YEREMIA 23:1 - KITTA' MATANGKASA'

^1-2 Nakana Karaeng Allata'alana Israel, “Cilakako he ikau sikamma pamimping ampanrakiai siagang ampasisa'la'-sa'lakai ummakKu! Ikau ngaseng mustina nuparakai ummakKu, mingka tena nanugaukangi kammaya; nubalang parekangi tassiara', lari. Kamma-kamma anne laKuhukkungko lanri kaja'dallannu.

YEREMIA 23:1 ပူးပေါင်းရင်းမြစ်များ

YEREMIA 10:21

Appialima' angkana, “Dongoki anjo pamimping-pamimpinta. Tena nappala' pitunju' ke'nanga mae ri Batara, iaminjo saba'na nasalasa ke'nanga, siagang kinipasiara'mo ri kere-keremae.

YEREMIA 12:10

Jai pamarenta bansa maraeng le'ba' ampanraki koko anggorokKu siagang angngonjo'-onjokangi sikamma kokongKu. Pa'rasangang ga'gaKu napinrai a'jari parang luara' sinoa.

YEREMIA 13:17

Punna kuttu nyawanu mappilangngeri, la'mere'-merekia' angngarru'. Pacce pa'maikku angkarruki anjo katampoannu. Lammattiki je'ne' matangku lanri niengka'na umma'Na Batara salaku tunitahang.

YEREMIA 2:26

Nakana Batara, “Rapang palukka' siri'-sirika ri wattunna nijakkala', kamma tomminjo batenu lasiri'-siri' ngaseng, he tu Israel, siagang sikamma karaenga, sikamma pamarentaya, siagang imang-imanga siagang sikamma na'bi-na'binu!

YEREMIA 2:8

Sikamma imanga tamakkuta'nangngai angkana kemaeA', Batarana. Sikamma tau appaentenga hukkung tanaassengA', sikamma pamarentaya nabaliangA'. Lalang arenna Rewata Baal na'bicara sikkamma na'bia, siagang anynyomba ri barhala tenaya matu-matunna.”

YEREMIA 22:22

Lanri kammana anjo sikamma pamimpinnu lalanynyaki rapang nitui' ri anging. Sikamma agang-agannu laniengkaki salaku tau nitahang, kammayatompa kotanu lanihinai siagang nipakasiriki passabakkang sikontu kaja'dallannu.

YEREMIA 50:6

UmmakKu rapangi gimbala' le'baka nilappassang lingu ri monconga ri pakalawakinna. Pitilampa-lampaimi ke'nanga battu ri moncong se'rea mange ri moncong maraenga siagang tanaassengami angkana kemae balla'na ke'nanga.

YEHEZKIEL 13:3

Nakana Batara Kaminang Tinggia, “Cilakai anjo na'bi-na'bi toloa! Anjo panggappana sangnging pikkirang napare'-pare', siagang anjo paccini'na sangnging balle-balle bawang.

YEHEZKIEL 34:1

Nakana Batara ri nakke,

YEHEZKIEL 34:21

Nusorong-sorongi siagang nuulaki gimbala' garringa sa'genna niemba ke'nanga battu ri pa'rappunganna gimbalaka.

YEHEZKIEL 34:31

Tojeng, ikaumi pa'rappungang gimbalakKu Kusarea kanre. Ikaumi ummakKu, siagang iNakkemi Allata'alanu. INakke, Karaeng Allata'ala Kaminang Tinggia, anne akkana.”

YEHEZKIEL 36:38

Kota-kota ancuruka kamma-kamma anne, larassi bonena sallang sangkamma Yerusalem ri allo-allo passua'-suarrang ri allo allaloa, rassi siagang gimbala' eroka nipassareang. Jari nuassemmi angkanaya iNakke Batara.”

ZAKHARIA 10:3

Nakana Batara, “Sanna' larroKu mae ri tukoasa ammarentaya ri ummakKu, siagang laKuhukkungi ke'nanga. Mingka pandudu'na Yehuda iNakke ampatangi, siagang iNakke, Batara Kaminang Koasaya lamparakai ke'nanga. LaKupa'jari ke'nanga rapang jarang pa'bundukang makassaka untu' iNakke.

MATIUS 15:14

Tea' mako jampangi anjo tu Farisia. Anjo ke'nanga sangnging pamimping-pamimping buta. Na punna tau buta ammimping tau buta, tena tatu'guru'na rua-rua naung ri solonganga.”

MATIUS 9:36

Na ri wattunna Nacini' ngaseng Isa anjo tau jaia, tu'guru'mi pangngamaseanNa. Lanri sanrapangi ke'nanga gimbala' tappelaka siagang dodonga lanri tenana pakalawakinna.

YOHANES 10:10

Punna palukka' battu, ero'naji a'lukka', ammuno siagang ammanraki. Mingka iNakke naKubattu, sollanna anggappa katallassang rupataua iamintu katallassang kala'bianga.

YOHANES 10:12

Pakanre gajia, teai pakalawaki, teai tongi patanna gimbala'; jari lanapilari anjo gimbalaka punna nia' kongkong romang nacini' battu. Lanikokko'mi siagang lanipasisa'la'-sa'la'mi anjo gimbalaka ri anjo kongkong romanga.

YOHANES 10:8

Sikamma tau battua rioloangangKu sangnging palukka' siagang paella'; mingka tanapilangngeriai gimbalaka sa'ranna ke'nanga.