:10

Mingka manna nakamma laKupasse'rei siagang laKuhukkungi ke'nanga. Tasalloami nalakkunrareng ke'nanga napakamma sessa, punna nijallakkang ke'nanga ri karaeng Asyur.

KAIMANGNGANG 26:22

LaKupabattui olo'-olo' sekkeka ri tangnga-tangnganu. Anjo olo'-olo' sekkeka lanakokkoki ana'-ana'nu, lanabunoi olo'-olo' piaranu siagang lanapaccappukko, sa'gennu a'jari sike'de' dudu mamo tassesa, siagang la'jari sinoi sikamma oloanga lalang ri pa'rasangannu.

AMOS 7:2

Anjo katimbang jaia a'biringi nakanre sa'genna la'busu' sikontu timbo-timboanga ri buttaya. Nampa kukanamo, “O Batara Kaminang Tinggia, Kipammopporang laloi ummatTa! Teai sipato' ca'dina siagang lammana ke'nanga, jari antekamma batena lakkulle ke'nanga attahang?”

MATIUS 24:22

Na ka'de' tena Napa'jari sinampeki Allata'ala anjo wattu kasusaang lompo dudua, ma'nassa manna sitau tenamo lakkulle salama'. Mingka lanri Nau'ranginna umma'Na, Napa'jari sinampe'mi Allata'ala anjo wattu kasusaang lompo dudua.

LAMPA-LAMPANA 8:24

Nakanamo Simon mae ri Petrus siagang Yohanes, “Tulunga', nakipala' ri Batara sollanna tena lalo manna sirupa kajariang mae ri nakke, anjo apa kipaua.”

PAOLE 28:62

Manna katambammo jainu sanrapang bintoenga ri langi', mingka sike'de' mami ri kau lammantang attallasa', lanri tenana numannuruki mae ri Karaeng Allata'alanu.

PAOLE 28:63

Sangkamma sannanna nyawaNa Batara assareko kakalumanynyangngang siagang ampa'jari jai bilannu, lasannang tongi ampanrakiko siagang ampaccappukko. Lanialleko battu ri pa'rasangang tenayamo nasallo nanupammantangngi.

PAOLE 4:27

LaNapasisa'la'-sa'lakko Batara ri alla'na bansa-bansa maraenga siagang sike'de' mami ri kau lammantanga attallasa'.

YAKOBUS 5:16

Lanri kammana, paralluko massing ammangakui kasalannu mae ri parannu tau, siagang sipappala' doangangko, sollannu nipammolle. Pappala' doangang situruka ero'Na Allata'ala, lompo sikali kakoasanna.

1 SAMUEL 12:19

Nakanamo ke'nanga mae ri Samuel, “Tulungi ikambe bapa'. Kipappala' doangangi ikambe anne mae ri Karaeng Allata'alanu, sollanna tamatea ikambe. Kamma-kamma anne sadara'mi ikambe angkanaya pantaranganna dosana ikambe riolo, dorakami pole ikambe lanri appala'na ikambe sitau karaeng.”

1 SAMUEL 12:23

Na ri passala'na inakke, tapporo tena lalo kudoraka ri Batara lanri tenana kupappala' doangangko. Mingka tuli lakupangngajarrangi mae ri kau apa-apa bajika siagang tojenga.

1 SAMUEL 7:8

Nakanamo ke'nanga ri Samuel, “Teako ammari appala' doang mae ri Karaeng Allata'alata, sollanna Napasalamakki' battu ri tu Filistin.”