YEREMIA 4:4 - KITTA' MATANGKASA'

⁴ Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

YEREMIA 4:4 ပူးပေါင်းရင်းမြစ်များ

2 PATTOTTORANG 34:25

Ma'bokomi ke'nanga ri Nakke siagang assaremi ke'nanga koro'bang mae ri rewata-rewata maraenga. Sikontu anjo apa nagaukanga ke'nanga napanaiki larroKu. LarroA' mae ri Yerusalem, siagang anjo larroKu takkulleai naung.

YESAYA 10:17

Allata'ala matangkasaka, Cayana Israel, la'jari pepe' angkanreai sikamma apa niaka lalang siallo bawang, ba'lalo sikamma rompo' katintinga.

YESAYA 30:33

Battu riolo iji nale'ba'mo nipasadia tampa' pattunuanna karaeng Asyur. Anjo tampaka lantangi naluara', rassi kayu tunuang attambung-tambung. LaNaparinrai Batara nampa nappasa'Na Napatui' sangkamma batu a'rinra assulu' ri nappasa'na.

YESAYA 51:17

Ambangungko, he Yerusalem, ambangung mako! Hukkungang Napabattua Batara lanri larroNa le'ba'mi nujappai sa'genna la'busu'.

YEREMIA 15:14

Ri pa'rasangang maraeng tenaya naassengi ke'nanga, laKupa'jari atai ke'nanga mae ri musu-musunna, lanri allumpana larroKu rapang pepe' a'rinra lompoa siagang tenaya naero' mate pepe'na.”

YEREMIA 21:5

KalengKu lambundukiko siagang kagassingangKu, lalang allumpana larroKu.

YEREMIA 23:19

LarroNa Batara rapangi anging barubu a'jalloka siagang antujui sikamma tau ja'dalaka.

YEREMIA 36:7

Gassingka lanri kammana anjo nalappala' doang ke'nanga mae ri Batara, siagang toba' battu ri panggaukang-panggaukang ja'dala'na ke'nanga. Teai sipato' larroNa Batara mae ri ke'nanga siagang Naancangi ke'nanga.”

YEREMIA 44:22

Tenamo Natahangi Batara ancinikko assare koro'bang mae ri rewata-rewata maraenga. Anjo panggaukannu ja'dalaki siagang tunai. Doraka mako mae ri Batara siagang tenamo numannuruki ri parenta-parentaNa. Lanri kammana anjo, kamma-kamma memang anne ancuru'mi pa'rasangannu sa'genna tenamo nakkulle nipammantangngi, siagang arenna nipakemi a'jari kana pattunra. Tau ancinikai a'jari sanna'mi malla'na.”

YEREMIA 9:25

Nakana Batara, “Lanarapiki sallang wattunna naKuhukkung tu Mesir, Yehuda, Edom, Amon, Moab, siagang pandudu'na parang lompoa ancukkuru' bodoai uu'na. Nisunna' ngasengi ke'nanga sangkamma tu Israel, mingka baji' nake'nanga kammayatompa bansa Israel nipasangkammai siagang sikamma tau tenaya nisunnaki, lanri tenana namannuruki ke'nanga ri parjanjiang nipangngebaranga lalang sunnaka anjo.”

PIRAUNG 4:11

Napa'betteseki larroNa Batara na Natunu Kota Sion sa'genna sillappara' buttaya.

YEHEZKIEL 16:38

LaKuhukkungko lanri passundallang siagang pammunoang le'baka nugaukang. Lalang nassuKu siagang larroKu laKuhukkung mateko.

YEHEZKIEL 18:31

Pamari anjo sikontu panggaukang ja'dala' nugaukanga siagang lappassammi a'jari beru atinnu siagang pikkirannu. Angngapa numusti mate?

YEHEZKIEL 20:33

“Lanri iNakke, Allata'ala Mattallasaka, Batara Kaminang Tinggia, Kupakaingakko angkanaya lanri larroKu, laKuparentako siagang terasa' sa'genna nukasia' kakoasangKu. LaKupa'rappungko siagang laKuerangko ammotere' battu ri sikontu pa'rasangang tampa'nu nipasisa'la'-sa'la'.

YEHEZKIEL 21:17

INakke lattempa lima tonga', nampa naung larroKu. INakke, Batara, anne akkana.”

YEHEZKIEL 24:13

He Yerusalem, anjo panggaukang-panggaukang kodinu nara'massimi kalennu. Kucobami antangkasiko, mingka tena matu-matunna, lanri tuli ra'masa'nu. Tena nulatangkasa' ammotere' sa'genna ammari pangngalarroingKu mae ri kau.

YEHEZKIEL 24:8

Anjo ceraka kubalang parekangi anjoreng sa'genna akkulle nicini' siagang a'boya pa'balasa'.”

YEHEZKIEL 44:7

Le'ba'mi ke'nanga anra'massi BallakKu, nasaba' lalang nipassareanna mae ri Nakke jannana siagang cera'na koro'banga, napa'biangi ke'nanga antama sikamma bansa maraeng tenaya nassunna', siagang tena namannuruki ri Nakke. Lanri anjo sikamma panggaukanna ke'nanga appakaringi'-ringika, nadakkaimi parjanjiangKu siagang ke'nanga.

YEHEZKIEL 6:12

Lanakasia' ngasengi ke'nanga jallo'na kalarroangKu. Sikamma tau bellaya ri butta pammelakkanga latu'guru' garringi nampa mate; tau ambania lamatei lalang bundu', siagang la'binnaya lamate naallei garring.

YEHEZKIEL 8:18

Lanapisa'ringi ke'nanga pangngalarroi lompoKu! Tena nalaKumaapakkang siagang laKupammopporang ke'nanga. Manna pole na'gora-gora lompo tojeng ke'nanga appala' doang ri Nakke, tena nalaKupilangngeri ke'nanga!”

KAIMANGNGANG 26:28

la'jari larroMa' ampangngajariko, siagang laKuhukkungko pole a'lappi tuju la'bi battala'na na hukkungang rioloa.

KAIMANGNGANG 26:41

sa'gengKu angngalle tindakang angngewai ke'nanga nampa Kubongka ke'nanga mange ri pa'rasanganna musu-musunna ke'nanga. Kala'busanna, punna tundu'mo jari-jarinu siagang le'ba'mi najappai hukkunganga lanri dosana siagang mangngewana ke'nanga mae ri Nakke,

AMOS 5:6

Ammotere' mako mae ri Batara, na nulattallasa'. Punna tammoterako mae ri Ia, labattui kontu pepe' a'le'lereka siagang antunui sa'genna cappu' sikontu tu Israel. Ri Betel tena manna sitau akkulle ambunoi anjo pepeka.

ZEFANYA 2:2

lalang tenanapa nukalumeng siagang kalotoro' rapang bunga! Sadara' mako lalang tenanapa nabattu allo pangngalarroiNa Batara, siagang tenanapa natujuko anjo pangngalarroi a'rinra-rinraNa.

ROMA 2:25

Punna nuturuki hukkung-hukkung agama Yahudia, nia' tommo matu-matunnu nisunna'. Mingka punna takkulleako anggaukangi anjo apa-apa nipassuroanga lalang ri anjo hukkung-hukkunga, ma'nassa tena sikalimo matu-matunnu nisunna'.

PAOLE 10:16

Jari appakkaramula kamma-kamma anne musti mannurukiko mae ri Batara siagang tea' mako kapala batui pole.

PAOLE 30:6

Ikau siagang jari-jarinu lanisareko nyawa sarroa mannuruki, sa'gennu mangngamaseang ri Karaeng Allata'alanu lalang sikontu pa'mai'nu siagang akkulleko tulusu' ammantang ri anjo buttaya.

PAOLE 32:22

A'rinrai larroKu rapang pepe' ampakamutungi sikamma apa niaka mattompo' butta; a'le'lereki pepeka sa'genna sirinna langika, antunui monconga sa'genna aka'-aka'na.

KOLOSE 2:11

Le'ba' mako nisunna' lanri asse're mako siagang Almasi; mingka teai sunna' nagaukanga rupataua, passangalinna sunna' Nagaukanga Almasi, le'baka allappassangko battu ri kakoasanna sipa'-sipa' dorakaya.