YEREMIA 3:19 - KITTA' MATANGKASA'

¹⁹ Nakana Batara, “He Israel, erokKa' antarimako a'jari anakKu, siagang assareko pa'rasangang appakasannanga pa'mai', pa'rasangang kaminang bajika ri sikontu linoa. ErokKa' nukio' mangge, siagang tenamo nanula'lampa pole ampilariA'.

YEREMIA 3:19 ပူးပေါင်းရင်းမြစ်များ

PAMMUJI 106:24

Nampa natolla' ke'nanga anjo pa'rasangang ga'gaya lanri tena natappa' ri janjinNa Allata'ala.

PAMMUJI 16:6

Teai sipato' ga'gana passareTa mae ri nakke, sanna' napakasannanna pa'maikku!

PAMMUJI 89:26

LaKupa'la'baki kakaraenganna, battu ri Tamparang Tangngaya sa'genna Binanga Efrat.

PANGNGEBARANG 3:35

Tau cara'deka pila' mabauki arenna, mingka tau toloa pila' nicallai.

YESAYA 63:16

Sai iKatte manggena ikambe? Abraham siagang Yakub tanaassengai ikambe. Mingka iKatte o Batara, iKatte Manggena ikambe, Mappasalama'na ikambe battu riolo dudu.

YESAYA 64:8

Mingka iKatte, o Batara, iKatte Manggena ikambe, ikambe butta pi' ji bawang, na iKatte ampareki ikambe; ikambe yangasenna bate pare' limanTa.

YEREMIA 12:10

Jai pamarenta bansa maraeng le'ba' ampanraki koko anggorokKu siagang angngonjo'-onjokangi sikamma kokongKu. Pa'rasangang ga'gaKu napinrai a'jari parang luara' sinoa.

YEREMIA 3:17

Anjo wattua kota Yerusalem laniarengi ‘Empoang Kala'biranNa Batara’, siagang sikontu bansaya la'rappungi ri anjo kotaya untu' anynyomba ri Nakke. Tenamo nalanaturuki ero' kalenna ke'nanga ja'dalaka siagang kapala batua anjo.

YEREMIA 3:4

Ri wattu anjo kasukkarrannu nukana mae ri Nakke angkanaya iNakke manggenu, angkanaya Kukamaseangko battu ri ca'di-ca'dinu.

YEREMIA 31:20

Israel, ikau ana' nisayangKu, ana' Kungaia, bua atingKu. Punna Kuancangko tuli nakkuKa' Kumangngu'rangi ri kau. LaKugaukanga mae ri kau iamintu Kukamaseang sikaliko.

YEREMIA 31:9

A'jappai ke'nanga nammatti' je'ne' matanna, Kusaleori siagang Kururungangi ke'nanga. Kuerangi ke'nanga allalo ri tampa'-tampa' jaia je'ne'na, allalo ri agang lappara' tenaya nakkulle tatto'ro ke'nanga. INakke rapang mangge mae ri Israel; Efraim ana' bura'ne bungasakKu.”

YEREMIA 33:9

Yerusalem la'jari karannuangKu siagang kalompoanna nyawaKu. Sikontu bansaya ri lino la'jari mallaki siagang annekkereki kammayatompa lappakalompoi ri Nakke, punna nalangngereki passala'na kabajikang Kugaukanga untu' pandudu'na Yerusalem, siagang kakalumanynyangngang Kupassareanga mae ri anjo kotaya.”

YEREMIA 5:7

Nakana Batara, “Angngapa namusti Kupammopporang dosa-dosana ummakKu? NabokoiMa' ke'nanga siagang anynyombami ke'nanga ri tenaya na Allata'ala. Kusarei ke'nanga kanre sa'genna bassoro', mingka kammaji a'gau' bawanna, siagang masarroi a'lampa ke'nanga mange ri baine pasundalaka.

YEHEZKIEL 20:6

Anjo wattua assumpA' angkana laKuerangi ke'nanga assulu' battu ri Mesir mange ri pa'rasangang Kupilea untu' ke'nanga. Anjo pa'rasanganga kalumanynyangi siagang coppongi, butta kaminang bajika ri sikontu linoa.

DANIEL 11:16

Anjo karaeng pa'rasangang waraka lappaero'-eroki appanggaukang, nampa tena naniewai manna sike'de'. Lanaempoi tongi pa'rasangang ga'gaya nampa nakoasai kabusu'.

DANIEL 11:41

Ba'lalo butta ga'gaya nabunduki ngaseng, siagang appulo sa'bui tau nabuno. Mingka kakaraengang Edom, Moab, siagang bageang parallua ri kakaraengang Amon lasalamaki.

DANIEL 11:45

Ba'lalo lanatannangi kema kakaraenganNa ri alla'na tamparanga siagang bulu' tampa' pammantanganna Balla'Na Batara. Mingka kale'bakkanna lamatei siagang tena manna sitau lantulungi.”

DANIEL 8:9

Battu ri kalase'renna anjo tanruka nia'mo attimbo tanru' ca'di, a'jari sannaka lompona siagang a'la'baka kakoasanna a'lampa timboro', anrai', siagang mae ri butta ga'gaya.

HOSEA 11:8

Nakana Batara, “He Israel, tena olonu laKubalang parekang yareka Kubokoi. Maka akkulleko Kuputta sangkamma Adma? Yareka Kupakamma Zeboim? Tena naero' pa'maikKu anggaukangi anjo kammaya, lanri lompo duduna pangngaingKu mae ri kau!

GALATIA 3:26

Lanri tappa' mako mae ri Isa Almasi, a'jari se'remi tallasa'nu mae ri Ia; na lanri kammana, a'jari mako ana'-ana'Na Allata'ala.

EFESUS 1:5

le'ba' memammi Napattantu la'bi riolo, angkanaya laNaangka' maki' a'jari ana'-ana' KalenNa, tete ri Isa Almasi. Na memang iaminjo eroka Nagaukang.

PAOLE 14:1

“Ikaumi umma'Na Karaeng Allata'alanu. Jari punna susako lanri kamateangko, teako loko'-lokoki batangkalennu yareka teako cukkuruki bageang dallekanna ulunnu sangkamma nagaukanga bansa-bansa maraenga.

IBRANI 10:39

Ikatte anne teaiki' umma' ammono'bokoa siagang sala oloanga. Mingka ikatte umma' matappakki' mae ri Allata'ala siagang nipasalamaka ri Allata'ala.

1 PETRUS 1:17

Ri wattunnu appala' doang, akkio' Manggeko mae ri Allata'ala. Jari, Iami anjo Allata'ala langngadeli rupataua situru' massing panggaukanna; na tena nalammile tau. Lanri kammana, genteng ri nia'nu ija ri anne linoa, parallui nupakala'biri' Allata'ala lalang ri katallassannu.