YEREMIA 1:9 - KITTA' MATANGKASA'

⁹ Le'baki anjo Napajonjomi limanNa Batara nampa Najama bawaku na Nakana, “Pilangngeri siagang pa'la'bangi anne kana-kana Kupaua.

YEREMIA 1:9 ပူးပေါင်းရင်းမြစ်များ

YESAYA 49:2

Napa'jari tarangi kana-kanangku rapang pa'dang, lima KalenNa anjagaia'. Napa'jaria' rapang ana' pana nikantisika, nakuNaboli' lalang ri tongkaya nipasadia untu' nipake.

YESAYA 50:4

Batara Kaminang Tinggia angngajarakka' a'bicara, sollanna akkulle kanangku ampakajarreki tau la'baya pa'mai'na. Tunggala' bari'basa' Napabangungi erokku untu' ampilangngeri ajaranNa mae ri nakke.

YESAYA 51:16

INakke ampaka'rangi langika siagang ampadongkoki dasara'na buttaya. Kukana mae ri Sion: Ikaumi ummakKu; Kupassareangi ajarangKu mae ri kau na Kula'langiko siagang koasaKu.”

YESAYA 59:21

LapparekKa' parjanjiang siagang ikau ngaseng: Kusareko koasangKu siagang ajarangKu sa'genna satunggu-tungguna. Pangngajarrangi mae ri ana'-ana'nu sollanna akkulle todong ke'nanga ampangngajarrangi situlusu'na mange ri jari-jarina kamma-kamma anne sa'genna satunggu-tungguna.”

YEREMIA 15:19

Appiali Batara angkana, “Punna ammoterekko, laKutarimako. La'jariko ammotere' atangKu. Punna nukabarrangi apa a'matu-matua siagang teai bicara tena bonena, akkulleko ammotere' a'jari na'biKu. Labattui pole taua mae ri kau, siagang tenamo nuparallu mae ri ke'nanga.

YEREMIA 34:6

Jari kupabattumi anjo pasanNa Batara mae ri Karaeng Zedekia ri Yerusalem,

YEREMIA 36:2

“Angngalleko se're kitta' nigulung, siagang tulisiki lalang sikontu apa le'baka Kupau ri kau ri passala'na Israel siagang Yehuda, kammayatompa ri passala'na sikontu bansaya. Tulisiki sikontu kana-kanangKu appakkaramula ri uru-uru a'bicaraKu ri kau ri wattu pamarentahanna Karaeng Yosia sa'genna anne alloa.

YEREMIA 5:14

Nampa Nakana Batara Kaminang Makoasaya ri nakke, “Yeremia, lanri akkana kammana ngaseng anjo sikamma taua, lanitujui ke'nanga ri bala nakanaya ke'nanga tena nalakajariang. LaKupa'jari kana-kanangKu rapang pepe' lalang ri bawanu. Anne bansaya lasanrapangi kayu tunuang, nalanikanre ke'nanga ri anjo pepeka sa'genna la'busu'.”

YEHEZKIEL 3:10

Nampa pole Nakana Allata'ala, “He tau, parhatikangi baji'-baji' siagang u'rangi sikontu apa laKupaua mae ri kau.

DANIEL 10:10

Nampa nia'mo lima anseroa' siagang ambangumma' appatungkulu' ri limangku siagang kulantukku.

DANIEL 10:16

Nampa anjo malaeka' a'rupataua napajonjoi limanna na nasero muncengku. Kukanamo ri ia, “O karaeng, anne paccinika nasessa sikalia' sa'genna tena sikalimo kagassingangku kusa'ring.

PAMMILANGNGANG 23:5

Nampa Napabattumo Batara mae ri Bileam apa musti napau, siagang Nasuromi ammotere' mange ri Balak untu' ampabattui pasanNa Batara mae ri ia.

MATIUS 10:19

Na punna nierangko mange laniadeli, teako bata-batai ri passala' lanupaua yareka antekamma batenu la'bicara. Nasaba' punna narapi'mo wattunnu la'bicara tena tanipauannu apa siratanga lanupau.

MARKUS 7:33

Naerammi Isa anjo taua a'lampa akkale-kale, nampa Napamange karemenNa ri tolinna anjo taua. Nampa appi'ru na Najama lilana anjo taua.

LUKAS 12:12

Nasaba' punna narapi'mo wattunnu la'bicara, laniajara' mako ri RohNa Allata'ala apa siratanga nupau.”

LUKAS 21:15

INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua.

PAOLE 18:16

Ri wattunnu asse're ri Moncong Sinai, nupalaki sollanna tenamo nanulangngereki Karaeng Allata'alanu a'bicara mae ri kau, siagang tenamo nanuciniki pole kahaderanNa lalang ri pepe' a'rinra-rinraya, lanri mallakko mate.

PAOLE 18:17

Lanri kammana anjo Nakanamo Batara ri nakke, ‘Anjo pappala'na ke'nanga bajiki.

PAOLE 18:18

Battu ri bansana tonji ke'nanga laKukiring sitau na'bi sangkammaya ikau mae ri ke'nanga. LaKupaui mae ri ia apa mustia napau, nampa napabattu mae ri anjo bansaya sikontu apa Kuparentakanga.