YEREMIA 4:8 - KITTA' MATANGKASA'

⁸ Lanri kammana, angngarru' siagang appiraung mako, ammake mako kaeng karung tanra susanu. Lanri a'rinra-rinrana larroNa Batara tenapa nammono' battu ri Yehuda.

YEREMIA 4:8 ပူးပေါင်းရင်းမြစ်များ

PAMMUJI 78:49

Napa'betteseki kalarroanNa anrinra kamma pepe' nampa Napabattu se're pasukang malaeka' kamateang sa'genna a'jari tappu' pa'minasa ke'nanga.

YESAYA 10:4

Ia mami sarennu iamintu nibunoa lalang bundu' yareka nieranga a'lampa a'jari tunitahang. Mingka tuli larroNa ija Batara siagang tuli Nahukkunna ija ke'nanga.

YESAYA 13:6

Appiraung mako, lanri a'reppese'mi allonNa Batara, iamintu allo kapanrakang Napabattua Batara Kaminang Koasaya.

YESAYA 22:12

Anjo wattua laNasuro ngasengko Batara Kaminang Tinggia siagang Kaminang Makoasaya angngarru' siagang appiraung, ancukkuruki uu'nu siagang ammake kaeng karung.

YESAYA 32:11

Sa'genna kamma-kamma anne nyamangko ri tallasa'nu, bellako ri kasusaanga. Mingka kamma-kamma anne, annekkere' mako napakamma malla'! La'gasi pakeannu nampa nupasikko' kaeng karunga mae ri aya'nu.

YESAYA 5:25

Larroi Batara mae ri bansaNa. Sadiami untu' anghukkungi ke'nanga. Lata'ge'gosoki sikamma monconga; maya'-maya'na tau matea latassiaraki rapang loro ri sikamma aganga. Mingka larro iji Batara siagang tuli laNagaukanna hukkunganNa.

YESAYA 9:12

Tena ijapa nassesse' lalang bansa Israel, manna pole nanihukkummo ri Batara Kaminang Makoasaya; tena ijapa natoba' ke'nanga mae ri Ia.

YESAYA 9:17

A'rinrai rapang pepe' kaja'dallanna ke'nanga na nakanre sa'genna cappu' rompo' katintinga. Rinrana rapangi romang akkanre, jai sikali nai' umbunna.

YEREMIA 25:34

He pamimping-pamimpinga, he sikamma pakalawaki umma'Na Batara! Angngarru' lompoko! Anggulung-gulungko lalang ri aua, nasaba' narapi'mi wattunnu nibuno, siagang ia ta'lappasaka lanipasisa'la'-sa'laki. Lasanrapangko bongki lompoa anggaranna tu'guru' na reppe'.

YEREMIA 48:20

Lappiali ke'nanga angkana, ‘Tu'guru'mi Moab, siagang a'jari tunami, jari karrukimi. Pa'la'bangi kabarrang ri sikontu birinna Binanga Arnon angkanaya ancuru'mi Moab.’ ”

YEREMIA 6:26

Nakana Batara ri umma'Na, “Ammakeko pakeang karung nampa anggulung-gulungko ri aua. Susa tukamateang mako siagang angngarru' mako pacce nyawanu, rapang tau appiraunga angkarruki ana' sitau-tauna, nasaba' ti'ring labattumi tulammanrakia ambundukiko.”

PIRAUNG 1:12

“He sikamma tunumaloa ri aganga, ciniki siagang parhatikangi! Maka nia' passessa sangkammaya lompona nulangngereka ri kamma-kammaya anne, passessa Napabattua Batara mae ri nakke, lanri pangngalarroi lompoNa?

YEHEZKIEL 21:12

He tau, appiraungko siagang akkiokko! Lanri anjo pa'danga sadiai angngewai ummakKu. Sikamma pamimpinna Israel siagang sikontu bansaya lanicokai ri anjo pa'danga sa'genna panra'. Jari sappuru'mi barambannu lanri pacce,

YEHEZKIEL 30:2

“He tau, a'boto mako siagang pabattui mae ri bansa Mesir apa Kupaua, iNakke Batara Kaminang Tinggia, ri ke'nanga. Ammarrangko siagang appiraungko kamma anne: Aduh! A'reppese'mi allonNa Batara! Tasalloami Nangngalle tindakang. Anjo alloa sassangi na nia' rammang, wattunna anggappa hukkungang bansa-bansaya.

YO"EL 1:13

He sikamma imang allayania ri tampa' pakkoro'bangnganga, ammakeko kaeng karung, siagang angngarru' mako. Antamakko ri Balla'Na Batara appiraung sipattang kabusu', nasaba' tenana koro'bang anggoro' siagang gandung untu' Allata'alanu.

AMOS 8:10

Sikamma passua'-suarrannu laKupinrai a'jari kasusaang, siagang kelong-kelonnu a'jari karru'. LaKupa'jariko ikau ancukkuruki kalennu siagang ammakeko kaeng karung tanra si'na. Rapangko anrong mangge angkarruki kamateanna ana' sitau-tauna. Anjo alloa lakala'busangi a'jari allo sanna' appakasi'nana pa'mai'.”

MIKHA 1:16

He tu Yehuda, polongi uu'nu salaku tanra susa mae ri ana'-ana'nu nukamaseanga. Cukkuruki ulunnu sa'genna a'gondolo' rapang jangang-jangang pakanre bakkea, nasaba' laniengkaki ana'-ana'nu mange ri butta pammelakkanga.

PAMMILANGNGANG 25:4

Nakanamo mae ri Musa, “Jakkala' ngasengi anjo sikontu tau ampimpingai anjo bansaya siagang bunoi ke'nanga ri dallekanna tau jaia untu' anggaukangi parentaKu, sollanna tenamo naKularro mae ri anjo bansaya.”