YEREMIA 18:8 - KITTA' MATANGKASA'

⁸ nampa toba' anjo bansaya battu ri dosana, laKupaonoki anjo pattujungKu.

YEREMIA 18:8 ပူးပေါင်းရင်းမြစ်များ

2 PATTOTTORANG 12:6

Mangakumi karaenga siagang sikontu pamimpinga angkanaya dorakami ke'nanga. Nakanamo ke'nanga, “Anjo apa Nagaukanga Batara adeleki.”

PAMMUJI 106:45

Lanri ke'nanga nau'rangi parjanjianNa Nakarimangngi ke'nanga lanri pangngamaseang malompoNa.

PAMMUJI 135:14

saba' iKatte ampassareangi kaadelanga mae ri ummatTa, siagang angkamaseangi ata-atanTa.

PAMMUJI 90:13

O, Batara, sa'genna siapa salloTa lalarro? Ammotere' lalo maKi' siagang Kikamaseangi ata-atanTa.

KALAPPASSANG 32:12

Punna Kiancuruki ke'nanga, lanakanamo tu Mesirka angkana Kipimpingi anjo bansaya assulu' battu ri Mesir sollanna akkulle Kibuno ke'nanga ri monconga siagang Kiancuru' taba sikali ke'nanga. TeaKi' appakammai, o Batara; Kipinra laloi anjo pattujunTa ero' ancilakai anjo bansaya.

KALAPPASSANG 32:14

Jari Napinrami Batara pattujunNa siagang ta'jariami Nagaukang anjo bala laNapabattua mae ri anjo bansaya.

YEREMIA 12:16

Punna attojeng-tojeng pa'mai'na ke'nanga ero' antarimai agamana ummakKu siagang ero' assumpa angkana, ‘Lanri Batara mattallasaka,’ – sangkamma batena riolo ke'nanga angngajaraki ummakKu assumpa lanri Rewata Baal – la'jarimi ke'nanga golonganna ummakKu siagang la'jari kalumanynyangi ke'nanga.

YEREMIA 15:6

Le'ba'Ma' nusorongboko siagang nubokoi, lanri kammanami anjo naKuangka' limangKu untu' angngancurukko, lanri lanreMa' antahangi larroKu.

YEREMIA 26:13

Lanri kammana pinrami gau' katallassannu siagang panggaukang-panggaukannu; turuki Karaeng Allata'alanu, sollanna taNapa'jaria ero'Na untu' ampitujuiko kacilakang.

YEREMIA 26:19

Mingka Karaeng Hizkia siagang tu Yehuda tena nabunoi Na'bi Mikha. Ba'lalo malla'mi Hizkia mae ri Batara siagang napala'mi sollanna nanikamaseang. Jari taNapa'jariami Batara anjo ero'Na untu' ampabattui cilakaia mae ri ke'nanga. Na kamma-kamma anne, sike'de' mamaki' anne appabattu cilaka lompo mae ri kalenta.”

YEREMIA 26:3

Gassingka eroki anjo bansaya appilangngeri nampa ammari a'gau' ja'dala', sa'genna tena Kupanjari erokKu untu' ampitujui cilaka situru' panggaukang ja'dala'na ke'nanga.”

YEREMIA 36:3

Gassingka lammariji tu Yehuda a'gau' ja'dala' punna nalangngere' ke'nanga passala'na sikontu bala laKupabattua mae ri ke'nanga. Jari akkullei laKupammopporang dosana siagang kaja'dallanna ke'nanga.”

YEREMIA 42:10

‘Punna erokko tuli ammantang anrinni ri pa'rasanganga, laKuangkakko, tena nalaKutu'gurangko; laKupaentengko nai', tena nalaKura'bako. Sanna' si'nana nyawaKu lanri Kupabattuna balaya mae ri kau.

YEHEZKIEL 18:21

Punna nia' tau ja'dala' nampa tenamo nagaukangi pole dosaya, siagang appakkaramulami naturuki hukkung-hukkungKu, kammayatompa nagaukang panggaukang bajika siagang annabaya, ia tena nalamate.

YEHEZKIEL 33:11

Paui mae ri ke'nanga angkanaya lanri iNakke, Allata'ala mattallasaka, Batara Kaminang Tinggia, tena naKusannang punna mate tau ja'dalaka; kabalekanna Kukellai nabokoi ke'nanga dosa-dosana sollanna tuli attallasa'. He bansa Israel, ammari mako a'gau' ja'dala'! Angngapa nuero' mate?

YEHEZKIEL 33:12

Jari, he tau, paui mae ri tu Israel angkanaya punna nia' tau baji' anggaukangi dosaya, anjo kabajikanna rioloa takkulleai antulungi kalenna. Punna tau ja'dala' ammari a'gau' dosa, tena nalanihukkungi, siagang punna tau baji' a'gau' dosa tena nalanipasalamaki.

YEHEZKIEL 33:13

Nakulle kapang le'ba'Ma' a'janji lampasalamaki anjo tau bajika, mingka appakkaramulami a'gau' dosa siagang narannuangi angkanaya lanipasalamaki lanri anjo kabajikanna rioloa, sala pahangi. Tenamo nalaKuu'rangi kabajikang le'baka nagaukang siagang lamatemi lanri dosa-dosana.

YEHEZKIEL 33:14

Nakulle kapang le'ba'mi Kupakainga' tau ja'dalaka angkanaya lamatei ke'nanga. Mingka punna ammari a'gau' dosa, siagang appakkaramulami nagaukang apa bajika siagang annabaya, ebara'na napoterangngangi apa napappita'gallanga taua yareka barang le'baka nalukka', kammayatompa naturuki hukkung-hukkung angngeranga mae ri katallassang, anjo taua tena nalamate.

HOSEA 11:8

Nakana Batara, “He Israel, tena olonu laKubalang parekang yareka Kubokoi. Maka akkulleko Kuputta sangkamma Adma? Yareka Kupakamma Zeboim? Tena naero' pa'maikKu anggaukangi anjo kammaya, lanri lompo duduna pangngaingKu mae ri kau!

AMOS 5:15

Kabirisi kaja'dallanga, siagang mangngaiko ri kabajikanga, paentengi kaadelanga. Gassingka laNakamaseangi Batara sikamma tau tassesaya battu ri bansa Israel.

YUNUS 4:2

Nampa appala' doang nakana, “O Batara, sai le'ba'mi kupau ri tenanapa ku'lampa ri ballakku pirangalloang, angkanaya tantu laKigaukanna anne kammaya? Iaminjo saba'na nakutulusu' lari mange ri Spanyol! Kuassengi angkanaya iKatte Allata'ala assayang siagang angngamaseang, la'bu ri sa'bara', lamma siagang alusu' pa'mai', siagang tuli sadiaKi' untu' ampinrai rancanaTa anghukkung.

PAOLE 32:36

LaNapasalamaki Batara bansaNa na Nakamaseang sikamma atanNa, punna tenamo pakkullena nacini' ke'nanga, nala'busu'mo kitta' magassinna.

HAKING-HAKING 2:18

Punna nia' Napassareang Batara se're pamimping mae ri bansa Israelka tuli Natulummi Batara anjo pamimpinga. Na lalang ri tallasa'na anjo pamimpinga, tuli nilappassanna ke'nanga battu ri musu-musunna. Mangngamaseangi mae ri ke'nanga punna Nalangngere' ke'nanga akkunrareng lanri nisessana siagang nijallakkanna ke'nanga.