YEREMIA 24:10 - KITTA' MATANGKASA'

¹⁰ LaKupabattui mae ri ke'nanga pa'bundukanga, kacipuranga, siagang garringa sa'genna mate ngaseng ke'nanga siagang tenamo ammantang tassesa anrinni ri pa'rasangang le'baka Kupassareang mae ri ke'nanga siagang boe-boena ke'nanga.”

YEREMIA 24:10 ပူးပေါင်းရင်းမြစ်များ

1 KARAENG-KARAENG 14:15

laNahukkummi Batara tu Israel sa'genna sanrapang apa-apa ta'ronang-ronanga nianyukkang ri je'ne'. Lanipasuluki ra'ya' Israel ri Batara battu anrinni ri anne pa'rasangang bajika ia le'baka nipassareang ri boe-boena ke'nanga. Lanipatassia'-siaraki ke'nanga anta'leanna Binanga Efrat, lanri napabattuna ke'nanga larroNa Batara, iamintu lanri appare'na ke'nanga patung-patung rewata baine Asyera.

YESAYA 51:19

Nitujuko ri ruang rupa bala; lanri bundu' naancuru' taba sikali pa'rasangannu siagang mate cipuru' ra'ya'nu. Tena angkamaseangko siagang ansaleoriko.

YEREMIA 14:12

Manna pole appuasa ke'nanga, tena Kuero' amparhatikangi pakkio'na ke'nanga appala' tulung; siagang manna pole assare ke'nanga mae ri Nakke koro'bang nitunu siagang gandung, mingka tena nalasannang nyawaKu mae ri ke'nanga. Kabalekanna, laKutumpasaki ke'nanga lanri pa'bundukang, kacipurang, siagang garring.”

YEREMIA 15:2

Punna akkuta'nang ke'nanga ri kau angkana kemae musti a'lampa ke'nanga, appialiko kamma anne, ‘Nakana Batara, ia nipattantua lamate lanri garring lappassammi mate lanri garring. Ia nipattantua lamate lalang pa'bundukang lappassammi mate lalang pa'bandukang. Ia nipattantua lamate lanri cipuru' lappassammi mate lanri cipuru'! Ia nipattantua lanitahang, lappassammi niengka' salaku tunitahang!’

YEREMIA 16:4

Lamatei ke'nanga lanri nitaba ri garring angngeranga kamateang, siagang lamatei ke'nanga lalang pa'bundukang yareka mate naallei cipuru'. Tena manna sitau langngarru' yareka antarawangi ke'nanga. Latassiaraki maya'na ke'nanga rapang pupu' panynyoppongi ri butta, siagang nikanre ri jangang-jangang siagang olo'-olo' sekke'.

YEREMIA 19:7

Ri anne tampaka laKupassalasai sikontu rancanana tu Yehuda siagang pandudu'na Yerusalem. LaKubalang parekangi ke'nanga nibeta ri musu-musunna siagang nibuno lalang ri pa'bundukanga. LaKubalang parekangi maya'na ke'nanga nikanre ri jangang-jangang siagang olo'-olo' sekke'.

YEREMIA 21:9

Tunggala' tau ammantanga ri kotaya lamatei lanri pa'bundukang, kacipurang, yareka lanri garring. Mingka tau assuluka manyara mae ri tu Babel angkurungai anne kotaya, lata'lappasaki siagang talanibunoai.

YEREMIA 27:8

Bansa yareka kakaraengang tenaya naero' tundu' mae ri Nebukadnezar laKuhukkungi siagang pa'bundukang, kacipurang kammayatompa garring, sa'genna kale'bakkanna anjo bansaya tunduki mae ri ia.

YEREMIA 29:17

Nakana Batara Kaminang Koasaya, ‘INakke lappabattu pa'bundukang, kacipurang, siagang garring mae ri ke'nanga. LaKugauki ke'nanga sanrapang rappo-rappo ara sannaka botto'na, sa'genna takkullea nikanre.

YEREMIA 29:18

LaKuondang tojengi ke'nanga siagang pa'bundukang, kacipurang, siagang garring sa'genna sikontu bansaya ri sikontu linoa la'jari mallaki anciniki ke'nanga. Kemae-kemae Kupasisa'la'-sa'la' ke'nanga, anjorengi lamalla' siagang lannekkere' taua anciniki apa kajarianga mae ri ke'nanga. Lanicau-caui ke'nanga, siagang arenna ke'nanga lanipakei a'jari kana pattunra.

YEREMIA 32:24

Le'ba'mi nabangung tu Babel tembo'-tembo' angkurungai attammulili kotaya untu' angngallei, na kamma-kamma anne a'bakkami ke'nanga. Pa'bundukang, kacipurang, siagang garring la'jari saba' ri anne kotaya natu'guru' mae ri limanna musua. Kiciniki angkanaya sikontu apa Kipaua a'rupa ngasemmi.

YEREMIA 32:25

Mingka manna nakamma mamo, o Batara Kaminang Tinggia, iKatte ansuroa' amballi anne tampaka ri dallekanna sa'bi-sa'bia, manna nasinampe' mamo nanialle anne kotaya ri tu Babel.”

YEREMIA 42:17

Sikontu tau terasaka pa'mai'na ero' a'lampa mange ri Mesir siagang ammantang anjoreng, lamatei lalang pa'bundukang, yareka lamatei lanri kacipurang yareka lanri garring. Tena manna sitau lata'lappasa' battu ri bala laKupabattua mae ri ke'nanga; yangasenna lamatei.

YEREMIA 42:22

Lanri kammana anjo u'rangi: ri anjo pa'rasangang eroka nubattui untu' ammantang, lamateko lalang pa'bundukang, yareka lanri kacipurang, yareka lanri garring.”

YEREMIA 5:12

Umma'Na Batara teai kana tojenga napau ri passala'na Batara. Nakana ke'nanga, “Ah, tena Nalappanggaukang apa-apa. Tena nalanatujuki' bala siagang tena todong nalanikasia' bunduka siagang kacipuranga.

YEREMIA 9:15

Lanri kammana anjo, pilangngeri apa laKugaukanga, Batara Kaminang Koasaya, Allata'alana Israel: laKusarei ummakKu lamungang pai' untu' nakanre siagang racung untu' nainung.

YEREMIA 9:16

LaKupasiaraki ke'nanga mange ri alla'na bansa-bansa tenaya naassengi ke'nanga yareka ri boe-boena ke'nanga. Latulusu' appabattuA' tantara untu' ambunduki ke'nanga sa'genna Kuancuru' taba sikali ke'nanga.”

YEHEZKIEL 33:27

Lanri iNakke, Allata'ala mattallasaka, Batara Kaminang Tinggia, sikamma anjo tau ammantanga anjoreng ri rumbangnganga ri kotaya lamate nibunoi. Ia ke'nanga ammantanga ri paranga lanikanrei ri olo'-olo' sekke'. Ia accokkoa ri bulu'-buluka siagang ri sikamma leanga lamate garringi.

YEHEZKIEL 6:11

Nakana Batara Kaminang Tinggia, “Si'na mako! Angngarrukko! Angngarrukko pacce pa'mai'nu lanri sikontu kaja'dallang siagang kakodiang le'baka nagaukang bansa Israel. Lamatei ke'nanga lanri pa'bundukang, kacipurang siagang garring.

YEHEZKIEL 7:15

Ri agang-agang niaka ri kotaya nia' pa'bundukang, ri sikamma ballaka nia' garring siagang kacipurang. Inai mamo nia' ri pantaranganna kotaya lamatei lalang pa'bundukang, siagang ammantanga ri kotaya lamatei lanri garring siagang kacipurang.

PAOLE 28:21

Sabattu-battuna garringa antujuko, sa'genna kala'busanna manna sitau battu ri kau tena lammantang tassesa ri anjo pa'rasangang nupammantangngia.

PAPPICINI' 6:8

Kucinikimi, nampa nia' kucini' sikayu jarang pi'lasaka tanja'na. Pabaena niarengi Kamateang. Ri bokona a'reppese'mi amminawang Lino Kamateanga. Kakoasanga mae ri bage appa'na anne linoa nipassareangi mae ri ke'nanga, sollanna akkulle ke'nanga ammuno lalang ri pa'bundukanga, lalang ri kacipuranga, lalang ri kagarringanga, kammayatompa battu ri olo'-olo' sekkeka.