YEREMIA 27:18 - KITTA' MATANGKASA'

¹⁸ Punna memang na'bi ke'nanga, siagang le'baki annarima pasang battu ri Nakke, tantu kamma-kamma anne napalaki ri Nakke, Batara Kaminang Koasaya, sollanna barang-barang niaka ija ri BallakKu siagang ri balla' karaeng ri Yerusalem tena naniengkaki mange ri Babel.

YEREMIA 27:18 ပူးပေါင်းရင်းမြစ်များ

PA'JARIANG 20:17

Nipa'jari tamanang ngasemmi ri Batara sikontu baine niaka ri balla' kakaraenganna Abimelekh passabakkang Sara, bainenna anjo Abraham. Nampa appala' doammo Abraham ri Allata'ala, sa'genna nipa'jari baji' ammotere' Abimelekh. Bainenna siagang sikamma atanna bainea, nipa'jari baji' ngaseng tommi ammotere' sa'genna akkulle ngasemmi ammana' poleang.

1 KARAENG-KARAENG 18:24

Lappassammi anjo na'bi-na'bi Baal appala' doang mae ri rewatana ke'nanga, nampa inakke lappala' doang tonga' mae ri Batara. Ia appialia siagang pepe', Iami Allata'ala.” Sikontu ra'yaka appiali ngasemmi angkana, “Situju!”

1 KARAENG-KARAENG 18:26

Jari ammilemi ke'nanga sikayu sapi nampa napasadia. Le'baki anjo appala' doammi ke'nanga ri Baal, battu ri bari'basa' sa'genna tangngallo siagang akkiok-kio', “Baal, pilangngeri ikambe!” Nagaukammi ke'nanga nampa turus a'joge'-joge' ri tammulilina anjo tampa' koro'banna ke'nanga. Mingka tena sikali pappiali mae ri ke'nanga.

2 PATTOTTORANG 32:20

Jari appala' doammi Karaeng Hizkia siagang Na'bi Yesaya ana'na Amos. Akkio'mi' ke'nanga appala' tulung mae ri Allata'ala.

YEREMIA 15:1

Nakana Batara ri nakke, “Tena nalaKukamaseang anne bansaya, manna pole nania' Musa siagang Samuel anrinni untu' ammenteng ampappalakkangi ke'nanga pangngamaseangKu. Suroi anne bansaya a'lampa, tena Kuero' anciniki ke'nanga!

YEREMIA 18:20

Maka siratangi kabajikanga nibalasa' siagang kaja'dallang? Mingka le'ba'mi ke'nanga angngeke kali'bong sollanna kutu'guru' antama. Kiu'rangi angkanaya le'ba'mi ke'nanga kualle-alleang ri dallekanTa, sollanna tena Kilarro mae ri ke'nanga.

YEREMIA 42:2

mae ri nakke nampa angkana, “Bapa', sangkamma kicinika kalenta, ikambe anne riolo jaiki', na kamma-kamma anne sike'de' mamaki' ammantang. Napalaki ikambe ri katte Bapa', nakiero' ampappala' doangngangi ikambe mae ri Karaeng Allata'ala kisombaya. Kipappala' doangngangi ikambe anne niaka ija tassesa ri Karaeng Allata'ala kisombaya,

YEREMIA 7:16

Nakana Batara, “Yeremia, teako pappala' doangngangi anne sikamma taua. Teako appala' tulungi yareka appala' doangngi untu' ke'nanga; teako passaiA', nasaba' taeroKa' ampilangngeri anjo pappalaka.

YEHEZKIEL 14:14

Manna pole nania' Nuh, Danel siagang Ayub ammantang anjoreng ri tampaka, anjo kabajikanna tau tallua poro nyawa kalenna tonji ke'nanga lasalama'. INakke, Batara Kaminang Tinggia anne akkana.

YEHEZKIEL 22:30

Ri alla'na anjo tu Israel, a'boyA' tau akkullea ambangung tembo', yareka ammenteng ri tampa'-tampa' runtunga tembo'na untu' ampartahangkangi anjo pa'rasanganga punna erokKa' angngancuruki lalang a'bettese'na larroKu; mingka manna sitau tania' Kubuntulu'.

MALEAKHI 1:9

Kamma-kamma anne, he sikamma imanga, coba sai pala' mae ri Allata'ala sollanna Nakamaseangki'. Tena Nalanapiali pappala' doannu, siagang anjo battu ri kasalannu tonji.

1 SAMUEL 12:19

Nakanamo ke'nanga mae ri Samuel, “Tulungi ikambe bapa'. Kipappala' doangangi ikambe anne mae ri Karaeng Allata'alanu, sollanna tamatea ikambe. Kamma-kamma anne sadara'mi ikambe angkanaya pantaranganna dosana ikambe riolo, dorakami pole ikambe lanri appala'na ikambe sitau karaeng.”

1 SAMUEL 12:23

Na ri passala'na inakke, tapporo tena lalo kudoraka ri Batara lanri tenana kupappala' doangangko. Mingka tuli lakupangngajarrangi mae ri kau apa-apa bajika siagang tojenga.

1 SAMUEL 7:8

Nakanamo ke'nanga ri Samuel, “Teako ammari appala' doang mae ri Karaeng Allata'alata, sollanna Napasalamakki' battu ri tu Filistin.”