YEREMIA 14:10 - KITTA' MATANGKASA'

¹⁰ Ri passala'na anjo bansaya Nakana Batara, “Tena Kusannang mae ri sikamma anjo tau nangaia lari a'lampa ambokoiA', siagang tenaya naero' allewai kalenna. Tena nalaKukaluppai kasalanna ke'nanga; laKuhukkungi ke'nanga lanri dosana ke'nanga.”

YEREMIA 14:10 ပူးပေါင်းရင်းမြစ်များ

HOSEA 9:9

Teai sipato' ja'dala'na panggaukannu sangkamma le'baka nagaukang taua ri Gibea. LaNau'rangi Allata'ala kasalannu, siagang Nahukkungko lanri dosanu.

HOSEA 8:13

Nangai ke'nanga assare koro'bang mae ri Nakke, siagang angkanrei anjo dageng koro'banga, mingka iNakke Batara, tena Kusannang mae ri anjo koro'bang-koro'banga. Kamma-kamma anne laKuu'rangi dosana ke'nanga siagang laKuhukkungi ke'nanga lanri anjo dosa-dosana; laKukiringi ammotere' ke'nanga mange ri Mesir!

PAMMUJI 119:101

Kuliliangi sikamma panggaukang ja'dalaka, sollangku mannuruki ri ajaranTa.

AMOS 5:22

Punna angngerangko koro'bang nitunu siagang koro'bang gandung, tena nalaKutarima. TaeroKa' antarimai anjo olo'-olo'nu co'moka nupassareanga mae ri Nakke salaku koro'bang passiamakkang.

YEREMIA 6:20

Apa matu-matunna ke'nanga ampangngerangngangA' kamanynyang battu ri Syeba, yareka rampa-rampa battu ri pa'rasangang bellaya? Tena naKuero' antarimai passarena ke'nanga. Tena Kungai koro'bang-koro'bang nitununa ke'nanga.

IBRANI 8:12

LaKupammopporangi sikamma kasalanna ke'nanga, siagang laKukaluppai dosa-dosana ke'nanga.”

YEREMIA 31:34

Tenamo naparallu se'rea tau ri ke'nanga langngajaraki paranna tau untu' angngassengi Batara. Nasaba' yangasenna ke'nanga, lompo ca'di, lanaasseng ngasengA'. LaKukaluppai kasalang-kasalanna ke'nanga, laKupammopporangi dosa-dosana ke'nanga. INakke, Batara, anne akkana.”

HOSEA 11:9

Tena nalaKuhukkungko lalang larroKu; tenamo nalaKuancurukko pole. Nasaba' iNakke Allata'ala, tena Kusangkamma rupataua. INakke, Matangkasaka, anrurungangko, siagang taerokaMa' larro mae ri kau.”

HOSEA 11:7

siagang terasa'na nyawana ero' ambokoiA'. Jari lanijallakkangi ke'nanga, mingka tena lakkulle allappassangi ke'nanga manna pole nammarrang ke'nanga appala' tulung.”

YEREMIA 8:5

Mingka angngapa naikau, ummakKu, tulusu' ammengkanu siagang tulusu' a'bokonu ri Nakke? Anna'gala' jarrekko mae ri barhalanu, siagang taerokako ammotere' mae ri Nakke!

YEREMIA 2:36

Linta' sikaliko a'lampa mange ri rewata-rewatana bansa maraenga untu' appala' tulung! Mattantu lanipakala'bai nyawanu ri tu Mesir, sangkamma batenu nipakala'ba nyawanu ri tu Asyur.

1 KARAENG-KARAENG 17:18

Nakanamo anjo jandaya ri Elia, “AtanNa Allata'ala, angngapa nakigaukang anne kammaya mae ri nakke? Apaka battuki' mae untu' a'jari saba' naNau'rangi Allata'ala dosaku, sa'genna musti mate anakku?”

1 SAMUEL 15:2

LaNahukkungi tu Amalek lanri boe-boena ke'nanga naewai tu Israel ri wattunna battu tu Israel ri Mesir.

YEREMIA 3:13

Akuimi angkanaya salako siagang anjari baliko mae ri Batara, Allata'alanu. Akuimi angkanaya le'baki nupassareang pangngainnu mae ri rewata-rewatana bansa maraenga irawanganna poko'-poko' kayu lompoa, siagang tena numannuruki ri parenta-parentaKu. INakke, Batara, anne a'bicara.”

YEHEZKIEL 29:16

Israel tenamo nalappala' bantuang mae ri kau. Anjo sarennu, he Mesir, lampakaingaki bansa Israel antekamma salana ke'nanga ampattoangi Mesir, sangkamma le'baka nagaukang ke'nanga. Jari naassemmi bansa Israel angkanaya iNakke Batara Kaminang Tinggia.”

HOSEA 7:2

Tena le'bakai ammumba ri pikkiranna ke'nanga angkanaya laKuu'rangi ngasengi anjo sikontu kaja'dallanna ke'nanga. Mingka katongkokangi ri dosa-dosana ke'nanga sa'genna a'nassai Kucini'na.”

HOSEA 7:13

Cilakai ke'nanga, lanri nabokoiMa' ke'nanga. Laancuruki ke'nanga lanri angngewana mae ri Nakke. ErokKa' ampasalamaki ke'nanga, mingka ibadana ke'nanga mae ri Nakke anu tena nakontutojeng.

AMOS 3:2

“Battu ri sikontu bansaya ri lino, ikaumi se're-se'rea bansa Kuassenga siagang Kuparhatikanga. Iaminjo saba'na nalompo dosanu, siagang ma'nassa laKuhukkung ngasengko.”

KALAPPASSANG 32:34

Kamma-kamma anne a'lampamako, nampa nuerang anjo ke'nanga mange ri tampa' le'baka Kupau mae ri kau. MalaekakKu lanrurungangko, mingka nia' se're wattu sallang na narapi' wattunna laKuhukkung ke'nanga lanri dosa-dosana ke'nanga.”

PAMMUJI 95:10

Patampulo taungA' ero' ta'langnge anciniki ke'nanga; Kukana: Tamaka tamattantuna nyawana anjo bansaya! Tanajampangiai ke'nanga parenta-parentaKu.