YEREMIA 22:14 - KITTA' MATANGKASA'

¹⁴ Cilaka tongi tau angkanaya, “Lambangunga' balla' karaeng lompoa siagang luaraka kamara'na ri bageang lonjo' iratea,” nampa napare' ri anjo balla' karaenga jandela ammake les kayu camara Libanon, siagang nice' eja.

YEREMIA 22:14 ပူးပေါင်းရင်းမြစ်များ

2 SAMUEL 7:2

Jari nakanamo karaenga ri Na'bi Natan, “Ciniki, anne inakke ammantanga' lalang ri balla' kakaraengang nipareka battu ri kayu camara Libanon, nampa Patti Parjanjianna Allata'ala poro niboliki bawang lalang ri kemaya!”

2 PATTOTTORANG 3:5

Kamara' makase'rea nisarei papang kayu camara kaminang bajika siagang nilapisi' bulaeng toa. Ri anjo lapisang bulaenga nia' ukirang gambara' poko' palem siagang gambara' rante.

PANGNGEBARANG 17:19

Tau mangngaia ri dosa, nangai a'besere'. Tau lompo bicaraya, a'boyai kapanrakang.

PANGNGEBARANG 24:27

Teako ambangungi pakkalabiniang punna tenapa nupasadiai kokonnu siagang nia'mo pa'boya-boyannu.

KELONG MALA'BIRI' 1:17

Poko' kayu arasa' a'jari benteng ballatta, na poko' kayu camara a'jari pammakkanna.

YESAYA 9:9

“Rumbammi sikamma bangunang balla' batua, mingka lappare' poleangi ikambe balla' batu beru. Le'ba'mi nita'bang sikamma poko' kayu araya, mingka lanasambei ikambe siagang kayu camara Libanon kaminang bajika.”

YEHEZKIEL 23:14

Pila' sallo pila' panraki anjo Oholiba. Sanna' nangaina anjo gambara'-gambara' ta'ukirika ri rinring, nicuraka siagang ce' eja kamma cera'. Anjo gambara'-gambaraka iami pangngebarranna perwira-perwira tantarana Babel siagang passikko' aya' ga'ga kammayatompa soro'bang a'doleng naung.

DANIEL 4:30

kukanamo, “Ciniki, tamaka heba'na kota Babel. Inakke ambangungi a'jari ibukota negara, untu' ampa'butti kakoasangku siagang kagassingangku, kala'birangku siagang kalompoangku!”

AMOS 6:8

Naterassimi Batara Kaminang Koasaya siagang Kaminang Tinggia ampassareangi pappakainga' kammaya anne: “Birisiki nyawaKu mae ri katampoanna umma' Israel; tena nasannang nyawaKu mae ri sikamma balla' karaeng ga'gana ke'nanga. Ibukotana ke'nanga siagang sikontu bonena laKupassareangi mae ri musua.”

HAGAI 1:4

“He ummakKu, maka narapi'mi wattunnu untu' ammantang lalang ri balla' bajika siagang kassaka, nampa BallakKu tuli sangkammana tambungang loro?

MALEAKHI 1:4

Ebara' angkana anjo jari-jarina Esau, iamintu tu Edom angkanai, “Le'ba'mi niancuru' kota-kotana ikambe, mingka lanabangungi ikambe ammotere',” lappialimi Batara angkana, “Akkullei nabangung ke'nanga ammotere', mingka laKurumbangi. Laniarengi ke'nanga ‘Pa'rasangang Bassung’ siagang ‘Bansa natabaia pangngalarroinNa Batara sa'genna satunggu-tungguna.’ ”