YEREMIA 4:1 - KITTA' MATANGKASA'

¹ Nakana Batara, “He umma' Israel, punna erokko ammotere', ammotere' mako mae ri Nakke. Pelaki rolong anjo barhala-barhala Kukabirissia, nampa majarre' mako mae ri Nakke.

YEREMIA 4:1 ပူးပေါင်းရင်းမြစ်များ

PA'JARIANG 35:2

Nakanamo Yakub mae ri kaluargana siagang sikontu tau naaganga, “La'lampaki' anrinni nampa mangeki' ri Betel. Lambangunga' anjoreng tampa' pakkoro'bangngang untu' Allata'ala, Ia le'baka antulunga' ri wattungku lalang kasukkarang siagang le'baka anjagaia' manna kemae lampaku. Jari pela' ngasengi sikontu patung-patung maraenga ia niaka ri kau. Tangkasi ngasengi kalennu siagang pakei pakeang tangkasa'nu.”

2 KARAENG-KARAENG 23:13

Kammayatompa sikamma tampa'-tampa' pakkoro'bangngang niaka ri bageang rayana Yerusalem, ri bageang timboro'na Bonto Kaja'dallanga, niputta kabusu' tongi. Anjo tampa'-tampa' pakkoro'bangnganga nabangungi Salomo untu' anynyomba ri rewata-rewata appakaringi'-ringika, iamintu Asytoret, dewina bansa Sidon, Kamos rewatana bansa Moab siagang Milkom rewatana bansa Amon.

2 KARAENG-KARAENG 23:24

Sollanna nakkulle nigaukang hukkung-hukkung niaka tattulisi' lalang ri anjo kitta' nagappaya Imang Lompo Hilkia lalang ri Balla'Na Batara, nabongka kabusu'mi Karaeng Yosia sikamma pakio' rohna tumatea siagang pacinika battu ri Yerusalem siagang battu ri sikontu Yehuda, nampa napela' kabusu' rewata ruma tanggaya, barhalaya, siagang barang-barang nipakea untu' anynyomba ri rewata-rewataya.

2 PATTOTTORANG 15:8

Nalangngere'na Asa kananna anjo Azarya ana'na Oded, a'rinrami sumanga'na. Napakabella kabusu'mi sikontu barhala niaka ri pa'rasangang Yehuda siagang Benyamin, kammayatompa ri kota-kota le'baka nabeta ri daera monconna Efraim, nampa napakabaji' tampa' pakkoro'bangngang niaka ri parang lakkenna Balla'Na Batara.

2 PATTOTTORANG 33:8

Punna naturuki umma' Israel sikontu parentaKu siagang hukkung-hukkung napassareanga Musa atangKu mae ri ke'nanga, tena nalaKulappassang ke'nanga nibongka assulu' battu ri pa'rasangang le'baka Kupassareang mae ri ke'nanga.”

2 PATTOTTORANG 34:33

Sikamma barhala-barhala appakaringi'-ringika, niaka ri sikontu Israel, niancuru' ngasemmi ri Karaeng Yosia. Nampa nasuro ra'yaka sollanna anynyomba mae ri Batara, Allata'alana boe-boena ke'nanga. Jari lalang attallasa'na ija Yosia, tuli majarreki tappa'na ra'yaka mae ri Batara.

YESAYA 31:6

Nakana batara, “O, bansa Israel, nuewaMa' siagang doraka mako ri Nakke. Mingka kamma-kamma anne, ammotere' lalo mako mae ri Nakke!

YEREMIA 15:19

Appiali Batara angkana, “Punna ammoterekko, laKutarimako. La'jariko ammotere' atangKu. Punna nukabarrangi apa a'matu-matua siagang teai bicara tena bonena, akkulleko ammotere' a'jari na'biKu. Labattui pole taua mae ri kau, siagang tenamo nuparallu mae ri ke'nanga.

YEREMIA 15:4

LaKupa'jari sikontu bansaya ri lino sanna' malla'na anciniki ke'nanga. Kugaukang ngasengi anjo sikammaya lanri panggaukanna Manasye ana' bura'nena Hizkia ri Yerusalem ri wattunna ia a'jari karaeng ri Yehuda.”

YEREMIA 18:11

Nakana Batara ri nakke, “Kamma-kamma anne, pabattui mae ri sikamma tu Yehuda siagang pandudu'na Yerusalem angkanaya kamma-kamma anne apparekKa' rancana untu' ambaliangi ke'nanga, siagang Kupasadiangi ke'nanga hukkungang. Suroi ke'nanga ampamari cara tallasa'na ke'nanga dorakaya kammayatompa napakabajiki panggaukanna ke'nanga.

YEREMIA 24:9

LaKupa'jari cilakai ke'nanga sa'genna sikontu bansaya ri sikontu linoa a'jari malla' ngasengi. Kemae-kemae ke'nanga Kupasiara', lanicau-caui ke'nanga, dipa'jari kakkallang siagang nicalla-calla. Arenna ke'nanga lanipakei a'jari pattunra.

YEREMIA 25:5

Nasuroko ke'nanga ampamari batenu attallasa' ri kaja'dallanga, siagang sikamma panggaukang dosanu, sollannu akkulle ngaseng ammantang tuli ri anne pa'rasangang le'baka Napassareang Batara mae ri kau siagang mae ri boe-boenu a'jari pisakanu.

YEREMIA 3:1

Nakana Batara, “Punna nia' sitau baine nitalla' ri bura'nenna, nampa anjo bainea nibaineangi ri bura'ne maraeng, takkulleai anjo le'ba' bura'nenna ambaineangi pole ammotere', lanri anjo passala' kammaya lammanraki ri anne pa'rasanganga. Ikau tu Israel, jai sikalimi tanrinnu, antekamma batenu lakkulle ammotere' mae ri Nakke!

YEREMIA 3:12

Nasuroa' Batara a'lampa untu' ampabattui anne passalaka mae ri Israel angkanaya: “He Israel tenaya namajarre' pa'mai'na, ammotere' mako mae ri Nakke! Lompo pangngamaseangA' ri kau siagang tena Kutuli lalarro mae ri kau.

YEREMIA 3:14

Nakana Batara, “He umma' tenaya namajarre' pa'mai'na, ammotere' mako mae ri Nakke! INakke ampatangko. LaKualleko tassitau battu ri tunggala' kotaya, ta'rua tau battu ri tunggala' lokoang bija, nampa Kuerangko ammotere' mange ri Bulu' Sion.

YEREMIA 3:22

He ikau ngaseng sikontu tau ambokoiyai Batara, ammotere' mako! LaNapammolleko battu ri garrinnu, siagang laNapa'jariko majarre' ri pa'mai'nu. Nukana ngaseng, “Iyo, kamma-kamma anne ammotere'mi ikambe mae ri Batara, nasaba' Iami Allata'alana ikambe.

YEREMIA 35:15

Tena ammariKu assuroi battu mae ri kau sikamma atangKu na'bi-na'bia, siagang napakainga' mako ke'nanga sollanna nupakabaji' panggaukannu na nupamari a'gau' ja'dalaka. Napakaingakko ke'nanga sollanna tena nunynyomba mae ri rewata-rewata maraenga siagang tena nupare' atai kalennu mae ri anjo rewata-rewataya, sollannu akkulle ammantang tuli anrinni ri pa'rasangang Kupassareanga mae ri kau siagang mae ri boe-boenu. Mingka taerokako amparhatikangi siagang taerokako mappilangngeri ri Nakke.

YEREMIA 36:3

Gassingka lammariji tu Yehuda a'gau' ja'dala' punna nalangngere' ke'nanga passala'na sikontu bala laKupabattua mae ri ke'nanga. Jari akkullei laKupammopporang dosana siagang kaja'dallanna ke'nanga.”

YEREMIA 4:4

Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

YEREMIA 7:5

Pinrai katallassannu siagang panggaukannu. Adelekko tasse're-se're tau mae ri parannu tau.

YEREMIA 7:7

Punna nupinrai cara katallassannu siagang panggaukannu kammayatompa nupammari anggaukangi yangasenna anjo kammaya, laKusareko pangngellai ammantang tuli anrinni ri pa'rasangang le'baka Kupassareang a'jari butta pisaka mae ri boe-boenu.

YEHEZKIEL 11:18

Punna ammotereki ke'nanga, lanapela' ngasengi ke'nanga barhala kodia siagang appakaringi'-ringika ia nabuntuluka ke'nanga.

YEHEZKIEL 18:13

Punna assarei angnginrang appalaki bunga. Apaka anjo tau kammaya lattallasaki? Tena! Nagaukammi sikontu panggaukang appakaringi'-ringika anjo, siagang lamatei. Anjo namate lanri panggaukanna tonji.

YEHEZKIEL 43:9

Mingka appakkaramula kamma-kamma anne musti napammari ke'nanga anynyomba ri barhala siagang napaletteki sikamma maya'na karaenna ke'nanga. Le'baki anjo, lammantamMa' ri tangnga-tangngana ke'nanga sa'genna satunggu-tungguna.”

HOSEA 14:1

Samaria musti nihukkungi lanri angngewana ri Nakke. Lamatei ra'ya'na lalang pa'bundukanga; ana'-ana' lolona lanilissaraki, siagang bai'-baine tiananga lanipuei battanna.”

HOSEA 2:2

Nakana Batara, “He ana'-anakKu, anjo amma'nu teaimi bainengKu, siagang iNakke teaiMa' bura'nenna. Lanri kammana anjo akkara-kara mako siagang ia, sollanna tenamo na'gau' bawang siagang assundala' pole.

HOSEA 7:16

Tulusu' amminawanna ke'nanga ri rewata-rewata tena sikalia koasana. Takkulleai nipattoang ke'nanga, rapang anrong pana akkombeka otere'na. Tampoi a'bicara pamimping-pamimpinna ke'nanga, passala' kammanami anjo nalanibuno ke'nanga siagang pa'dang, na nikakkali ri tu Mesir.”

YO"EL 2:12

Nakana Batara, “Mingka kamma-kamma anne, pakkalepumi atinnu ammotere' mae ri Nakke, nuppuasa, appiraung siagang angngarru'.

ZAKHARIA 1:4

Teako sangkammai boe-boenu. Wattu jammang riolo napabattui sikamma na'bia pasangKu mae ri ke'nanga sollanna tanagaukangngamo gau' ja'dalaka siagang gau' dosaya ke'nanga. Mingka tanajampangiai ke'nanga siagang taerokai ke'nanga mannuruki ri Nakke.

PAOLE 27:15

Tu Lewi: ‘Nitunrai tau appareka patung battu ri batu, kayu yareka bassi-bassiang, nampa nasomba accokko-cokko; Nakabirisi Batara panynyombanga ri barhala!’ Sikontu ra'yaka: ‘Aming’!

PAOLE 4:30

Punna nitujuko ri yangasenna anjo balaya siagang punna niakko lalang ri kasukkaranga, lammoterekko mae ri Karaeng Allata'alanu siagang mannuruki ri Ia.

YOSUA 24:14

Nakanamo pole Yosua, “Jari, kamma-kamma anne pakala'biriki Batara. Anynyombako mae ri Ia silambusu'na pa'mai'nu siagang pa'mai' tamamminraya. Pakabellai rewata-rewata nasombaya riolo boe-boenu ri Mesopotamia siagang ri Mesir. Anynyombako ri Batara bawang.

HAKING-HAKING 10:16

Nampa napela' ngasemmo ke'nanga sikontu patung barhalaya, nanynyombamo ke'nanga ri Allata'ala. Natu'guru' pangngamaseammo Allata'ala anciniki ke'nanga lalang kasukkarang.

1 SAMUEL 7:3

Nakanamo Samuel ri umma' Israel, “Punna erokko ammotere' mae ri Batara siagang anynyomba ri Ia siagang sikontu atinnu, musti nupela' ngasengi sikontu rewata battu-battua siagang patunna Dewi Asytoret. Passareang tabasikali kalennu mae ri Batara, siagang anynyomba mako mae ri Ia bawang, na Nalappassangko battu ri tu Filistin.”