YEREMIA 10:10 - KITTA' MATANGKASA'

¹⁰ Mingka iKatte, Batara, Allata'ala tojenga, Allata'ala assarea katallassang, Karaeng mannannunganga. Punna larroKi', ta'ge'gosoki buttaya, Punna nassuKi' tattahangngai bansa-bansaya. (

YEREMIA 10:10 ပူးပေါင်းရင်းမြစ်များ

PA'JARIANG 21:33

Nampa a'lamummo Abraham se're poko' kayu niarenga tamariska ri Bersyeba, siagang appakkaramula anjo wattua napakemi anjo tampaka untu' anynyomba ri Batara, Allata'ala mannannunganga.

1 KARAENG-KARAENG 18:39

Nacini'na ra'yaka anjo apa kajarianga, su'ju'mi ke'nanga naung ri buttaya, nampa nakana ke'nanga, “Batarami Allata'ala. Ma'nassa tojenna anjo Batara, Allata'ala!”

1 KARAENG-KARAENG 8:60

Lanri kammana, sikontu bansaya ri lino lanaassemmi angkanaya Iaji bawang Batara, Allata'ala, tena maraenganna.

1 PATTOTTORANG 29:11

Malompo tojengKi' siagang makoasaKi'. Mala'birikKi', kabarra-barraKi', siagang ri Kattemi kalompoanga. Sikontu apa-apa niaka ri langi' siagang ri buttaya iKatte ngaseng pata, iKatte Karaeng Lompo, makoasaya mae ri sikontu-kontuna.

2 PATTOTTORANG 15:3

Sallo sikali tena namanynyomba tu Israel mae ri Allata'ala matojenga, tena nakatutui hukkung-hukkung mustia naturuki ke'nanga, siagang tena imang-imang angngajarakai ke'nanga.

AYUB 9:6

Napage'gosoki Allata'ala buttaya sa'genna ta'goccang linoa, siagang a'gio' benteng pattumpa'na linoa.

PAMMUJI 10:16

Batara ammarenta sa'genna satunggu-tungguna; bansa-bansa tenaya namangngasseng ri Ia la'lanynyaki battu ri buttana.

PAMMUJI 100:3

U'rangi angkanaya anjo Karaeng Allata'ala. Ia ampa'jariki' siagang Ia ampatangki'; ikatte umma'Na, bansa Naparakaia.

PAMMUJI 100:5

Saba' bajiki Batara; sa'genna satunggu-tungguna pangngamaseanNa, nyawa tamamminraNa sa'genna sikontu turungang.

PAMMUJI 104:32

Naciniki buttaya na'jari annekkere'mo buttaya, nasentoki moncong-monconga, sa'genna assulu' umbunna.

PAMMUJI 114:7

He butta, annekkerekko ri dallekanNa Batara, ri dallekanNa Allata'alana Yakub,

PAMMUJI 145:13

PamarentahanTa tulusuki sa'genna satunggu-tungguna, kakoasanTa attahangi sikontu turungang. Tamamminrayai Batara ri sikontu janjinNa, rassi pangngamaseang sikontu panggaukanNa.

PAMMUJI 146:6

Iami ampa'jari langika siagang linoa, tamparanga siagang sikontu bonena; Ia tamamminraya satunggu-tungguna.

PAMMUJI 18:7

Makkioka' ri Batara lalang ri kasukkarangku, makkioka' ri Allata'alaku appala' pannulung. Battu ri Balla'na Nalangngereki sa'rangku na Naparhatikang pakkiokku.

PAMMUJI 29:10

Makoasai Batara ri a'ba lompoa, makoasai salaku Karaeng sa'genna satunggu-tungguna.

PAMMUJI 31:5

Kilappassanga' battu ri sikko' nitannanga untu' inakke, saba' iKattemi tampa' pa'la'langangku.

PAMMUJI 42:2

Sanrapang jonga nakku' ri je'ne' binanga, kammaminjo nakku'na nyawaku ri Katte, o, Allata'ala.

PAMMUJI 68:11

Nampa ammantang ummatTa anjoreng; lalang kabajikanTa, o, Allata'ala, Kiparakai tu kasi-asia.

PAMMUJI 68:8

O, Allata'ala, ri wattunna Kiulu ummatTa a'jappa allaloi parang kalotoroka,

PAMMUJI 74:12

Battu rioloji naiKatte Karaengku, o, Allata'ala, iKattemi ampasalamaki ikambe.

PAMMUJI 76:7

Sikontu jaranga siagang tuma'baena tu'guru' ngasemmi na mate ri pangga'garatTa, o, Allata'alana Yakub!

PAMMUJI 76:8

Tamaka hebatTa iKatte! Punna larroKi' maka inai akkulle attahang?

PAMMUJI 77:18

Rammanga appaturungi bosi, a'gamarrungi gunturuka; akkilaki kilaka ri kere-keremae.

PAMMUJI 84:2

Tamaka appakasannanna tampa' pammantanganTa, o, Allata'ala Kaminang Koasaya!

PAMMUJI 9:8

Batara ammarenta satunggu-tungguna; Napaenteng empoang kala'biranNa untu' angngadeli linoa.

PAMMUJI 90:11

Inaika angngassengi lompona pangngalarroinTa? Yareka angngassengi kale'bakkanna kalarroanTa?

PAMMUJI 90:2

Ri tenanapa nipa'jari sikamma moncong-monconga, tenanapa Kipareki buttaya siagang linoa, iKattemi Allata'ala mannannungang, tena pakaramulanTa nataena kala'busanTa.

PAMMUJI 93:2

Kassaki empoanTa battu ri uru-uruna, battu ri satunggu-tungguta nia' memangKi'.

PAMMUJI 97:4

Kila'Na assingari linoa, annekkereki buttaya anciniki.

YESAYA 37:17

O, Batara, Kiparhatikang laloi apa kajarianga mae ri kambe kamma-kamma anne. Pilangngerimi sikamma kana-kana mappakatunana Sanherib mae ri Katte, Allata'ala mattallasaka.

YESAYA 37:4

Nasuroi karaeng Asyur perwira tantarana untu' anghinai Allata'ala mattallasaka. Inai angngassengi, gassingka Nalangngereki Karaeng Allata'ala anjo panghinaanga na Nahukkung tau ampasulukai anjo kana kammaya! Lanri kammana anjo appala' doang laloko mae ri Allata'ala untu' sikamma tau attallasaka ija.”

YESAYA 40:15

Rapanji siatti' je'ne' lalang se'ro' bansa-bansaya mae ri Batara, rapang silisere' limbu'bu' ri timbangang; pulo-puloa sangkammaji ringanna au alusuka.

YESAYA 40:28

Maka tanuassengai siagang tanulangngerai? Batarami Allata'ala mannannungang, ampa'jari sikontu buttaya. Tale'bakai mangngang yareka poso; takkulleai niselangngi pikkiranNa.

YESAYA 57:15

Saba' kammaminne kananNa Allata'ala Kaminang Tinggia na matangkasa', makoasaya sa'genna satunggu-tungguna, “AmmantangA' ri tampa' tinggia siagang tangkasaka, mingka ammantang tongA' ri alla'na tau tuna pa'maika siagang tau assesse' lalanga lanri dosa-dosana, untu' ampamollei sumanga'na siagang panrannuanna ke'nanga.

YESAYA 65:16

Tunggala' taua ri anjo pa'rasanganga, ia appalaka barakka', lanapalaki sollanna nibarakkaki ri Allata'ala tamamminraya. Tunggala' taua eroki assumpa; lassumpai lanri arenNa Allata'ala tamamminraya. Saba' kasessang rioloa tappela'mi siagang nikaluppaimi.”

YEREMIA 23:36

Takkulleami ke'nanga ammake kana-kana ‘pisangnganNa Batara’. Punna nia' ija ampakei anjo kana-kana kammaya, laKupa'jari anjo pasangKu a'jari pisangngang tojeng mae ri kalenna. Tau angkanaya ‘pisangnganNa Batara’ poro natunggennaja bicarangKu, Allata'alana ke'nanga, Allata'ala mattallasa', Batara Kaminang Koasaya.

YEREMIA 4:2

Punna assumpako lanri arengKu siagang lambusukko nuadele' siagang tojeng lalang tallasa'nu, lanapalaki sikontu bansaya sollanna Kubarakkaki ke'nanga, kammayatompa lamammuji ke'nanga mae ri Nakke.”

YEREMIA 4:24

Kuciniki monconga siagang bulu'-bulu' tinggia teai sipato' batena ta'goccang.

YEREMIA 50:46

Punna tu'guru' Babel, nia' lakalangngerang sa'ra sannaka gegere'na, sa'genna ta'goccang sikontu linoa; sikamma sa'ra ammarranna panduduka lakalangngerangi mae ri bansa-bansa maraenga.”

YEREMIA 51:29

Annekkereki siagang ta'goccangi buttaya lanri Kugaukangi rancanaKu untu' ampa'jari Babel tampa' kalotoro' tenaya napammantangngi tau.

DANIEL 4:3

Tamaka lompona gau' lompo Nagaukanga! Tamaka heba'na gau' appakalannasa' le'baka Nagaukang! Allata'ala a'jari Karaeng satunggu-tungguna. Ia koasa ri sikontuna jammanga.”

DANIEL 4:34

Ri wattunna allalomo anjo wattu tuju taunga sallona, accongama' nai' ri langika, nampa ammotere'mo pangngu'rangingku. Jari kupujimi Allata'ala Kaminang Tinggia. Kupakalompoi siagang kupakala'biriki anjo Allata'ala mattallasaka mannannungang. “Allata'ala la'jari Karaeng untu' satunggu-tungguna. Ia makoasa ri sikontu jammanga.

DANIEL 6:26

Le'baki anjo akkirimmi sura' Karaeng Darius mange ri tau battua ri sikontu bansaya, suku bansaya siagang bahasaya ri sikontu linoa, angkana, “Salama' battu ri nakke!

DANIEL 6:27

Kuparentakangi mae ri sikontu tau niaka ri daera kakaraengangku sollanna malla' siagang napakalompo Allata'ala nasombaya Daniel! Iami Allata'ala mattallasaka satunggu-tungguna, sa'genna kala'busang jammang ammarenta. Tena olona lapanra' kakaraenganNa. Tena la'busu'na kakoasanNa.

DANIEL 7:14

Nisarei kalompoang siagang kakoasanga salaku karaeng, sa'genna sikamma tau battua ri sikontu bansaya, suku bansaya siagang bahasaya napare' atai kalenna mae ri ia. Lattahangi kakoasanna satunggu-tungguna, siagang pamarentahanna tena nalanigulung.

YO"EL 2:11

Assa'ra gunturu'mi sa'ranNa Batara assare parenta, mae ri tantarana. Tamaka jaina pasukanna! Tamaka kassa'na anjo tantara anggaukangai parentaNa! Tojeng tamaka lompona siagang heba'na AllonNa Batara! Tena manna sitau akkulle attahang.

MIKHA 1:4

Assolongi sikamma buluka irawa ri pala' bangkenNa kontui liling lalang pepe' a'rinraya; la'boroki buttana antama ri ka'bung-ka'bunga, rapang je'ne' irate bulu' a'lo'loro' naung.

NAHUM 1:5

Annekkereki sikamma buluka ri dallekanNa; na bontoa assolong kabusu'mi Napakamma. Punna ammumba Batara, amme'bereki buttaya, linoa siagang sikontu pandudu'na annekkereki.

NAHUM 1:6

Inai akkulle attahang punna larro Batara? Inai akkulle ta'lappasa' battu ri pangngalarroinNa? Napa'betteseki larroNa a'rinraya ancuruki batua a'jari limbu'bu' ri dallekanNa.

HABAKUK 3:10

Punna nacinikKi', ta'goccangi moncong-monconga naturung bosia battu ri langi' rapang nitumpa. Ammarrungi sa'ranna je'neka irawa ri buttaya, ta'gulung-gulung bombanga rapang a'jallo'.

HABAKUK 3:6

Punna ammantangKi', amme'bereki buttaya; punna anjanjangKi', gegereki bansaya napakamma malla'. Moncong-moncong salloa reppe'-reppe' kabusuki; bulu'-bulu' salloa a'jari lappara' todong, anjoremmi anjo ri bulu'-buluka Kioloa a'jappa baku' riolo dudu.

MALEAKHI 3:2

Mingka inai lakkulle attahang ri allo kabattuanNa Batara ampa'nyatai KalenNa? Nasaba' sanrapangi pepe'na pade'de' bulaeng ti'no', siagang sanrapangi sabung tukang pasassaya.

MATIUS 16:16

Appialimi Petrus nakana, “IKattemi Karaeng Mappasalamaka, Ana'Na Allata'ala Mattallasaka.”

MATIUS 26:63

Mingka tena Nakkana-kana Isa. Nakanamo pole imang lompoa ri Ia, “Nasaba' Allata'ala mattallasaka, paumi ri kambe, maka Ikau tojeng mintu Karaeng Mappasalamaka, Ana'naya Allata'ala?”

YOHANES 17:3

Iaminne katallassang mannannungang; sollanna naassengKi' taua Bapa', angkanaya tena ruanTa Allata'ala sitojennaya. Kammayatompa nanaasseng tongi Isa Almasi, iamintu Kisuroa battu antama' ri lino Bapa'.

LAMPA-LAMPANA 14:15

“He, angngapa nanugaukang ngasengi anne kammaya? Ikambe anne tau biasa tonjaki' sangkamma ikau ngaseng! Niaki ikambe mae anrinni untu' ampabattui Kabara' Bajika mae ri kau ngaseng, sollanna nubokoi anjo apa-apa tenaya matu-matunna; na nubattu mae ri dallekanNa Allata'ala attallasaka, ampa'jariai langika siagang linoa, kammayatompa tamparanga siagang sikontu apa niaka lalang.

PAOLE 32:4

Batara Mappasalama'nu maporea, adeleki na sukku' baji' sikontu oloanNa. Allata'alanu tamamminra pa'mai'Na na matulusu' ri nyawa, manggaukangi ri bajika na ri siratanga.

PAOLE 5:26

Niakka rupatau akkulle tuli attallasa' le'ba'namo nalangngere' Allata'ala mattallasaka a'bicara battu lalang ri pepeka?

1 TESALONIKA 1:9

Nacarita ngasemmi taua antekamma batenu antarimai ikambe pirangalloang, ri wattunna battu ikambe mae ri kau. Nacaritami ke'nanga antekamma batenu ambokoi sikamma barhalaya nunampa battu mae ri Allata'ala mattallasaka siagang tenaya ruanna untu' anynyomba mae ri Ia.

1 TIMOTIUS 1:17

Siratangi nipakalompo siagang tuli nipuji Allata'ala, Karaenna sikontu jammanga, lanri Iami mannannungang, tenaya nakacinikang siagang tenaya ruanna! Aming.

1 TIMOTIUS 6:17

Sikamma tau kalumanynyanga ri anne linoa, parallui nupakainga' sollanna tena na'jari tampo ke'nanga. Kammayatompa tena namanrannuang mae ri barang-barang latappelaka, kammayami kakalumanynyanganga. Musti manrannuang mangei ke'nanga ri Allata'ala assareaki' alla'bi-la'bi sikontu-kontuna niparalluia, sa'genta a'jari sannang.

IBRANI 10:31

Teai sipato' appakamalla'na punna tu'guru' taua antama' ri limanNa Allata'ala Mattallasaka!

YOSUA 3:10

Punna majuko sinampe', mattantu laNabongkai Batara anjo tu Kanaan, tu Het, tu Hewi, tu Feris, tu Girgasi, tu Amori siagang tu Yebus. Siagang punna a'limbammo Patti ParjanjianNa Batarana sikontu linoa ri Binanga Yordan a'jappa ri dallekannu, lanuciniki angkanaya niaki Allata'ala mattallasaka ri tangnga-tangnganu.

1 YOHANES 5:20

Niassemmi angkanaya battumi Ana'Na Allata'ala siagang le'ba' maki' Napapahangngiang sollanta tappa' mae ri Allata'ala sitojennaya. Asse're maki' mae ri Allata'ala sitojennaya lalang ri katallassanta, kammayatompa asse're tommaki' mae ri Ana'Na, iamintu Isa Almasi. Iami Allata'ala sitojennaya, siagang Iami katallassang sitojennaya siagang mannannunganga.

PAPPICINI' 20:11

Le'baki anjo nia'mo kucini' se're empoang kala'birang; lompoi siagang keboki tanja'na anjo empoang kala'biranga siagang nia' tommi rate patanNa empoang ammempo. Lanynya'mi langika siagang buttaya battu ri dallekanNa, sa'genna tenamo nakacinikang.

HAKING-HAKING 5:4

Ri wattu a'lampanu battu ri Seir, o Batara, na Kibokoi daera Edom, ma'gioki buttaya, tassungkei passolongang langika, na natu'gurammo je'ne'na rammanga.

1 SAMUEL 17:26

Nakanamo Daud, “Barani tojengi anjo tu Filistin kapereka ampa'ngarai tantaraNa Allata'ala attallasaka!” Nampa akkuta'nang mae ri kalase'renna tantaraya angkana, “Apa lanisareangi tau akkullea ambunoi anjo tu Filistin siagang antongkokai siri'na tu Israel?”

1 SAMUEL 17:36

Le'ba'mi atanta ammuno singa siagang beruang. Na anjo tu Filistin kapereka lasangkamma tommi sarenna anjo sikamma olo'-olo' kubunoa, nasaba' barani anghinai tantaraNa Allata'ala attallasaka.