YEREMIA 1:17 - KITTA' MATANGKASA'

¹⁷ Sadia-sadia mako Yeremia! A'lampamako siagang pabattui mae ri ke'nanga, sikontu apa Kuparentakanga mae ri kau. Teako mallakki mae ri ke'nanga, sollanna tena naKupa'jari pila' mallakko punna assidallekangko siagang ke'nanga.

YEREMIA 1:17 ပူးပေါင်းရင်းမြစ်များ

1 KARAENG-KARAENG 18:46

Anjo wattua anggappami Elia kagassingang battu ri Batara. Nalappa'mi nai' jubana nampa nasikko' ri aya'na nampa lari ampilumbai Ahab ri aganga sa'genna mange ri pakke'bu' lompona kota Yizreel.

2 KARAENG-KARAENG 1:15

Anjo memang wattua nakanamo malaeka'Na Batara ri Elia, “Teako mallakki! Amminawang mako naung battu ri anne bontoa.” Lanri kammana anjo a'lampami Elia siagang anjo perwiraya mange ri karaenga.

2 KARAENG-KARAENG 4:29

Assailemi Elisa mae ri Gehazi nampa nakana, “Lintakko! Allei takkangku nampa a'lampa memangko mange ri balla'na anne bainea. Teako ammantangngi untu' a'barisallang manna pole ri nai nusibuntulang ri aganga. Punna a'barisallang ri kau, teako pela'-pelakki wattunnu untu' ambalasaki bari sallanna. Punna battuko, lintakko padongkoki takkangku ri kalenna anjo anaka.”

2 KARAENG-KARAENG 9:1

Anjo wattua akkioki Elisa kalase'renna anjo na'bi-na'bi naajaraka nampa nakana ri ia: “Apparuruko untu' a'lampa mange ri Ramot ri pa'rasangang Gilead, siagang erangi anne botolo' niaka minynya' zaitunna.

AYUB 38:3

Kamma-kamma anne dallekamMa' sangkammako bura'ne, siagang pialimi anne sikamma pakkuta'nangKu.

KALAPPASSANG 3:12

Appialimi Allata'ala angkana, “INakke lantulungko. Napunna nuerammo assulu' anjo bansaya battu ri Mesir, lanugaukang ngasemmi ibadaya mae ri Nakke ri anne monconga. Iaminjo a'jari butti angkana iNakke assuroko.”

KALAPPASSANG 7:2

Pauangi Harun sikontu apa Kuparentakanga mae ri kau. Suroi Harun ampaui mae ri karaenga angkanaya musti nakellai tu Israel ambokoi pa'rasangang Mesir.

YEREMIA 1:18

Pilangngeri! Lanibaliangko ri pandudu'na anne pa'rasanganga, iamintu sikamma karaenna Yehuda, sikamma tau anna'galaka pamarentahang, sikamma imanga, siagang ra'yaka. Mingka anne alloa Kusareko kagassingang untu' angngewai ke'nanga. La'jariko rapang kota niaka tembo' pattahanganna, rapang benteng bassi siagang tembo' tambaga. Takkulleai ke'nanga ambetako, nasaba' iNakke lanrurungangko siagang anjagaiko. INakke, Batara anne akkana.”

YEREMIA 17:18

Poro Kipakasiriki siagang Kipa'jari mallaki sikamma tau angngondangia' siagang anjallakkangia'. Mingka teaKi' gaukangngi anjo kammaya mae ri nakke, o Batara. Kipabattui balaya mae ri ke'nanga sa'genna ancuru' taba sikali ke'nanga.

YEREMIA 23:28

Na'bi asso'naya musti angkanai, ‘Anne poro so'naji bawang.’ Mingka na'bi anggappaya pasang battu ri Nakke musti napabattui anjo pasanga siagang sitojennaya. Gandunga takkulleai nipasangkamma rarame.

YEREMIA 26:12

Nampa kukanamo, “Batara assuroa' ampabattui pasang ambaliangi Balla'Na Batara siagang anne kotaya sangkamma le'baka ngaseng nulangngere'.

YEREMIA 26:2

Nakanamo Batara ri nakke, “A'lampako mange ammenteng ri paranglakkeng luara'na BallakKu nampa a'bicara mako mae ri pandudu'na Yehuda battua anynyomba anjoreng. Pabattui mae ri ke'nanga sikontu apa Kuparentakanga mae ri kau untu' nupabattu mae ri ke'nanga. Teako kurangngi manna sike'de'.

YEREMIA 36:8

Jari nabacami Barukh anjo kana-kananNa Batara lalang ri Balla'Na Batara, sangkamma nipassuroanga mae ri ia.

YUNUS 3:2

Nakana, “A'lampako mange ri Niniwe, anjo kota lompoa, siagang pabattui mae ri ra'yaka, pasang Kupassareanga mae ri kau.”

LUKAS 12:35

“A'jaga-jagako ilalang passala' apa-apa mamo. Musti tuli sadiako ammakeang siagang musti tuli a'rinrai lampunnu;

LAMPA-LAMPANA 20:20

Nuasseng ngasemmi angkanaya tena nakumalla'-malla' ampauangko apa niaka matu-matunna mae ri kau. Kusareko pangngajarang lalang ri pa'rappunganna tau jaia, yareka massing ri balla'nu ngaseng.

LAMPA-LAMPANA 20:27

Tena nakule'ba' ampilari tugasakku untu' ampakasingariangko sikontu apa eroka Nagaukang Allata'ala ri kau ngaseng.

1 KORINTUS 9:16

Nasaba' takkullea' ampakatinggi pa'maikku punna passabakkang iaja anjo kubirittakanna Kabara' Baji' battua ri Allata'ala; nasaba' Allata'ala assuroa' anggaukangi anjo jama-jamanga. Cilakama' kusa'ring punna tena nakubirittakangi anjo Kabara' Bajika!

1 TESALONIKA 2:2

Nuassengi angkanaya ri tenanapa nabattu ikambe mange ri kau ngaseng ri Tesalonika, le'ba'mi ikambe nisessa siagang nihina ri Filipi. Mingka manna najai tau ammusui ikambe, le'ba'mi nisare kabaraniang ikambe ri Allata'alata untu' ambirittakangi mae ri kau ngaseng Kabara' Baji' battua ri Ia.

1 PETRUS 1:13

Lanri kammana, paralluko tuli a'jaga-jaga. Tutuko siagang manrannuang tojeng-tojengko mae ri barakka' lanipassareanga mae ri kau ri wattunna battu Isa Almasi sallang.