YEREMIA 18:10 - KITTA' MATANGKASA'

¹⁰ mingka ribokoanganna tena naero' mannuruki anjo bansaya ri Nakke nampa nagaukang ja'dalaka, laKupaonoki anjo pattujungko.”

YEREMIA 18:10 ပူးပေါင်းရင်းမြစ်များ

PAMMUJI 125:5

Mingka tau a'gau' jekkonga poro nihukkung laloi ri Batara siagang tau ja'dalaka. Poro salewangang lalo ummatTa!

YEHEZKIEL 18:24

Mingka punna nia' tau baji' natenamo nagaukangi bajika, ba'lalo appakkaramulami nagaukang kaja'dallanga siagang sikontu panggaukang appakaringi' biasaya nigaukang ri tau ja'dalaka, maka lakkullei tuli attallasa'? Tena! Battu ri sikamma anjo panggaukang-panggaukang baji'na, tena manna se're laniu'rangi poleang. Lamatei lanri nagaukanna dosaya siagang lanri tenana namajarre' mae ri Nakke.

YEHEZKIEL 33:12

Jari, he tau, paui mae ri tu Israel angkanaya punna nia' tau baji' anggaukangi dosaya, anjo kabajikanna rioloa takkulleai antulungi kalenna. Punna tau ja'dala' ammari a'gau' dosa, tena nalanihukkungi, siagang punna tau baji' a'gau' dosa tena nalanipasalamaki.

YEHEZKIEL 33:18

Sikalipi pole Kupau, angkanaya punna nia' tau baji' appakkaramula anggaukangi ja'dalaka, lamatei lanri anjo kaja'dallanna.

YEHEZKIEL 45:20

Gaukang tongi kammaya anjo ri tanggala' tuju anjo bulanga, untu' sikamma tau le'baka a'gau' dosa mingka tena nakunjungi yareka tena naassengi. Kammami anjo caranu nanujagaimo katangkassanna BallakKu.

ZEFANYA 1:6

LaKupanraki ke'nanga tau tenaya nabattu mae ri Nakke yareka tenaya naero' Kururungang kammayatompa ma'bokoa mae ri Nakke siagang tenayamo naero' amminawang mae ri Nakke.”

PAMMILANGNGANG 14:22

angkanaya manna sitau anne sikamma taua tena lattallasa' untu' antama' ri pa'rasangang le'baka Kupa'janjiang mae ri boe-boena ke'nanga. Nasaba' taerokai ke'nanga mannuruki mae ri Nakke, siagang tulusu' ero'na ke'nanga ampaccoba-cobaiA'. Nampa le'ba'mi nacini' ke'nanga sioro'na cayaKu, siagang gau'-gau' malompo Kugaukanga ri Mesir siagang ri parang lompoa.

PAMMILANGNGANG 14:23

Tena! Tena nalantama' ke'nanga ri anjo pa'rasanganga. Sikamma anjo tau angngewaya mae ri Nakke, tena manna sitau langngonjoki anjo pa'rasanganga.

PAMMILANGNGANG 14:34

Lanukasiaki kale'bakkang kodina dosanu lalang patampulo taung sallona; sitaunga nirekengi untu' siallo battu ri patampulo alloa nupake untu' ansalidiki anjo pa'rasanganga. Lanuassengi angkanaya antekamma kasia'na punna angngewako ri Nakke!

1 SAMUEL 13:13

Nalangngere'na Samuel anjo, nakanamo ri Saul, “Dongo' sikali anjo panggaukanta karaeng. Ebara' angkana kituruki parentaNa Karaeng Allata'ala mae ri katte, ma'nassa laNapattantui Batara angkana ikatte siagang turunganta la'jari karaeng situlusu'na.

1 SAMUEL 15:11

“Assesse'lalangA' angngangkakko a'jari karaeng, nasaba' a'bokoko battu ri Nakke, siagang tena nugaukangi apa Kuparentakanga.” Si'nami nyawana Samuel, siagang sila'busu' bangngimi akkunrareng mae ri Batara.

1 SAMUEL 15:35

Sa'genna kala'busang tallasa'na, tenamo nale'ba' assibuntulu' pole Samuel siagang Saul. Mingka si'nai pa'mai'na Samuel lanri assesse' lalanNa Batara angngangkaki Saul a'jari karaeng mae ri Israel.

1 SAMUEL 2:30

INakke, Karaeng Allata'alana Israel, riolo le'ba'Ma' a'janji angkanaya kaluarganu siagang turungannu la'jari palayang mae ri Nakke, salaku imang sa'genna satunggu-tungguna. Mingka kamma-kamma anne tenamo naKuero' ri anjo kammaya! Nasaba' inai-nai ampakala'biriKa' iami laKupakala'biri', na inai-nai anghina' iami laKuhina.