YEREMIA 32:44 - KITTA' MATANGKASA'

⁴⁴ sura' pammallina lanitekengi, nisarei segele', siagang nitekengi ri sa'bi-sa'bi. Anjo kammaya lakajariangi ri daerana Benyamin, ri desa-desa tammulilina Yerusalem, ri kota-kota Yehuda, ri kota-kota ri daera monconga, ri daera bangkeng buluka, siagang ri Yehuda bageang timboro'. Anne bansaya laKupakabajiki ammotere' katallassanna ri anne pa'rasanganga. INakke, Batara, anne akkana.”

YEREMIA 32:44 ပူးပေါင်းရင်းမြစ်များ

YESAYA 44:26

INakke ampakajarreki kananna atangKu, siagang anggaukangi rancana napa'nyataya tunisuroKu, iNakke angkana lanipammantangngi poleammi Yerusalem, siagang kota-kota Yehuda laKubangung poleangi ammotere'; laKupakabajiki sikamma rumbanganna.

YEREMIA 13:19

Kota-kotana Yehuda ri bageang timboroka nikurungi ri musu, siagang tenamo akkulle antarrusuki anjo pakkurunga. Sikontu tu Yehuda niengka' ngasengi mange ri butta pammelakkanga.”

YEREMIA 17:26

Sikamma tau niaka battu ri kota-kota Yehuda, kammayatompa battu ri desa-desa niaka ri tammulilina Yerusalem; laniaki ke'nanga battu ri daera Benyamin, battu ri daera bangkeng buluka, battu ri daera monconga siagang battu ri daera Yehuda bageang timboro'. Langngerangi ke'nanga mange ri BallakKu iamintu olo'-olo' lanipare' koro'bang, baji' lanitunua kammayatompa tenaya, kammayatompa gandung passare, kamanynyang, siagang passare kasukkurang.

YEREMIA 30:18

Nakana pole Batara: “Ikau, ummakKu laKukamaseangko siagang laKupakabajiki ammotere' katallassannu ri butta passolongang cera' kalennu. Lanibangungi ammotere' Yerusalem, siagang lanipakabajiki balla' karaenna.

YEREMIA 30:3

Nasaba' lanarapiki sallang wattunna nalaKupa'jari baji' ammotere' katallassanna ummakKu Israel siagang Yehuda. LaKuerangi ammotere' ke'nanga mange ri pa'rasangang le'baka Kupassareang mae ri boe-boena ke'nanga. Anjo pa'rasanganga lanapatangi ammotere' ke'nanga. INakke, Batara, anne akkana.”

YEREMIA 31:23

Batara Kaminang Koasaya, iamintu Allata'alana Israel, nakana, “Punna le'ba'mi Kupa'jari pore ummakKu sangkamma riolo, ri pa'rasangang Yehuda siagang ri desa-desana nia' nilangngere' tau lakkana, ‘Dasi-dasi naNabarakkaki Batara bulu' matangkasaka ri Yerusalem tampa' pammantangngang matangkasaka untu' KalenNa.’

YEREMIA 32:37

LaKupasse'rei anne bansaya battu ri sikontu pa'rasangang tampa'na ke'nanga Kupasisa'la'-sa'la' lanri larroKu siagang lussakKu mae ri ke'nanga. LaKuerangi ke'nanga ammotere' mae anrinni siagang Kukellai ammantang anrinni siagang amang.

YEREMIA 33:11

Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

YEREMIA 33:13

Ri kota-kota ri daera monconga, ri bangkeng buluka, daera Yehuda bageang timboro', siagang ri daerana Benyamin, ri desa-desa niaka ri tammulilina Yerusalem, kammayatompa ri kota-kota Yehuda, lanabilangi ammotere' gimbala'na sikamma pakalawakia. INakke, Batara, anne akkana.”

YEREMIA 33:26

kammatommi anjo latuli Kuta'galaki parjanjiangKu siagang jari-jarina Yakub, siagang atangKu Daud. Nia' sitau battu ri jari-jarina Daud laKupile untu' ammarenta ri jari-jarina Abraham, Ishak, siagang Yakub. LamangngamaseangA' mae ri ummakKu, siagang Kupa'jari kalumanynyangi ammotere' ke'nanga.”

YEREMIA 33:7

Yehuda siagang Israel laKupa'jari porei sangkamma riolo siagang lammentengi ammotere' salaku ummakKu.

OBAJA 1:19

Lanaempoi tu Yehuda timboranga pa'rasangang Edom. Sikamma tau battua ri pa'moncongang bageang ilauka lanabetai daera Filistin. Suku Benyamin lanaempoi Gilead, siagang Israel ummakKu lakoasai sikontu Efraim siagang Samaria.

OBAJA 1:20

Tu Israel waraka lammotereki battu ri pammelakkanga siagang naempoi Fenisia sa'genna Zarfat. Tu Yerusalem nipelaka mange ri Sardis, lammotereki siagang napatangi kota-kota bageang timboro'na Yehuda.

ZEFANYA 2:7

Pandudu'na Yehuda akkullea ta'lappasa' lanaempoi anjo daeranu. Lakkalawaki olo'-olo' ke'nanga anjoreng ri tampaka, siagang punna bangngi latinroi ke'nanga ri balla'na tu Askelon. Nasaba' Batara, iamintu Allata'alana ke'nanga, lanjagai pole ke'nanga siagang laNapa'jari ke'nanga akkalumanynyang poleang.

ZAKHARIA 7:7

Iaminjo Napaua Batara tete ri na'bi-na'biNa ri jammang allaloa ri wattunna nipammantangngi ija Yerusalem siagang coppong katallassanna pandudu'na. Anjo wattua tena nanjorenja ri desa-desa ri tammulilina kotaya ammantang taua, mingka ba'lalo ri bageang timboro' siagang ri bangkeng-bangkeng bulu' niaka ri bageang ilau'.